Kabokoshi Ka Mepuzho

◼ Nanchi muntu wakoka ubabulenga kusapwila pa kimye kyabaya, mwakonsha kumukwasha byepi pa kuba’mba ekale jikwabo musapwishi wa mambo awama?

Tusekela bingi umvwe twamona muntu wakoka wamwesha kufuma mu muchima wanji mwine kuba’mba kya kine ukeba kwingijila Yehoba. (Luka. 15:4-6) Kimye kimo, kulengululwa nangwa makatazho a mu bwikalo o alengejile uno muntu kuleka jisambijilo ja pa bunke, kutanwa ku kupwila ne kwingila mu butumwa. Nanchi mwakonsha kumukwasha byepi pa kuba’mba anunguluke ku mupashi?

Atweba bonse twafwainwa kwitatwila kumwesha butemwe bwetu bwa kine bwa bwina Kilishitu ku uno muntu. Bakulumpe mu kipwilo bakonsha kupelawizha kumona kukajilwa kwanji kwa ku mupashi. (Yako. 5:14, 15) Ubabulenga kusapwila wakonsha kukwashiwa kwikala wabambakana mu mwingilo wa mu bujimi na musapwishi wapilwa, umvwe kya kuba’mba walekatu pa ka kimye kacheche. Nangwa kiji byonkabyo, umvwe kya kuba’mba awo muntu kechi ubapwilenga pa kimye kyabaya ne, bukwasho bwabaya bwakonsha kukebewa. Pa kuba’mba ekale na lwitabilo lwakosa bulongo ne kuyuka, jisambijilo ja Baibolo jafwainwa kutatulwa mu buku wakonsha kumukwasha. Umvwe kyaikala byonkabyo, utangijila mwingilo wa mu bujimi ukanengezha musapwishi wafikapo kuba’mba atangijilenga jisambijilo ku uno muntu. (Hebe. 5:12-14; monai Kabokoshi ka Mepuzho mu Butumwa Bwetu bwa Bufumu bwa mu Kibemba bwa November 1998.) Umvwe mwayukapo umo wafwainwa buno bukwasho, bulai utangijila mwingilo wa mu bujimi wa mu kipwilo kyenu.

Ubabulenga kuspwila pa kimye kyabaya saka akyangye kubuulwa kuba’mba atatule kuya mu mwingilo wa mu bujimi ne, kikebewa bakulumpe mu kipwilo babiji kumonaña nanji ne kumona umvwe wafikapo kwikala musapwishi wa Bufumu. Bakalondela ndonda imo yonka yo balondela pa kupitulukamo na bapya bakeba kwikala basapwishi ba mambo awama. (Monai Ulupungu lwa kwa Kalinda lwa November 15, 1988, peja 17.) Ubabulenga kusapwila wafwainwa kwikala ubena kukebesha kusapwila mambo awama ku bakwabo. Kabiji wafwainwa byonse bikebewa byanembwa mu buku wa Abateyanishiwa pa mapeja 98 ne 99, kabiji utanwa ku kupwila kimye kyonse.

Kwikala na kiibijizho kyawama kya bya ku mupashi kimye kyonse, kwakonsha kukwasha muntu wabwela pa nyuma kulama bulunda bwanji na Yehoba ne kutwajijila kwenda mu jishinda ja bumi bwa myaka. (Mat. 7:14; Hebe. 10:23-25) ‘Kuteshako muchima yense’ ne kununguluka mu byubilo bya bwina Kilishitu kwakonsha kumukwasha “kubula kubwela pa nyuma nangwa kubula kupanga bipangwa” byo aji mwana wa bwanga wa bwina Kilishitu.—2 Pe. 1:5-8.