Yehoba Witukosesha
1 Mwakonsha kwambapo’mba ka pa mutumwa Paulo? Byo tutanga buku wa Byubilo, tumvwisha byo abambakene mu mwingilo wa Yehoba. Paulo wakonsheshe byepi kuba byonse byo aubile? Waambile’mba: “Nakonsha kuba byonse mwi aye unkosesha.” (Fili. 4:13) Ne atweba twakonsha kumwenamo mu ngovu ipana Yehoba. Mu ñanyi jishinda? Kupichila mu kwingijisha bino bintu bitanu na kimo byo etunengezhezha kwitukosesha ne kwitutundaika ku mupashi.
2 Byambo bya Lesa: Byonka byo tuja kajo pa kuba’mba twikale na ngovu, byo byo twafwainwa ne kuba na Byambo bya Lesa pa kuba’mba twikale bomi ku mupashi. (Mat. 4:4) Baibolo itupa bulume bwitulengela kutwajijila kwikala bakosa. Pa kuba’mba tutwajijile kwikala bakizaku kabiji babambakana mu bukine, twafwainwa kwikala na lufunjisho lwa lumbuluka lwa pa bunke ne kulanguluka-langulukapo pa byo tubena kufunda, pa juba pa juba inge kyakonsheka.—Sala. 1:2, 3.
3 Lulombelo: Kyanema bingi kufwenya kwipi ne Yehoba, kikatakata mu kimye kyo twakajilwa. Kupichila mu mupashi wanji, upana bulume ku babena kwibulomba kwi aye mu lulombelo. (Luka 11:13; Efi. 3:16) Binembelo bitutundaika ‘kukelwa mu lulombelo.’ (Loma 12:12) Nanchi muba byo byo nyi?
4 Kipwilo: Tukoseshiwa ne kutundaikwa pa kupwila kwa kipwilo ne pa kupwañana mu butemwe na balongo ne banyenga yetu. (Hebe. 10:24, 25) Inge twafikilwa na makatazho, balongo betukosesha ne kwitukwasha mambo betutemwa.—Mana. 17:17; Sapwi. 4:10.
5 Mwingilo wa mu Bujimi: Kusapwila kimye kyonse kwitukwasha kulanguluka-languluka pa Bufumu bwa Lesa ne mapesho abo. Tumvwa bingi bulongo inge twakwasha bakwetu kufunda pe Yehoba. (Byu. 20:35) Kechi atweba bonse twakonsha kuya kuji kukajilwa kukatampe nangwa kwingilako mwingilo wa kimye kyonse ne, bino twakonsha kwingilako mwingilo wa mu bujimi mu mashinda akwabo alumbuluka.—Hebe. 6:10-12.
6 Bakulumpe mu Kipwilo ba Bwina Kilishitu: Tumwenamo bingi mu byo betukosesha ne mu byo betukwasha bakulumpe mu kipwilo. Yehoba wibapa mwingilo wa kulama jitanga ja Lesa jo bapewa. (1 Pe. 5:2) Bapaina benda bakosesha bipwilo byo bafwakashisha, byonka byaubanga Paulo mu moba anji.—Loma 1:11, 12.
7 Bya Kumwenako bya Bantu ba Kishinka: Tusangalala bingi inge ketulanguluke pa bya kumwenako bikosesha bya bamingilo bakwetu bakishinka, bakala keene ne ba mu moba etu a lelo. (Hebe. 12:1) Umvwe mukeba kukoselako, mambo ka ne kutangapo jishimikila jimo ja bwikalo mu magazini etu, sawakya walutundaiko mu Yearbook, nangwa majashi amo asangajika pa mingilo ya Bakamonyi ba kwa Yehoba mu moba etu a lelo aji mu buku wa Proclaimers?
8 Mulongo umo, uji na myaka ya kusemwa kupitaila pa 90, wafunjile bukine byo akijingatu nsongwalume. Saka akikepatu, lwitabilo lwanji lwaesekelwe. Patanshi, bamo boapwilanga nabo kipwilo kimo babambakene bingi, bafumine mu jibumba ja Yehoba. Kya bubiji, mwingilo wa ku nzubo ne nzubo wamukatezhe bingi. Pano bino, kimye kyonse wakinkile manungo mwi Yehoba. Mukupita kwa kimye watatwile kwiyowa mwingilo wa mu bujimi. Nga lelo jino uji pi? Nangwa kya kuba ukolwa-kolwa, ukiji mu kisemi kya Betele pa Brooklyn, kabiji uji mu Jibumba Jitangijila. Kechi wiumvwa bibi pa mambo a kukakachila mu jibumba ja Yehoba ne.
9 Nyenga umo uji mu kisemi kya Betele mu Britain wabatizwe saka aji na myaka ya kusemwa 13. Mwaka walondejilepo, watatwile bupainiya pamo na kolojanji wamulume, kabiji byo papichile mwaka mukwabo, bashanji bebataile pa kaleya na mambo a kukana kwitumpa mu bya bumulwila ntanda mu Nkondo ya kibiji ya Ntanda yonse. Wakinkile manungo mwi Yehoba kuba’mba amukoseshe kabiji watwajijile kwingijila Lesa wa kine. Mu kupita kwa kimye, wasongwelwe ku mulongo wakishinka, kabiji bonse babiji batwajijile kuba kyaswa muchima wa Yehoba. Pa nyuma ya kwikala mu masongola myaka 35, mwata wanji wafwile lufu lwa kubula nangwa kuketekelatu ne. Nangwatu pa kino kimye, Yehoba wamukoseshe kabiji watwajijila kumwingijila kufika ne lelo jino. Waketekela kutwajijila kwingila myaka ne myaka mu kisemi kya Yehoba kya pano pa ntanda.
10 Yehoba ukwasha ne kukosesha bakalume banji bakishinka. “Aye upana bulume ku batembuka, kabiji umukosesha awa wabula ngovu.” Twakonsha kwikala na buno bulume bwakila, kupichila mu kulamachila ku bino bintu bitanu na kimo bya ambiwapo. Vulukai’mba: “Aba bamupembelela Yehoba bakatambula bulume bupya; ... bakanyemanga ne kukoka ne; bakendaendangatu ne kupungila ne.” (Isa. 40:29-31) Paulo wakinkile bingi manungo mwi Yehoba kuba’mba amukoseshe, ne atweba twafwainwa kuba byonkabyo.