Sapwilainga!
1 Lesa ukeba kuba’mba “bantu bonse bapuluke, bakayukishe bya bukine.” (1 Timo. 2:4) Onkao mambo, witupa mwingilo wa kusapwila mambo awama. (Mat. 24:14) Umvwe twayuka ene mambo o twakonshesha kutwajijila na kusapwila, kafwako byakonsha kwitulefula nangwa kwitulabika ne.
2 Mambo ka a Kukoselamo? Mu ino ntanda muji bya kulabika byavula bilengela bantu kuvulama nangwa kubula kuta muchima ku byo twibabula. Onkao mambo, twafwainwa kwibavululangako buluwe bwa Lesa bwa lupulukilo kimye kyonse. (Mat. 24:38, 39) Mu kunungapo, bwikalo bwa bantu bwalauka-alaukatu kikupu. Nangwatu byubiwa mu ino ntanda byalukatu nobe kukopa kwa jiso. (1 Ko. 7:31) Kesha, mulungu wiya nangwa ñondo walondelapo, bantu bo tusapwila bakonsha kwikala mu makatazho nangwa kutanwa mu byubilo byakonsha kwibalengela kutesha muchima ku mambo awama o twibasapwila. Nanchi kechi musanchila Kamonyi wimusapwijile bukine byo akoseleko nenyi?
3 Londai Lusa lwa Lesa: Yehoba mu butekanye waswisha kimye kyabaya kupita, saka akyangye kushinkanya na babi. Kupichila mwi atweba watwajijila kusanshijila ba michima yakishinka kwalulukila kwi aye kuba’mba bakapuluke. (2 Pe. 3:9) Umvwe kechi tubena kusapwila mambo awama a lusa lwa Lesa ku bantu ne kwibajimuna pa mambo a juba ja kije ja Lesa, jibena kwishila bantu bakana kuleka mashinda abo atama ne, abya mashi abo etushinkamana. (Ezi. 33:1-11) Nangwa kya kuba’mba bantu kechi kimye kyonse kyo batambwila buluwe bwetu ne, kechi twafwainwa kukoka ne kuleka kwingila na ngovu mu kukwasha bantu bakishinka bafwainwa kumwenamo mu lusa lwa Lesa ne.—Byu 20:26, 27; Lo. 12:11.
4 Tumweshe Butemwe Bwetu: Yehoba Lesa kupichila mwi Yesu Kilishitu ye wakambizha kuba’mba mambo awama asapwilwe pano pa ntanda ponse. (Mat. 28:19, 20) Nangwa bantu bakana kuteleka, tuji na jishuko ja kumwesha butemwe bwetu ne kwipana kwetu kwi Lesa pa kukoselamo mu kuba kyawama.—1 Yoa. 5:3.
5 Twayai tutwajijile kusapwila! Tusapwilenga na kubambakana kyonka kino kimye kya “juba ja lupulukilo” ja kwa Yehoba.—2 Ko. 6:2.