“Twaingila mu Nyaunda Yetu Bimye Byavula!”
1 Abya mwaikalapo kala panshi ne kumona inge nyaunda yenu yaingijiwamo javula kya kuba’mba kafwamo nangwa umo wa bumukooko ye mwabula kufwakesha nenyi? Kampe mwamba’mba: ‘Nayuka byo baji, mambo ka o nafwainwa kwishupila na kubwela ku bantu babula lusekelo lwa kukeba kufunda bukine?’ Kya kine manyaunda avula engijiwamo javula. Nangwa kikala byonkabyo, kino kechi kyatama ne, kijitu bulongo. Mambo ka? Monai bishinka bina byalumbululwa panshi po.
2 Milombelo Yetu Ikumbulwa: Yesu waambile’mba: “Kine bujimi bwa kunowa bo bwabayisha, pakuba ba kunowabo bakepa: byonkabyo lombai kwi Mwina bujimi, atume ba kunowa mu bujimi bwanji.” (Luka 10:2) Pa myaka yavula tusashijila Yehoba kutwajijila na kwitukwasha. Mu manyaunda avula, muji bamwingilo bavulako kabiji javula tubena kwiapwisha kwingijilamo. Nanchi kechi kituletelapo lusekelo pa kuyuka amba Yehoba ukumbula milombelo yetu nenyi?
3 Kukosako Kuleta Bipangwa Byawama: Nangwatu mu manyaunda engijiwamo javula mobakiji bantu babena kumvwa mambo awama a Bufumu ne kuyuka bukine. Onkao mambo, twafwainwa kutwajijila na kuyamo javula ne kuketekela kutanamo bantu bakwabo bakishinka. (Isa. 6:8-11) Byonka byaubilenga baana ba bwanga batanshi ba kwa Yesu, ‘yainga’ ku bantu mu nyaunda yenu, ne kweseka na ngovu kwibatundaika kutemwa Bufumu bwa Lesa.—Mat. 10:6, 7.
4 Mu Portugal bipwilo byavula bingijila mu nyaunda yabyo mulungu ne mulungu, pano bino monka byataina bantu ba bumukooko. Nyenga umo umvwa bingi bulongo kabiji wamba’mba: “Kimye kyonse lukelo sankyangye kuya mu mwingilo, ndomba kwi Yehoba kuba’mba ankwashe kutanapo muntu ubena kukebesha kufunda Baibolo.” Juba jimo walaile kufunjisha bengila mu shitolo mo bechikila nsuki. Byo abweleleko, watainemotu umo. Uno muntu waambile’mba: “Bakwetu kechi babena kukeba kufunda bukine ne, bino amiwa mbena kukeba.” Mu ñondotu umo, uno muntu naye watatwile kufunjishapo banji babiji Baibolo. Bukiji-bukiji wabatizwe, kepo atatwile ne bupainiya!
5 Mwingilo Ubena Kwingijiwa: Mambo awama abena kusapwilwa, byonka byaambijile jimo Yesu amba akasapwilwa. (Mat. 24:14) Nangwatu mu mapunzha bantu mo ‘bakana kwitumvwa’ babena kujimunwa mu mwingilo wa busapwishi. Twayuka kuba’mba bamo kechi batambwila bukine ne. Pano bino, bantu ba yewo mutundu bafwainwa kujimunwa pa mambo a lonaiko lukaleta Yehoba.—Ezi. 2:4, 5; 3:7, 8, 19.
6 Tukyangye Kupwisha Mwingilo: Atweba kechi tuji na lūsa lwa kufuukula kimye kya kulekelamo mwingilo wa kusapwila ne. Yehoba ye wayuka kimye kyo akapwilamo. Ye wayuka umvwe mu nyaunda yetu mukiji bakeba kumvwa mambo awama. Lelo jino, bantu bamo bamba’mba kechi baji na lusekelo lwa kukeba kufunda bukine ne, pano bino malwa amo amweka mu bwikalo bwabo nabiji kupwa nkito, kikola kikatampe, lufu lwa mutemwe—akonsha kwibalengela kutelekako kimye kimo. Na mambo a lupato nangwa kukepelwa kwa kimye, bantu bavula bakyangye kutelekesha nangwa jimotu ku byo tusapwila. Kyakonsha kwibakwasha kuba’mba batelekeko ke kwibafwakashisha.
7 Bantu babena kukoma ino myaka ne bisemi byabo, bata bingi muchima pa bwikalo bwabo ne kwipuzha mepuzho akonshatu kukumbulwa na Byambo bya Lesa. Inetu umo waichile Bakamonyi babiji mu nzubo yanji ne kwamba’mba: “Byo najinga mwanyike kechi nayukile bamama kyo bapangilanga Bakamonyi ne kwibambila’mba kechi bakeba kufunda bukine ne, mambo abo bambatu bya mu Baibolo. Nafukwile kuba namba inge nakoma, nasongolwa ne kwikala na nzubo yami, nketa Bakamonyi ba kwa Yehoba kwiya na kundumbulwila Baibolo.” Byo byo aubile, kyasangajikile bingi Bakamonyi bamufwakashijile.
8 Nanchi Mwakonsha Kuwamishako Busapwishi Bwenu Nyi? Kimo kimye bantu bo tufwakashisha kechi bobalengela’mba tukankalwenga kwingijila mu nyaunda javula ne. Kampe atweba bene yetu twikala na lukatazho. Abya tukankazhama pa kutatula kwisamba nabo? Kukankazhama ko kulengela kubula kulanguluka, kuyoyomena jiwi ke kukamakamatu meso. Mwafwainwa kwikala bashiinwa ne kumwemwesela pa kwamba. Esekai kusapwila mu mashinda akwabo. Ambai pa bintu byapusana-pusana ne kweseka na ngovu kuwamishako mashinda akusapwilamo. Kampe mwakonsha kupimpula jipuzho jitanshi nangwa kutanga kinembelo kikwabo mu misambo yenu. Ipuzhai balongo ne banyenga bemubuleko mashinda o bamona kuba’mba abena kwingila bingi bulongo mu nyaunda yo mubena kwingijilamo. Ingilai mu mwingilo na basapwishi ne bapainiya bapusana-pusana, ne kumona kibakwasha kwingila bulongo mu busapwishi bwabo.
9 Yehoba witabizha ne kupesha mwingilo wa kusapwila Bufumu, kabiji kwingilako uno mwingilo kumwesha byo twamutemwa ne byo twatemwa bakwetu. (Mat. 22:37-39) Onkao mambo, twayai twingile mwingilo mu nyaunda yetu kwakubula kukoka kufika ne kumpelo.