Kupwila kwa Nkambi kwa Bakamonyi ba kwa Yehoba kwa “Kupokololwa Kujitu Pepi” kwa mu 2006
1. Bantu ba Lesa ba kukala bamwesheshe byepi lusanchilo lwabo lwa mpopwelo ya kine, kabiji jishuko ka jipashako jo tuji najo lelo jino?
1 Mfumu Hezekiya waingijishe baluwe kutwala makalata a kwita bantu kwiya na kupwila pamo mu Yelusalema. (2 Moba. 30:6, 13) Kukumbula kwakumbwijilemo bantu kwamwesheshe byo balangulukanga pa mpopwelo ya kine. (2 Moba. 30:10-12) Mu bañondo babena kwiya, bakalume ba kwa Yehoba ba mu ano moba bakekala na jishuko ja kumwesha lusanchilo lwabo lwa kupwila pamo na kupopwela Yehoba. Nkalata yatumwa ku kipwilo kyenu ya kwimwita kwiya na kutanwa ku Kupwila kwa Nkambi kwa “Kupokololwa Kujitu Pepi.” Musakubapo byepi pa luno lwito?
2. Twafwainwa kuba ka lonka luno pa kuba’mba tukamwenemo pakatampe mu kupwila kwa nkambi?
2 Tendekai Kwinengezha Lonka Luno: Pa kuba’mba tukamwenemo bulongo mu mutanchi wa ku mupashi ubena kunengezhiwa mu butemwe, twafwainwa kukatanwako ku majashi onse. Onkao mambo, nanchi, tendekai lonka luno kunengezhezha jimo pa kuba’mba mukatanweko anweba ne kisemi kyenu moba onse asatu. (Mana. 21:5) Kuno kwinengezha kwakonsha kuvwangamo kulomba moba ku bakulumpe benu ba nkito, kwisambila jimo na bena kwenu babula kwitabila, kunengezhezha jimo mazubo mwa kukafikila, ne kukwasha bafunda Baibolo kutanwako moba onse. Kechi mwafwainwa kupembelela’mba kana kwakishala moba acheche apa bino mukobe bino bintu ne. Lombai kwi Yehoba pa kino, kabiji ne kuketekela kuba’mba “aye ukekyuba.”—Sala. 37:5.
3. Ki ka kyaubiwa pa kuba’mba kipeleleko bantu kutanwa ku kupwila kukatampe?
3 Pa kuba’mba kipeleleko bantu kutanwa ku kupwila kukatampe, ofweshi wa musampi waipwizhe bipwilo kwiambila bine kwakonsha kwibapelela kutanwa ku kupwila kwa kijiiji ne kwa nkambi. Pa kupwila kwa mwingilo, basapwishi bonse babatizwa batainweko besajijile bene mpunzha kwa kupwila kukatampe kwakonsha kupelela kipwilo kyabo kupichila mu kusuntula maboko.—Lupu. 19:8.
4. Twakonsha kwikala byepi nsulo ya kutundaika balongo betu?
4 Mambo ka bamo o babujila kutanwako ku luno lunengezho lwanema lwa ku mupashi? Kimye kimo kilengela ke makatazho a mu bwikalo ne na mambo a mingilo ya ku mubiji. Bino, umvwe mulongo wa ku mubiji wikala kwalepa wabela nangwa wafwa bantu bavula bakonsha kwenda kuya na kutanwa ku kino kintu kya kupulumukila, kabiji kino kyakonsha kwibalengela kufuma pa nzubo pa milungu yavula. Bamo nabo baji na “kisonso” kya kupuswa ku kupwila kwa kipwilo, bapuswa ne ku luno lunengezho lwa Yehoba lwikalako pa mwaka pa mwaka. Kikebewa ke kwipana kabiji ne kwinengezha bulongo. Jibumba Jitangijila jisanchila bingi bantu bonse baji na muchima wa kwipana kuya na kutanwa ku kupwila kwa nkambi. Basapwishi baji na muchima wajingapo na Davida batundaika bingi bakwabo.—Sala. 122:1.
5. Nangwa kya kuba’mba bapita mu makatazho, bamo bamona byepi kupwila kwa nkambi kwa bantu ba kwa Yehoba?
5 Balongo betu bavula batalañanapo kala na makatazho pa kuba’mba batanwe ku kupwila kukatampe. Nangwa byonkabyo, bamona kupwila kwa bantu ba kwa Yehoba nobe kintu kyo bafwainwa kuba mu bwikalo bwabo kimye kyonse. Bamo bafwainwa kwenda musinso walepa pa kubatu amba batanwe ku kupwila kwa nkambi, nangwa byonkabyo kechi balangulukapo kupuswa ku kupwila kuji konse ne. Mukulumpe wa nkambi umo washimikizhe kuba’mba mulongo umo ne mwina kwanji ne baana babacheche babiji baendele musinso walepa makilomita 70 kuya na kutanwa ku kupwila kwa nkambi mu kibunji kya ku Kabeta ka Buyeke Muzhika. Baendele moba asatu. Jibumba jikwabo ja balongo ne banyenga jaendele nobe mulungu umo, kwenda musinso walepa makilomita 300. Bantu bakwabo nabo benda makilomita avula kabiji ne kwabuka bizhiba kimye kyabaya na mato pa kubatu amba batanwe ku kupwila kwa nkambi. Abano bonse balongo ne banyenga basangalala bingi kutanwako. Panyuma ya kupwila kwa nkambi, saka basangalala bingi kabiji ne kukoseshiwa ku mupashi, babwela ku mazubo abo kwingijisha jishinda jintutu jimo jo baishijilemo. Bavula, kino kyaikala ke kintu kyo boba pa mwaka pa mwaka!
6, 7. Aba baji na makatazho eikajila bakonsha kukwashiwa byepi?
6 Kukajilwa Pakatampe: Byambo bya Mana 3:27 byaamba’mba: “Abya bintu byawama byo wakonsha kuba, kechi uleke kwibobilabyo bantu bebifwainwa ne.” Mwakonsha kubila byepi byawama bakwenu kimye kya kupwila kwa nkambi? Basapwishi bakikulumpe, balwazhi, aba baji mu mwingilo wa kimye kyonse, ne bakwabotu kimye kimo bakonsha kukebewa kwibakwashako mu ñendelo nangwa mwa kulaala. Bakilongo bo baji na mutembo wa kukwasha bano bantu. (1 Timo. 5:4) Pano bino umvwe bakankalwa kwibakwasha, balongo ba mu lwitabilo bafwainwa kwibakwasha. (Nga. 6:10) Bakulumpe ba lufunjisho lwa buku bafwainwa kumona amba aba baji mu jibumba jabo baji na makatazho benengezhezha jimo kupwila kwa nkambi saka kukyangye kufika.
7 Mapepala a Kwipuzhizhapo Kibamba Mwa Kulaala akapanwatu ku basapwishi bakankalwa kutana mwa kulaala umvwe bakilongo nangwa kipwilo kyabo kyakankalwa kwibanengezhezha mwa kufikila. Kometi ya Mwingilo mu Kipwilo yafwainwa kupituluka mu byubilo bya yeo muntu kwingijisha mikambizho yanembwa pa uno pepala. Luno lunengezho ke lwa basapwishi bonkatu babula kaneneno pamo ne baana babo baji na byubilo byawama.
8. (a) Mambo ka o twafwainwa kutainwa ku kupwila kwa nkambi kwatongwelwa kipwilo kyetu? (b) Bintu ka byo mwafwainwa kuba umvwe kya kuba’mba bintu bya kupulumukila bimulengela kuba’mba mutanwe ku kupwila kwa nkambi ku mpunzha ingi?
8 Kuya na Kupwila ku Mpunzha Ingi: Pa kuba’mba kukekale mpunzha yabaya pa kwikala, mabuku avula, bibamba mwa kulaala, ne bikwabotu, basapwishi batundaikwa kutanwa ku kupwila kwa nkambi kipwilo kyabo ko kyatongwelwa kutanwa. Umvwe kya kuba’mba kuji bimo bikemulengela kuba’mba mukapwile ku mpunzha ingi, kabiji mukakebanga pa kufikila, mwane tumai pepala wenu wa Kwipuzhizhapo Kibamba ku babena kunengezha kupwila kwa nkambi ku yoyo mpunzha ko mukeba kuya na kupwila. (Monai mutanchi uji pa peja 5 ubena kumwesha moba aji mu ndonda a kupwila kwa nkambi kwa uno mwaka kukekela muno mu Zambia.) Umvwe mu yoyo mpunzha mukekala kupwila kwa nkambi kwavula, monai amba pa pepala mwanembapo mulaka ne moba akekelamo kupwila kwa nkambi ko mukatanwako.
9. Mambo ka a kwikela na kupwila kwa nkambi kwa kutuntulula mulaka wa kwamba na maboko pa kupwila kwatongolwa?
9 Mulaka wa Kwamba na Maboko: Byonka byo kyamweshiwa mu kabokoshi mwatanchikwa moba ne mapuzha a kupwila kwa nkambi kukekala muno mu Zambia, kutuntululwa kwa mulaka wa kwamba na maboko kukekalakotu pa kupwila kwa nkambi kubiji, Kitwe-Engilish (Chamboli) ne Lusaka-English (EC-03). KECHI KUKEKALAPO kupwila kwa mulaka wa kwamba na maboko pa kupwila kukwabo ne. Luno lunengezho lulengela kutuntulula bulongo kabiji ne kwikala na mabumba abaya a lusekelo, a kukomesha kupwanañena pamo. Bakulumpe mu kipwilo ne bantuntuluzhi ba mulaka wa kwamba na maboko bafwainwa kubula babibulu baji mu bipwilo byabo pa luno lunengezho kabiji ne kwibakwasha kwinengezha kutanwa ku kupwila kumo pa kukwe kupwila kubiji kwa nkambi, ako kukekala kutuntulula mutanchi wa kupwila mu mulaka wa kwamba na maboko. Bakulumpe mu kipwilo kabiji bafwainwa kushikisha babibulu bonse baji mu kipwilo kyabo umvwe babena kukebewa bukwasho.
10-12. Mapuso akonsha kuzhikijilwa byepi, kabiji bishinka ka byanema byo twafwainwa kulabijila?
10 Kwivimbila ku Mapuso: Jibumba ja Yehoba mu butemwe jituvululako pa kimye kyafwainwa pa mambo a kupwila kwa nkambi. Ke kya bulanda bingi kushimuna’mba pa mapunzha amo pekela kupwila kwa nkambi myaka ya kunyuma kwe, bamo batainweko bipe byabo byapile na mujilo wafwainwe kubula kwikalako. Kabiji bamo nabo bafwile mu mapuso a pa mukwakwa. Balongo bapewa mwingilo pa kupwila ne bansemi, bakambizhiwa kuteshako muchima ku bino bishinka pa kuba’mba kupwila kwetu kukekale kwa kwitukosesha ne kupwanañana kwawama, kechi kwa bulanda bwa mapuso aubiwa na mambo a muleele ne.
11 Kwakubula nangwa kuzhinaukatu ne, kilengela misakuta kupya pa kupwila kwa nkambi kechi kutekela kajo kwipi na misakuta ne, ke na mambo a kuleka baana sa bakaisha nangwa kumona mujilo. Onkao mambo, pa kuba’mba mwivimbile ku mujilo anweba bene ne balongo benu, kange muleke baana saka bapitañana bunke bwabo ne; kabiji kange mushile baana mema abena kuselauka’mba batalengamo, nangwa kwibasha amba bamonenga mu mpoto ne. Kimo kimye ku nzubo kampepo bengilatu bulongo, bino mpunzha ya kupwila ke ingi kabiji pakebewa kutako bingi muchima pa kuba’mba mwivimbile ku mapuso. Bantu bavula bekala pamo, kabiji ne baana nabo batemwa kukaya bisela inge baji na bakwabo banyike. Balabikwa bingi kabiji kechi bayuka byakonsha kuleta mapuso ne, onkao mambo kechi twafwainwa kwibashila tundulu, mankishi nangwa malampi ne. Lukatazho lukwabo lwikalako inge bansemi baya na kupwila ne kusha baana bunke mu misakuta kwakubula wa kwibasopa. Baana bafwainwa kwikala pamo na bansemi babo kimye kya kupwila. Inge baasha bamona baana sa bapitañana bunke kwakubula wa kwibasopa, bafwainwa kwibabwezha kuji bansemi babo. Twasasapo anweba bansemi, kwatankenai pamo na bapewa mingilo pa kupwila, mu jino jishinda tumwesha ‘butemwe ku balongo bonse.’—1 Pe. 2:17.
12 Bipwilo bimo bikeba myotoka ya kwibatwala ku mapunzha a kupwila kwa nkambi. Motoka uji yense ubena kutwala bantu ku kupwila kwa nkambi wafwainwa kwikala wawama, waswishiwa kwenda pa mukwakwa. Myotoka kechi yafwainwa kusenda bantu bavula kukila pa kipimo ne. Kyawama kutongolapo mulongo umo wafwainwa kwikala kapitao wa kunengezha bya ñendelo. Ukabula jibumba bya lwendo, juba ne kimye kya kunyamuka apa kabiji ne pa mpunzha po bakapatamina. Umvwe jibumba jaikala na makatazho aji onse, kapitao wafwainwa kuyuka kino pa kuba’mba ebabule bya kuba. Umvwe kyatanyiwa’mba pabena kukebewa bukwasho, kufundañana, nangwa jishinda mwa kupwishisha lukatazho lumo, balongo bafwainwa, bakakonsha kwingijilapo.
13. Jishinda ka jimo jo twakonsha kuletelamo lusekelo ku kupwila kwa nkambi kubena kwiya?
13 Ba Mwingilo ba Kwitemenwa: Kechi kya kuzhinauka kuba’mba lusekelo lukatampe lukeya ku bonse bakatanwako ku kupwila kwa nkambi ne kumwenamo mu kuja kajo ka ku mupashi kabiji ne jishuko ja kukomesha kupwanañena pamo ne. Tukekala na lusekelo lukatampe umvwe twipana kukwasha mu kwingilako mingilo ya kukwasha kupwila kwa nkambi kwenda bulongo. (Byubilo 20:35) Makometi a Kupwila kwa Nkambi kwa koko kwenu bukumotu atendeke kwita ba kwiya na kwibakwashako kwingila mingilo. Abya mukepana kwingilako nyi?—Sala. 110:3.
14. Bintu ka byo musanchila kupwila kwa nkambi kwikalako pa mwaka pa mwaka, kabiji ki ka kyo mwafwainwa kukebesha kuba?
14 Kimye kya kutanwa ku kupwila kwa nkambi, kalombwana umo wa myaka ya kusemwa itanu waambile’mba: “Kupwila kwa nkambi ke lubaji lwami lumo lo natemwa lwa kupopwelamo Yehoba.” Bino byambo bya lusanchilo bitukwasha atweba bonse kulanguluka pa lusekelo lufuma mu kutanwa ku kupwila kwetu kwa nkambi kwa pa mwaka pa mwaka. Ee, kijitu byonka byaambile nyimbi wa masalamo amba: “Juba jimotu ja mu bipango byenu jakila mu kuwama kiumbi kya mobatu akwabo.” (Sala. 84:10) Davida wamwesheshe kukebesha kwanji kwa ‘kwikala mu nzubo ya Yehoba moba onse a mweo wanji pa kuba’mba amonenga buya bwa nzubo ya Yehoba.’ (Sala. 27:4) Kyamusangajikanga bingi Davida pa kwikala mu bapopweshi ba Yehoba. Twayai tulondelenga kya kumwenako kyanji kya kunemeka mpopwelo ya kine kupichila mu kutanwako moba onse asatu a Kupwila kwa Nkambi kwa “Kupokololwa Kujitu Pepi.”
[Kitenguluzha pa peja 3]
Bimye bya Kupwila
Juba Jitanshi ne ja Bubiji
8:45 hrs. - 16:05 hrs.
Juba ja Busatu
8:45 hrs. - 15:25 hrs.