Nga Mamboka Akuba Satusapwilatu?
1 Nanchi mwingilo wakusapwila Bufumu komwikala waingijiwa pakimye kyabayanyi? (Mat. 24:14) Umvwe ibyo, mwakonsha kulanguluka’mba nyaunda yonse yakipwilo yapwa kusapwilwa. Pano byomuya nakusapwila, kimo kimye bantu bavula bomutana kechi batako nemaana kumambo a Bufumu ne. Monai byokyaambiwa pamambo abatumwa bakine ba Yesu mubuku wa Ukusesema kwa kwa Esaya-Ulubuuto lwa Bantu Bonse 2 papeja 141 amba: “Mumapunzha amo, bifuma mumwingilo wabo kuba bibasekeshane umvwe bebyesakanya kumwingilo yebengila nengovu yobataya. Nangwa byonkabyo bachinchika nekutwajijila.” Pano nga mamboka akuba satusapwilatu?
2 Vulukai Yelemiya: Kuchinchika kwetu mumwingilo wabusapwishi kechi kwafwainwa kwimenatu pabantu kwitumvwa nangwa babula kwitumvwane. Yelemiya wasapwijile pamyaka 40 munyaunda imotu nangwa kyakuba bachechetu bobaumvwine byambo byanji nebavula bakaine byoaambilenga. Mamboka Yelemiya kyoakosejileko? Mambo waingijilenga mwingilo Lesa yeamukambizhe kuba kabiji nemaana anji oajinga nao akuyuka bikobiwa kulutwe nalwendo amutundaikile kutwajijila kusapwila saakosa.—Yele. 1:17; 20:9.
3 Neatweba byobyokiji. Yesu ‘witulayile’mba, mukebasapwile bantu ne kunshimuna’mba, ye mwine yeatongola Lesa amba akekale wa kwibachibila mambo bomi ne bafu.’ (Byu. 10:42) Byambo byotushimuna bilumbulula bumi nangwa lufu kuboba bebyumvwa. Bantu bakebatotolwesha kwesakana nabyobatambwila mambo awama. Nanchi byokiji byobyo, mwingilo wetu kewakwingila byonka byotwakambizhiwa kuba. Nangwa kyakuba bantu bakana kuteleka, kino kitupa jishuko jakumwesheshamo butemwe bwetu bukatampe nekwipana kwetu kwi Yehoba byotutwajijila kwingila nangovu. Bino kuji nebikwabo bitulengela kwingila.
4 Tubena Kumwenamo: Kuba kyaswa muchima wa Lesa, kikale bantu munyaunda yetu bomvwe nangwane, kwitupa mutende wakine kine nelusekelo lubula kutanyiwa mubintu bikwabo. (Sala. 40:8) Bwikalo bwetu popo bulumbuluka nekulumbuluka. Umvwe twibikako mumwingilo, michima nemilanguluko yetu popo ikala naluketekelo nelusekelo lwakwikala muntanda ipya ya Lesa. Kulanguluka paino milaye yamu Binembelo kukosesha bingi bumupashi bwetu nebulunda bwetu ne Yehoba.
5 Nangwa kyakuba kafwapo kyotubena kumona kibena kufuma mumwingilo wetu wabusapwishine, kampepo twakusa lukunwa wabukine mumuchima wamuntu awo ukamena mukimye kya Yehoba kyatongolwa. (Yoa. 6:44; 1 Ko. 3:6) Kafwako nangwa umo wamwiatweba wayuka bantu banga bakafunda mambo a Bufumu kupichila mukwingila nangovu kwabantu ba Yehoba, kikale mumpunzha yotujiko nangwa monse mwaya ntandane.
6 Umvwe kechi twateleko muchimane, twafwainwa kumvwina mukambizho wa Yesu wakuba’mba: “Sa mujimuka ne kutoñama ne kulomba: pakuba anweba kechi mwayuka aja juba po jikeshila ne. Kabiji kyo nemwambila anweba nebambila bonse, namba, Labainga mukenkentenga.” (Mako 13:33, 37) Onkao mambo nanchi, twayai atweba bonse tutwajijile kusapwila mambo awama a Bufumu, tusangajikenga muchima wa Yehoba byotubena kuzhijika jizhina janji jikatampe jazhila.