Kange Muvulameko Bantu Bakoka Ne
1. Mambo ka o twafwainwa kuya na kutundaika boba bakoka?
1 Nanchi mwayukapo muntu wakoka nyi? Kampe waleka ne kupwanañana na kipwilo kabiji ne kupampuka wapampukamo. Kampe awo muntu mwamutaine kimye kyo mwaingijilenga mwingilo wa ku nzubo ne nzubo. Twafwainwa kuyuka kuba’mba awa wakoka ne luno ukiji mulongo wetu wa ku mupashi. Tukeba kumumwesha’mba twamutemwa ne kumukwasha kubwela mu kipwilo ‘kwi kafunga ne kalama wa michima yetu.’—1 Pe. 2:25.
2. Twakonsha kutundaika byepi wakoka?
2 Mutai Muchima: Kutuma lamya nangwa kufwakesha muntu wakoka kwakonsha kumulengela kuyuka’mba kechi twamulubako ne. Twakonsha kwamba’mba ka? Twakonsha kumutundaika kupichila mu kumubula’mba tubamulangulukengapo. Mwisambo wenu wafwainwa kwikala wawama kabiji ubena kupana lutundaiko. (Fili. 4:8) Twakonsha kutongolapo kishinka kimo kitusangajikile bingi pa kupwila kwajingako katataka. Kabiji twakonsha kumwita kuba’mba akatanweko ku kupwila kukatampe kubena kwiya ne kumubula’mba tukamusungila pa kwikala nangwa kumunengezhezha bya ñendelo.
3. Nyenga umo wakwashiwe byepi kwikala wabambakana jibiji?
3 Nyenga wakokele pa myaka 20, bamutaine mu nyaunda. Nangwa kya kuba kechi wakebelenga lufunjisho lwa Baibolo ne, awa nyenga wamutaine watwajijile kumufwakesha saka amushila ne magazini. Panyuma ya kupwila kwa nkambi uno musapwishi wisambile na uno nyenga wakokele bishinka bimo bikatampe bya kupwila kwa nkambi kabiji mu kuya kwa moba uno nyenga wakokele waikele ke wabambakana jibiji.
4. Twafwainwa kumumona byepi muntu watendeka jibiji kutanwa ku kupwila?
4 Umvwe Wakoka Wabwela: Umvwe mulongo wakoka watendeka kwiya na kupwila, twafwainwa kumumona byepi? Nga Yesu wibobile byepi baana banji ba bwanga panyuma ya kumusha pa ka kimye kacheche? Wibatongwele’mba “balongo” banji kabiji wibaketekejile. Wibapele ne mwingilo wanema bingi. (Mat. 28:10, 18, 19) Palutwe kacheche, batabankene na kusapwila mambo awama kwa ‘kubula kuleka.’—Byubilo 5:42.
5. Tongolai bintu byakonsha kwitulengela kubula bakulumpe pa mambo a muntu wakoka.
5 Saka tukyangye kubula muntu wakoka amba tumufunjishenga lufunjisho lwa Baibolo nangwa saka tukyangye kubula mulongo wakoka pa kimye kyabaya amba tuyenga nanji mu mwingilo, twafwainwa patanshi kukibula bakulumpe kuba’mba betubule bya kuba. Umvwe twatana musapwishi wakoka mu nyaunda, twafwainwa kubula bakulumpe kuba’mba bamukwashe.
6. Lusekelo ka lo twakonsha kumona mu kukwasha boba bakoka?
6 Kwesakana na monka mwaambila Baibolo, aba bakapwisha kikonkwanyi kyabo bo bonkatu bakapuluka. (Mat. 24:13) Onkao mambo yukai boba balefulwa nangwa bakumpulwa. Umvwe twibatekenya ne kwibamwesha butemwe bwa Yehoba kupichila mu kwibata muchima, kiketuletela lusekelo kwibamona batendeka jibiji kwingila mwingilo wabo wazhila pamo ne atweba.—Luka 15:4-10.