Ene Mambo o Tubwelelako pa Kimye ne pa Kimye
1. Ñanyi bwipuzho bwipuzhiwa pa mambo a mwingilo wetu wa busapwishi?
1 Mu mapunzha avula, kwikala kwingijila mu manyaunda bimye byavula bingi. Tutwajijila kubwela ku mazubo antutu amo pa kimye ne pa kimye nangwa kya kuba mwina nzubo witubujile’mba kechi uji na lusekelo ne. Mambo ka o tutwajijila kubwelako ku boba babujile kukeba kumvwa mambo awama kunyuma kwe?
2. Ñanyi kintu kine kikatampe kitulengela lunkonena mu mwingilo?
2 Butemwe bwa Kutemwa Yehoba ne Bantu: Kintu kine kikatampe kitulengela lunkonena mu mwingilo ke butemwe bwetu pe Yehoba. Muchima wetu witulengela kutwajijila kubulako bantu pa mambo a Lesa wetu mukatampe. (Luka 6:45) Butemwe bwetu bo twatemwa Yehoba bwitutundaika kukokela mikambizho yanji ne kukwasha bantu kuba kintutu kimo. (Mana. 27:11; 1 Yoa. 5:3) Kuchinchika kwetu kwa bukishinka mu uno mwingilo kechi kwaimena pa bantu kuswa nangwa kukana mambo awama ne. Mambo nangwatu kimye bena Kilishitu ba mu myaka kitota kitanshi kyo bamanyikilwenga, abo batwajijile kusapwila kwa kubula ‘kuleka.’ (Byubilo 5:42) Umvwe bantu bakana kumvwa, kino kechi kitulengela kulefulwa ne, tutwajijila kwikala bakosa kabiji ne kumwesha’mba twipana ne kumutemwa bingi Yehoba.
3. Kutemwa bantu kuketukwasha byepi kutwajijila kusapwila?
3 Kintu kikwabo kitulengela lunkonena ke na mambo a butemwe bwa kutemwa bantu. (Luka 10:27) Yehoba kechi usaka muntu nangwa umo konaika ne. (2 Pe. 3:9) Nangwatu mu nyaunda mo baingijila javula, tubena kutanamo bantu bakeba kwingijila Yehoba. Kya kumwenako, mu Guadeloupe, mu bantu 56 bo mwakonsha kutana pakonsha kwikala Kamonyi umo wa kwa Yehoba, pano bino bantu 214 bo babatizwe mwaka wapwa. Kabiji bantu bafika ku 20,000 batainwe ku Kivuluko, kibena kulumbulula’mba muntu umo mu bantu 22 ba mu Guadeloupe ye watainweko!
4. Mu ñanyi mashinda manyaunda mo alukila?
4 Kwaluka kwa Nyaunda: Nyaunda yetu yaluka aluka monka mwenda kuvilukila bantu. Mambo pa kubwela ku nzubo ko babujile kumwesha lusekelo, twakonsha kutanako muntu mukwabo wa mu kisemi kampe wabula kumvwapo kala mambo etu, awo wakonsha kulupuka pangye ne kutelekako. Nangwa kampe twakonsha kutanapo bantu bavilukilapo katataka baji na lusekelo. Baana baji na bansemi babo bebakanya kumvwa mambo awama, bakoma ne kutendeka kwiikela. Bantu ba uno mutundu bakonsha kukeba kumvwa mambo a Bufumu.
5. Bi ka byakonsha kulengela bantu kutendeka kumvwa mambo awama?
5 Bantu nabo baluka. Pa kimye kimo mutumwa Paulo wajinga ‘wa mwenga, wa lupato kabiji washinta.’ (1 Timo. 1:13) Po pamotu, bantu bavula babena kwingijila Yehoba lelo jino, kunyuma kwe kechi bajinga na lusekelo mu bukine ne. Bamo kampe bakanyanga ne mambo awama kusapwilwa. Monka mubena kuya na kwalukila bintu, bamo bakanya mambo awama kusapwilwa nangwa boba babujile lusekelo, bakonsha kutendeka kutelekako. Bakwabo bakonsha kutendeka kumvwa panyuma ya kuponenwa na malwa, nabiji kufwisha mulongo mu kisemi, nkito kupwa, lukatazho lwa mali nangwa kikola.
6. Mambo ka o twafwainwa kutwajijila kusapwila na mukoyo?
6 Buno bwikalo bubena kuya na kuloba, bino mwingilo wetu wa kusapwila ne kufunjisha ubena kuya palutwe. (Isa. 60:22) Onkao mambo, tutwajijila kusapwila na mukoyo ne kwibikishako kwikala na mweno yawama ya bintu. Muntu mukwabo ye twakonsha kwisamba nanji wakonsha kumvwa. Twafwainwa kutwajijila kusapwila! ‘Mu kuba kino tukepulusha atwe bene ne abo betumvwa pamo.’—1 Timo. 4:16.