Kupwila kwa Nkambi kyo Kimye kya Lusekelo!
1 Kupwila kwa nkambi kwa Bakamonyi ba kwa Yehoba kyo kimye kya lusekelo. Myaka kukila 100 yapitapo, kuno kupwila kwalengela jibumba jetu kubailako bingi. Kutatula kimye kyo twajinga bacheche, twamona Yehoba byo abena kupesha mwingilo wetu wa ntanda yonse. Pa kupwila kwetu kwa nkambi kutanshi kwa mu ano moba a lelo kwajingako mu Chicago, Illinois, mu 1893, bantu 70 pa batainweko 360, babatizwe kumwesha kwipana kwabo kwi Yehoba. Kupwila kwa Nkambi kwajingako mwaka wapwa kuzhokoloka ntanda yonse kwa “Ba Kuba Kyambo kya kwa Lesa” bantu batainweko bajinga 9,454,055, kabiji babatizwe bajinga 129,367. Byo kitusangajikilepo!
2 Kufumatu kala keene kimye kyanembelwenga Baibolo kufika ne lelo jino, kupwila kyo kimye kiikajila bantu ba Lesa kyo bafunjilamo mizhilo ya Yehoba. Mu moba a kwa Ezela ne Nehemiya, bantu batelekelenga kimye buku wa mizhilo kyo atangiwenga “kufuma kumakya kufika ne pa kushinkimana juba.” (Ne. 8:2, 3) Pa kokwa kupwila, bantu bajinga na “lusekelo lukatampe” mambo baumvwishishe mizhilo. (Ne. 8:8, 12) Netuwa tusekela bingi mambo kupwila kwa nkambi jo jishuko jawama jakutambwilamo mizhilo ne kajo ka ku mupashi “pa kimye pafwainwa” kufuma kwi Yehoba kupichila mwi ‘kalume wa kishinka ne wa maana.’ (Mat. 24:45) Kupwila kwa nkambi kwanema bingi mu bwikalo bwetu bwa ku mupashi, ne Yesu kyo kyo aambijile kuba’mba muntu umwena bumi ku “byambo byonse bifuma mu kanwa ka Lesa.”—Mat. 4:4.
3 Kechi Tonaunatu Kimye Ne: Atweba bonse twafwainwa kwibikila kikonkwanyi kuba’mba tukatanweko ku Kupwila kwa Nkambi kwa uno mwaka kwa “Bafunjishi ba Mambo a Lesa.” Twafwainwa kwinengezha kuba’mba tukafikenga bukiji pa juba pa juba ne kwikala kufikila twaambako’mba “Amena!” ku lulombelo lwa kupezhako. Pa kuba’mba tukobenga byobyo kibena kukebewa kwikokozha bulongo. Kutambula lūsa ku nkito lwa kutanwa ku kupwila kwa nkambi kyakonsha kwitukatazha. Twafwainwa kukosapo, kechi kulubakotu byonkabyo’mba bakanswisha ne. Umvwe tubena kukeba mwa kulaala nangwa ñendelo, twafwainwa kwinengezhezha jimo. Kyonse kyo tukoba kechi tukonaunatu kimye ne!
4 Bantu ba kwa Yehoba kechi besakanya mfweto yo bekala nayo pa kutanwa ku kupwila kwa nkambi ku yoya ya mali ne. Umvwai byaubile bamo bakebeshe kuya na kutanwa ku kupwila kwa pakachi ka byalo kwa Bakamonyi ba kwa Yehoba kwa Divine Will (Kyaswa Muchima wa Lesa) kwajingako mu 1958 mu Muzhi wa New York. Mulongo umo washinkile kampanyi kanji ka buntungi pa milungu ibiji, ne kwipana wipaine kuya na kukwasha ne kutanwa ku kupwila. Mulongo wa pa Makuji a Virgin aye wapoteshe mpunzha yanji ya maeka atanu pa kubatu’mba ba mukisemi kyanji 6 bakatanweko. Bamulume ne mukazhi bakyanyike bapoteshe bwato bwabo buji na ingini pa kuba’mba bamwenemo mali a kusenda baana babo basatu, kutatwila pa uji na bañondo babiji kufika ku uji na myaka ya kusemwa 7. Balongo basatu basemwa mu jivumo jimo ku California bebabujile’mba inge basha nkito ne kuya na kutanwa ku kupwila, pa kubwela bakebapanga nkito. Nangwa byonkabyo, akyo kechi kibalengejile kupuswa ku kupwila kwanema ne.
5 Yehoba Upesha Mikoyo Yetu ya Kwingila na Ngovu: Yehoba umona ne kupesha mikoyo ya bantu banji bengila na ngovu. (Hebe. 6:10) Kya kumwenako, pa kupwila kwajingako kwa “Theocracy’s Increase Assembly” (Kupwila kwa Kukomenako kwa Teokalasi) mu 1950, batainweko baumvwine jashi jikatampe jajinga na mutwe wa kuba’mba “Bwikalo Bupya.” Mulongo Frederick Franz watundaikile bonse pa kwibepuzha amba: “Nanchi anweba bonse baji pa kuno kupwila kwa pakachi ka byalo kechi musakusekela pa kumvwa’mba pano ponka po tuji mabanga ano, mu luonde muji bakekala bitumbafumu mu ntanda ipya nenyi?” Pano pabapite myaka 50 kufuma kyokya kimye, ne luno tukiji na lusekelo lwa kulumbululwa bulongo kwa Masalamo 45:16.
6 Panyuma ya kutanwa ku kupwila kwa nkambi kwa mwaka wapwa, nsemi umo wamulume pa kusanta wanembele’mba: “Balongo, kechi mwakonsha kuyuka kuno kupwila byo kwakwasha bantu ne. Kisemi kyami kyavilukijile ku muzhi ungi kuya na kwingila nkito, bino kitubwezhele bingi mu nyuma ku mupashi... . Twalekele kuta muchima ku mwingilo wa bwina Kilishitu. Twalekele kupwila ne kusapwila... . Kuno kupwila kwitukosesha, kabiji tubena kwibikila bikonkwanyi bya ku mupashi ne kwinengezha kwibifikizha.”
7 Yehoba ubena kwitupa kajo ka ku mupashi kotukeba. Witwajila tebulu wa kajo kavula pa kupwila kwa nkambi. Kusanchila kano kajo kwafwainwa kwitulengela kwamba byaambile Koneleusa kimye kyo bamufwakashishe ku mutumwa Petelo amba: “Pano atweba bonsetu tuji kuno ku meso a Lesa, namba tumvwe byonse byo bemulaya kwi Nkambo.” (Byu. 10:33) Twayai twibikile kikonkwanyi kya kwikala “ku meso a Lesa” pa bipungu byonse bya kupwila kwa Nkambi kwa uno mwaka kwa “Bafunjishi ba Mambo a Lesa” ne kusekela!
[Kitenguluzha pa peja 2]
Kimye kya Kupwila
Juba Jitanshi ne ja Bubiji
8:45 hours – 16:00 hours
Juba ja Busatu
8:45 hours – 15:30 hours