Tumbijikai Yehoba na Mingilo Yawama
1 Umvwe mvula mukatampe wimunoka, byo mwakonsha kumvwapo bulongo inge mwatana mwakweyama! Umvwe mwatwa kyuya kabiji mwawama ne bajimo bemutambwila bulongo, mwakonsha kutemwa kwikala monkamo. Kusapwila mambo a Bufumu kulengela bantu kufuma mu bwikalo bwa Satana ne kumona mwa kufyama. Nanchi byubilo byetu bya pa juba pa juba byakonsha kukwasha bantu bangi kukumbwa kwiya ku ino nzubo ya kufyamamo nyi? Ee, mambo Yesu waambile’mba bantu ‘bakamona mingilo yetu yawama, ne kutumbijika Shetu uji mwiulu.’—Mat. 5:16.
2 Nanchi twakonsha kuba byepi pa kuba’mba mingilo yetu ikebule bantu bangi kwiya kwi Yehoba ne jibumba janji? Kupichila mu kwingijisha byambo bya Yesu biji pa Luka 6:31 ne 10:27 mu bwikalo bwetu pa juba pa juba. Kino kiketulengela kutemwa bakwetu, kabiji kiketupusanyako na bantu baino ntanda babula butemwe kabiji babula kuta maana bantu bakwabo.
3 Nyenga umo wajinga mu bwato wamwene nsongwakazhi saka akakilwa na mambo a lwendo lwa pa mema kya kuba’mba kechi wajinga ne na ngovu ya kulela mwananji wa mucheche ne. Nyenga washikwile uno mwaana ne kumulela. Uno nsongwakazhi byo aipwizhe nyenga kyo afwainwe kuba pa kuba’mba amweshe lusanchilo, nyenga waambile’mba: ‘Mwane, nemulomba kuba’mba mukateleke ku Bakamonyi ba kwa Yehoba kimye kyo bakemufwakashisha.’ Uno nsongwakazhi waubile byonkabyo, kabiji pa kino kimye, aye ne mwata wanji ke Bakamonyi. Mingilo yawama yo yalengejile bano bantu kutambwila buluwe bwa Bufumu.
4 Bwikalo Bwetu Bwikale Bwafwainwa Konse Kotuji: Byubilo byetu mu kimasamasa, ku nkito, ku sukulu, ne mu kimye kya makayo bilengela bakwetu kulangulukapo bimo pe atweba ne pa bupopweshi bwetu. Onkao mambo, twafwainwa kwishikisha’mba: ‘Nanchi bantu bammona byepi ne kisemi kyami? Nga bakwetu botwikala nabo kipi kipi bamona’mba nzubo yetu ne lubanza bya butooto kabiji byalamwa bulongo? Abya botwingila nabo ku nkito nangwa bakwetu botufunda nabo ku sukulu betumona’mba kechi tukelwa ne, kabiji twabambakana nyi? Nanchi bakwetu betumona’mba tuvwala bya kuvwala byafwainwa kabiji twi bamushingi?’ Mingilo yetu yawama ikakebula bantu bangi kupopwela Yehoba.
5 Petelo wajimwine bena Kilishitu kuba’mba bakanenwa bibi. (1 Pe. 4:4) Twafwainwa kumona’mba kechi tunenwa bibi na mambo a bwikalo bwetu ne. (1 Pe. 2:12) Umvwe mingilo yetu ya pa juba pa juba saitumbijika Lesa ye tupopwela, tukekala nobe malampi aji peulu, abena kumwesha bantu kwiya mwa kufyamya mwapana Yehoba.—Mat. 5:14-16.