“Byonse Byakonsheka kwi Lesa”
1 Kusapwila buluwe bwa Bufumu mwaya ntanda yonse ye mwingilo mukatampe mu kipwilo kya bwina Kilishitu. (Mat. 24:14) Uno ke mwingilo wanema bingi. Bavula balanguluka kuba’mba kwikala na bintu byakila pa byo tuji nabyo kyo kikebewa pa kwingila uno mwingilo. Bamo nabo bamona’mba kechi twakonsha kwingila uno mwingilo ne, mambo betwendeleka, kwitulengulula ne kwitumanyika. (Mat. 24:9; 2 Timo. 3:12) Betulengulula bashiinwa’mba uno mwingilo ke mwingilo umo wakatazha bingi. Nangwa byonkabyo, Yesu waambile’mba: “Byonse byakonsheka kwi Lesa.”—Mat. 19:26.
2 Bya Kumwenako Byawama Kulondela: Yesu watatwiletu bunke mwingilo wanji pano pa ntanda. Pa kuba’mba bamulekeshe kwingila umo mwingilo, bamulengulwilenga bamupunyikilenga kya kine kine, kabiji mu kupita kwa moba bamwipaile lufu lwa bumvu. Bino pa nyuma ya lufu lwanji, Yesu waambile na luketekelo’mba: “Amiwa nepashinda panopantanda.” (Yoa. 16:33) Kya kine waingijile mwingilo wawama!
3 Baana ba bwanga ba kwa Yesu nabo byo byo bachinchikile ne kubambakana mu mwingilo wa bwina Kilishitu. Bavula bebendelekelenga, kwibapuma, kwibataya mu kaleya ne kwibepaya. Bino nangwa kyajinga byonkabyo, ‘basekejilenga mambo a kutongolwa’mba, bo bafwainwa kwijimwena bumvu aja Jizhina.’ (Byu. 5:41) Kechi mambo na lumanamo ne, baingijile mwingilo wa kusapwila mambo awama wamwekele kubula kukonsheka kubiwa “monse mwapela ntanda.”—Byu. 1:8; Kolo. 1:23.
4 Byo Twakonsha Kwingila mu Moba etu a Lelo: Netuwa twabambakana bingi mu mwingilo umweka kubula kukonsheka wa kusapwila mambo a Bufumu. Nangwa kya kuba betukanya, betumanyika, kwitutaya mu tuleya ne kukeba kwitulekesha kusapwila, kechi tubwela pa nyuma ne. Kika kitulengela kutwajijila? ‘Kechi byubiwa na bulume ne, nangwa na ngovu ne, kana na Mupashi wami, byo byaamba Yehoba wa mabumba.’ (Zeka. 4:6) Kafwako kikemika mwingilo wetu ne, mambo Yehoba tuji nanji!—Loma 8:31.
5 Pa kusapwila, kechi twafwainwa kuchiina nangwa kwiumvwa babula kufwainwa ne. (2 Ko. 2:16,17) Tuji na luketekelo lukatampe lwa kutwajijila na kukumbanya mambo awama a Bufumu. Na bukwasho bwa Yehoba, tubena kwingila “bibula kukonsheka”!—Luka 18:27.