Nanchi Munemeka Byazhila Nyi?

¹ Inge betwipuzha kana tunemeka byazhila nyi nangwa ine, bukiji-bukiji tukumbula’mba ee! Nanchi ñanyi bintu bimo byazhila bya kwa Lesa byo tunemeka?

² Byo tunemekapo bulunda bwa pa bunke bwetu bo tuji nabo ne Shetu wa mwiulu! Witubula kuba’mba umvwe ‘twafwenya kwipi ne aye, naye ukafwenya kwipi ne atweba.’ (Yako. 4:8) Kwakubula kitapisho kya nkuulo ya kwa Yesu Kilishitu, umvwe kafwako wakonsha kwikala na bumi bwa myaka ne myaka ne. (Yoa. 3:16) Na mambo a kusanta kwetu kwa bukishinka, mu milombelo yetu ya kila-juba tusanchila buno bupe bwanema bwa kwa Lesa.

³ Kyambo kyapuiwamo kya kwa Lesa, Baibolo Wazhila, nakyo kintu kyazhila kwi atweba, byonka byazhila jibumba ja kwa Yehoba ja pano pa ntanda. Tumwesha kuba’mba twatemwa bino bintu byafuma kwi Yehoba kupichila mu kwingijisha mafunde a mu Baibolo mu bwikalo bwetu, kukosesha mfungwa ya butemwe bwetu na balongo, kulondela mutanchi wa teokalatiki ne kwingijila pamo na babena kwitutangijila.—1 Pe. 1:22.

⁴ Tutambwila kajo ka ku mupashi kavula kupichila mwi kalume wa kishinka ne wa mana. Byo byo kikekala ne pa Kupwila kwa Nkambi kwa uno mwaka kwa “Ba Kuba Kyambo kya kwa Lesa.” Pa kuno kupwila tukatambwila mikambizho yanema bingi ne kwiyowa lumvwañano lwa biyampe lotubena kukeba pa kino kimye. Nanchi twakonsha kumwesha byepi munema na muchima yense ku bino bintu byazhila?

⁵ Kange Mubule Kuteshako Muchima ku Nzubo ya kwa Yehoba Ne: Nehemiya wakambizhe baingijile na ngovu mu kushimukulula bibumba bya Yelusalema kuba’mba ‘kechi bafwainwa kubula kuteshako muchima ku nzubo ya kwa Lesa wabo ne.’ (Ne. 10:39) “Nzubo” ya kwa Yehoba lelo jino lo lunengezho lwanji lwa kumupopwela. Kupwila kwetu kwa nkambi kuji mu luno lunengezho. Pa kubula kusula luno lunengezho, twafwainwa kutanwako ne kuteshako mana, kumwesha Yehoba kuba’mba tunemeka bingi bintu byo etupa. (Hebe. 10:24, 25) Ñanyi milanguluko yo twafwainwa kulangulukapo lonka luno pa kuba’mba tumweshe’mba tunemeka kino kyubilo kyazhila?

⁶ Tanwaiko Moba Onse Asatu: Atweba bonse twafwainwa kwinengezha kutanwa ku kupwila moba onse asatu. Nanchi mubena kulanguluka kufika bukiji kila-juba, kufikatu ne ku lulombelo lwa kupezhako pa juba ja busatu nyi? Umvwe ibyo, mukekala na mapesho avula. Kutanwa ku kupwila javula kechi kwapela ne. Pa kuba’mba mulombe kimye ku bakulumpe benu ba nkito yenu kikebewa kuchinchika. Kimo kimye ñendelo nayo yakonsha kwimushupa. Bino kechi mwafwainwa kuleka bino bintu kwimulefula kyakuba mwakankalwa kutanwa ku kupwila ne.

⁷ Langulukai pa Kino kya Kumwenako Kyawamisha: Mu kyalo kimo kya mu Africa muji malwañano, mwaka wapwa balongo bailenga ku kupwila kwa nkambi bataine kipanyi kya bashilikale mu jishinda. Bashilikale baipwizhe’mba: “Nanchi yenu bañanyi, kabiji mubena kuya pi?” Balongo bakumbwile’mba: “Twibakamonyi ba kwa Yehoba, kabiji tubena kuya ku kupwila kwa nkambi.” Mushilikale umo waambile’mba: “Anweba Bakamonyi ba kwa Yehoba kange muchine kiji kyonse ne. Yayinga, kabiji mu kapwilatu bulongo kwakubula lukatazho ne. Nangwa byonkabyo, yukai kuba’mba musakusambakana bashilikale bavula. Mwendelengatu pakachi ka mukwakwa! Umvwe mwamona bantu bakonkana pamo, anweba mutwajijile kwendelatu pakachi ka mukwakwa!” Baubile byonkabyo ne kufika bafikiletu bulongo ku kupwila. Bano balongo bafwetewe mambo bamwesheshe munema ku bintu byazhila.

⁸ Byonka byo kyajinga ku bano balongo, netuwa twikala na makatazho. Bino kwakubula nangwa kuzhinaukatu ne, twakonsha kupasha lwitabilo lwabo ne kutanwako ku kupwila kwa nkambi pa moba onse asatu. Umvwe pa bena kukebewa lupimpi, kinkai manungo mwi Yehoba kuba’mba emutangijile, ne kuyuka yukai kuba’mba ukapesha mikoyo yetu ya kutanwa ku pologalamu yonsetu.

⁹ Mukamwenamo: Tusaka Kyambo kya kwa Lesa mambo twayuka kuba’mba kiketukomesha kufika ne ku lupulukilo. (1 Pe. 2:2) Kutanwa ku kupwila kwa nkambi ne kuteleka ku pologalamu yonse kuketukwasha kwikala na lwitabilo lwakosa mu kino Kyambo kabiji tukekala na ngovu ya kushinda kulukuka kwa kwa Satana. Mu kuba byo byo, tukamwesha Yehoba ne betumona kuba’mba tunemeka byazhila ne kuba’mba “atweba kechi twi ba boba babwela mu nyuma [ne] ... twi ba boba baji na lwitabilo lwa kupulusha mweo.”—Hebe. 10:39; 12:16; Mana. 27:11.

¹⁰ Twafwainwa kuketekela kuba’mba Yehoba Lesa ukashinkula bipenze bya mwiulu ne kwitwitulwila mapesho a ku mupashi avula. (Mala. 3:10) Ibikilai kikonkwanyi kya kutanwa ku Kupwila kwa Nkambi kwa “Ba Kuba Kyambo kya kwa Lesa” kukatendeka pa kushinkulwa kwa pologalamu pa juba jitanshi lukelo kufika ku lulombelo lwa kupezhako ne kwamba “Amena!” wa kupezhako pa juba ja busatu mabanga. Mukasangala pa nyuma ya kumona kuba’mba mwafikizha kikonkwanyi kyenu!