Telekeshainga
1 Muntu wafwainwa kufunda kutelekesha. Kimye abena, kuteleka wafwainwa kwikala na kilaka kya kukeba kufunda pa kuba’mba amwenemo mu byo abena kumvwa. Yesu kyo kyo akonkomwejilepo kuba’mba twafwainwa ‘kujimuka byo tumvwa.’—Luka 8:18.
2 Kikatakata kino kingila bingi pa kimye kyo tutanwa pa kupwila kwa kipwilo, kupwila kwa kijiiji ne pa kupwila kwa nkambi. Pa bino bimye po potwafwainwa kutelekesha. (Hebe. 2:1) Pano paji bishinka bimo byakonsha kwimukwasha kutelekesha pa kupwila kwa bwina Kilishitu.
◼ Nemekai kupwila. Kupwila jo jishinda jikatampe jo ‘etufunjishishamo Yehoba’ kupichila mwi “kalama wa kishinka.”—Isa. 54:13; Luka 12:42.
◼ Nengezhezhai jimo. Pitulukai mu byambo byo musakufunda, kabiji monai kuba’mba kechi mwalubako Baibolo wenu ne mabuku anakufunjiwamo ne.
◼ Kimye kyo muji pa kupwila, esekeshai na ngovu kuta muchima ku bibena kwambiwa. Kechi kyawama kwisamba na bomwatentakana nabo nangwa kutala-tala bibena kubiwa mu luonde ne. Esekai kubula kulabikwa na kulanguluka pa byo musakuba pa nyuma ya kupwila nangwa pa bintu bya kyenu kyenu.
◼ Languluka-langulukai pa bibena kwambiwa. Ishikishai’mba: ‘Nanchi kyo naumvwa kyandamata byepi? Kimye ka kyo nkekingijisha?’
◼ Nembaipo bishinka bimo bikatampe ne binembelo. Kino kikemukwasha kuta maana ku bibena kwambiwa, ne kwimukwasha kuvuluka bishinka bikatampe pa kuba’mba mukebingijishe kimye kikwabo.
3 Funjishai Baana Benu bya Kuteleka: Baana bafwainwa kufunda bya ku mupashi. (Mpitu. 31:12) Kala keene bantu ba Lesa “bonse bakonsheshe kumvwa,” batelekelenga Mizhilo byo yatangiwenga kwi abo. (Ne. 8:1-3) Umvwe bansemi sabatako maana ne kutelekesha kimye kyo bapwila, baana babo nabo bakoba byonkabyo. Kechi kyawama kusendela baana bya kukaisha nangwa mabuku muji bipikichala mwakwibalabikila ne. Kuya ku kyolonyi nako pa kubula ne kyo babena kuya nakubako, kwakonsha kwibalengela kukankalwa kuteleka. ‘Kukosama byo kukakachila mu muchima wa mwanyike,’ bansemi bafwainwa kukosapo pa kuba’mba baana babo bekale bulongo sa babena kuteleka pa kupwila.—Mana. 22:15.
4 Umvwe saka tutelekesha, tukamwesha patoka kuba’mba tuji na maana kabiji tusaka ‘kufunjilapo ne bikwabo.’—Mana. 1:5.