Kupwila Kukwasha Bakyanyike
1 Nsongwakazhi umo waambile’mba: “Kimye kimo ndanguluka kuba’mba bakyanyike baji na bwikalo bwashupa bingi. Twikala na bantu boba bulalelale, bengijisha bizhima, ne bitomi.” Nanchi nenuwa byo byo mulanguluka nyi? Umvwe ibyo, nanchi ñanyi mashinda o mubena kulanguluka kuba’mba akonsha kwimukwasha kulwisha bino byubilo byatama? Mwafwainwa kwikala na lwitabilo lwakosa mu mashinda aluñama a kwa Yehoba, mambo “pabula lwitabilo kechi kyakonsheka kumutokesha pa muchima ne.” (Hebe. 11:6) Kutanwa ku kupwila kukemukwasha kukosesha lwitabilo lwenu lwa Bwina Kilishitu ne lusako lwenu lwa kuchinuzhuka kuba byatama.
2 Mu Kupwila Mwakonsha Kufunjilamo Byavula: Kika kilengela kwiyowa kajo kawama na balunda nenu? Nanchi kechi kuwama kwa kajo ne kwikala pamo mu butekanye na balunda nenu ne nyi? Byonkabyo byo byo twiyowa ne kupwila kwetu, bino lwa ku mupashi.
3 Bintu bifunjiwa pa kupwila bitukomesha, kutendekela ku makatazho a mu bwikalo a kila juba kufikatu ne ku bungauzhi bwa mu Baibolo busangajika. Mikambizho yawama ipanyiwa, ayo yakonsha kwimufunjisha kwikala bwikalo bwawama ne kuyuka bya kupwisha makatazho o mufikilwa nao. Balunda netu batanwa ku kupwila bo bawama pano pa ntanda, ne bumupashi bwikala pa kupwila bukilapo kuwama kabiji bwituzhikijila. (Sala. 133:1) O ene mambo o aambijile wakyanyike umo’mba: “Kimye kyonse kyongya ku sukulu, bino bintu binkokesha bingi. Bino kupwila kuji nobe mpunzha kutanwa mema mu kiselebwa ko nkokolokela kuba’mba nkakonshe kuya ku sukulu juba jalondelapo.” Mukwabo wakyanyike waambile’mba: “Natana kuba’mba kulamankana pamo na bantu batemwa Yehoba kunkwasha kufwenya kwipi ne Yehoba.”
4 Kupichila mu kunembesha mu Sukulu ya Butumwa bwa Teokalasi, kulengela kuyuka bya kukeba byambo mu Baibolo, ne kwibibika mu bujashi, apa bino wi byamba mu jishinda ja kwisamba na jibumba mu Nzubo ya Bufumu. Aki langulukai pa kumwenamo kuji mu kufunjishiwa kwikala sendwe wa kufunjisha bukine buji mu Kyambo kya kwa Lesa! Nanchi kwepi ku kwabo bakyanyike ko bakonsha kutana luno lufunjisho lwanema bibye?
5 Byo Mwafwainwa Kuba pa Kuba’mba Mumwenemo mu Kupwila: Pa kuba’mba tumwenengamo mu kupwila, kuji bintu bisatu byanema byo twafwainwa kuba. Bino bintu bisatu ke kunengezhezha jimo, kukumbulapo, ne kwingijisha byo tubena kufunda.
6 Nengezhezhai jimo byo Mukafundanga pa Kupwila: Tanchikai kimye kya kunengezhezhamo byo mukafundanga pa kupwila. Kange muleke bya sukulu, nkito nangwa makayo kwimwangata kimye kyo mwakonsha kwingijisha pa kupituluka mu byambo bikafunjishiwa pa kupwila ne. Kikemukwasha bingi umvwe mwaikala na muteto wa kukokozhezha jimo kupwila. Kitanshi pa byonse, mwafwainwa kwendela pamo na mutanchi wa kutanga Baibolo wa kila mulungu wa mu Sukulu ya Butumwa bwa Teokalasi. Mwafwainwa kwikala na maminiti acheche kila mulungu a kutanga Baibolo ne kulanguluka-langulukapo pa byapitala byo mwatanga. Tanchikai kimye kya kunengezhezhamo jisambijilo ja Buku ne jisambijilo ja Ulupungu lwa kwa Kalinda. Bamo boba bino saka kukiji juba jimo nangwa abiji juba ja kupwila saka jikyangye kufika. Kabiji pa kimye kyakonsheka, nengezhezhai jimo mbaji yo mukafundangapo kimye kya Kupwila kwa Mwingilo kwa mu yewo mulungu.
7 Saka Mukumbulapo: Baibolo ishimuna’mba Yesu byo ajinga na myaka ya kusemwa 12, bamutaine mu nzubo ya Lesa, saomvwa bya ambiwenga, kwipuzha mepuzho ne kukumbulapo. (Lu. 2:46, 47) Mu ñambilo ikwabo, ko kuba’mba wivwangilemo bingi. Mukamwenamo bingi mu kupwila inge saka mukumbulapo.—Mana. 15:23.
8 Mwafwainwa kutesha muchima ku bibena kusambijiwa pa kupwila. Kimye kimo kwamba jashi kwapelako kukila kwijumvwa. Mambo ka? Mambo umvwe ñambi ubena kwamba kimye kimo twakonsha kutendeka kulanguluka bintu bingi. Nanchi luno lukatazho twakonsha kwilushinda byepi? Saka mu nembapo byambo bimo. Nembai bishinka byo mukeba kwingijisha pa nyuma ya kupwila. Kunemba byambo kukemukwasha kuta mana ku pologalamu. Kabiji mwafwainwa kuzhikula pa binembelo ne kulondela ñambi byo abena kutanga.
9 Mu kunungapo, imikai kikonkwanyi kya kuba’mba mwafwainwa kukumbulapo pa kila jashi ja misambo ne mepuzho pa kupwila. Mukamwenamo bingi umvwe ke mukumbule mu mawi a kyenu kyenu. Byambo bya Mana 15:28 bishimuna’mba: “Muchima wa waoloka ulanguluka mwa kukumbwila.”
10 Ingijishai byo Mubena Kufunda: Kyapelako ke kya kumona kuba’mba byo mwafunda bibena ‘kwingila mwi anweba.’ (1 Tesa. 2:13) Umvwe mwaingijisha bishinka byawama byo mufunda pa kila kupwila, mukafwenya kwipi ne Yehoba Lesa. Ukekala wa kine kine kwi anweba kabiji mukekala na lusekelo lukatampe ne kutondwa mukatondwa byo ‘mubena kwenda mu bukine,’ kulenga bukine kwikala ke bwenu.—3 Yoa. 4.
11 Balongo ne banyenga bakyanyike, umvwe saka munengezha mapologalamu a kupwila, kukumbulapo, ne kwingijisha byo mufunda, mu keyowanga kupwila. Kabiji pa kimye kimotu mukamwenangamo kya kine kine. Lwitabilo lwenu lukakosa kabiji mukatwajijila kwikala bakishinka kwi Shenu wa mwiulu, Yehoba.—Sala. 145:18.