Sukulu ya Butumwa bwa Teokalasi ya mu 2001

¹ Bishinka bya mu Binembelo byavula bingi bimwesha ene mambo atweba bonse o twafwainwa kwambila majashi mu Sukulu ya Butumwa bwa Teokalasi.—Mana. 15:23; Mat. 28:19, 20; Byu. 15:32; 1 Timo. 4:12, 13; 2 Timo. 2:2; 1 Pe. 3:15.

² Mutanchi wa kutanga Baibolo mulungu ne mulungu kechi upuswa kwikalamo mu sukulu ne. Unengezhewa kutangatu kampe peja imo mu Baibolo pa juba pa juba. Kutatula uno mwaka, mu mulungu wa kupitulukamo kwa kunemba, muji ne kutanga Baibolo. Kutanga Baibolo kwanungwako kubaikalengako pa myaka isatu yapitapo, kwapwa. Pano bino, inge mukeba kutanga byavula mu Baibolo kukila pa byatanchikwa, mwakonsha kwinengezhezha mutanchi wa kutanga anweba bene.

³ Jashi Na. 2 jifunjisha balongo “kutanga” Kyambo kya Lesa pa mvula-bantu. (1 Timo. 4:13) Umvwe bemupapo jashi ja kutanga, mwafwainwa kwijitanga pa bunke bwenu mu kubwezha-bwezhapo na jiwi jasansuka. Kimo kimye, mwakonsha kumwenamo mu kuteleka ku bayuka kutanga bulongo pa kuba’mba ntangilo yenu ya byambo iwamenga, kuvwangakotu ne mulambisha wa kwalaula-alaula jiwi ne mbaji ikwabotu ya ntangilo yawama.

⁴ Majashi Na. 3 ne Na. 4 afumanga mu buku wa Ukupelulula, wanengezhewa kwingijisha mu mwingilo wa mu bujimi. Umvwe jashi jo bemupa kwamba jiji na byambo byavula byomwakonsha kubula kupwisha mu kimye kyapanyiwa, salululaimotu byambo byakonsha kwingila mu nyaunda ingijilamo kipwilo kyenu. Mwafwainwa kwamba ñambilo iji yonse yafwainwa kwingila mu nyaunda momwingijila.

⁵ Esekai na ngovu kwamba majashi onse obemupa mu sukulu. Ikalai na kimye kya kunengezha bulongo, ne kwamba byambo kufuma mu muchima wenu. Mu kuba bino, mukakoseshanga kipwilo kyenu, kabiji anweba bene mukamwenamo mu kwamba majashi na muchima yense mu Sukulu ya Butumwa bwa Teokalasi mu 2001.