Kupwila Kwankambi kwa Bakamonyi bakwa Yehoba kwa “Bamukoyo Wakutaya Mbila ya Bufumu” kwa mu 2002
1 “Nasekejile byo bañambijile’mba, Tuyenga ku nzubo ya Yehoba.” (Sala. 122:1) Kulanguluka pabyaambile nyimbi wamasalamo, monai (1) byoeumvwine kimye kyobamwambijile kuya nakupopwela Yehoba, (2) balunda nanji bawama boajinga nabo, batemenwe bupopweshi bwakine, ne (3) kulanguluka kobalangulukishepo kumwita kuba’mba, bapwile pamo, nekwimana lwendo lwakuya kunzubo ya Lesa.
2 Nanchi byambo byanyimbi wamasalamo kuba bitusangajika umvwe twaumvwa’mba lunengezho lubena kukokozhewa lwakupwila kwetu kwankambi kukwabo nenyi? Tuyukila jimo byokikekala umvwe twavuluka lusekelo lotwajinga nalo pakupwila kwankambi kwajingako kala kabiji neluketekelo lotwikala nalo jibiji lwakukapwila pamo nabakwetu batemwa Yehoba. Lunengezho lwanengezhewa kala lwa Kupwila Kwankambi kwamoba asatu kwa “Bamukoyo Wakutaya Mbila ya Bufumu” kukekalako mwaya Zambia yense mu 2002. Kino kyokimye kyakutendeka kwinengezhezha jimo kuba’mba tukatanweko nakuja byavula kukijiilo kyakumupashi kibena kwitupembelela.
3 ‘Kalama wa kishinka ne wa maana,’ wanengezha kajo kakumupashi kapakimye kyafwainwa kakapanyiwa pakupwila kwankambi. (Luka 12:42) Bijiiji byonse kimo kimo bebyabenya kuya nakutanwa kukupwila kwankambi kobebitongwela pakuba’mba kukabulenga kwishindaika namambo akuvujisha kwabantu. Pano bino, umvwe namambo abintu bimo mukeba kuya nakukatanwa kukupwila kukwabo kwabula kutongwelwa kijiiji kyenu kabiji kemukebe mwakulaala, munembeshi mukipwilo kyenu wafwainwa kuoda pepala ya Room Request form kuofweshi yamusampi, yomwafwainwa kunemba nekwiipana ku Kometi ya Mwingilo Mukipwilo. Kunungapo, balongo bavula batatula kunengezha madipatimenti apusana-pusana akupwila kwankambi kuba’mba ‘bintu byonse bikobiwe na mushingi ne mo byalondakena.’ (1 Ko. 14:40) Bintu byavula byobyanengezhewa kala kuba’mba kiketuwamine pakimye kyafwainwa, nanchi twafwainwa kuba byepi atweba bonse pamuntu pamuntu kuba’mba tunengezhe kupwila kwankambi?
4 Inengezhai Lonka Luno Kuba’mba Mukatanweko Moba Onse Asatu: Abya mukeba kutambula lūsa kubakulumpe benu bankito kuba’mba mukatanweko moba onse akupwilanyi? Yehoba wayuka’mba bakulumpe bankito bamo “bashinta.” (1 Pe. 2:18) Pano bino kupwila kwetu kwankambi kwanema bingi, kabiji tubena kukeba kwibikishako kuba’mba tukatanwe kumajashi onse. Mubulai Yehoba mululombelo lukatazho lwauno mutundu, kuba’mba emutangijile mukatanweko.—Ne. 2:4.
5 Lunengezho Lwamwakulaala: Javula balongo benengezhezha bene kuba’mba bakekalenga nabalongo nangwa balunda nabo baji mumapunzha mwaikela kupwila. Mumapunzha amumizhi, balongo batunga misakuta, nangwa kulaala mumadomitale atunga balongo bepana kwingila pakoko kupwila. Pakupwila kwankambi kumo bengijisha bibamba byasukulu kuba’mba aba bonse bakeyanga nakupwila bakafikilemo. Inge bemutambwila kubalongo bamukipwilo nangwa bakumubiji, kechi kyawama kulanguluka’mba pano twashukwa twakwata nepanshi tukekaleko netumoba tukwabo panyuma yakupwila kuba’mba tukakokolokekone. Abino bibamba kemwakulaalatu kimye kyomubena kupwila kwapwa. Aba bobatambwila bafwainwa kumona kuba’mba abo nebaana babo pamo bapana mushingi kubena nzubo kabiji kechi bafwainwa konauna nangwa kutendeka kupalanguzha mubipe nangwa kufika kubibamba bikwabo byanzubo kobabula kwibetabizhane. Umvwe bene bena mazubo batana lukatazho namambo akino, kyawama bukiji-bukiji kuya nakubula balongo babena kwingijila ku Dipatimenti ibena kunengezha Bibamba mwakulaala baiya nakupwila, kabiji bano balongo bakemukwasha.
6 Nangwa kyakuba aba bakebewa bukwasho bakwashiwa kubalongo babo babwina Kilishitu, bakulumpe mukipwilo nebakwabotu monka mukipwilo bayuka luno lukatazho bakonsha kwibanengezhezhako bukwasho. (1 Timo. 5:4) Umvwe mapepala a Room Request beapana ku Kometi ya Mwingilo mu Kipwilo, kometi saka ikyangye kupana ano mapepala ku Dipatimenti ibena kunengezha Bibamba mwakulaala baiya nakupwila, yafwainwa kupituluka mumapepala onse. Munembeshi mukipwilo wafwainwa kunembapo nambala yanji yalamya paano mapepala pakuba’mba umvwe kwaikalako bimo bibena kukebewa, bamu Dipatimenti ibena kunengezha Bibamba mwakulaala baiya nakupwila bakonsha kwisamba nanji bukiji-bukiji.
7 Monai Baji Mukipwilo: Umvwe twayukapo mulongo nangwa nyenga uji nalukatazho lwakumubiji lwakonsha kumulengela kubula kutanwa kukupwila kwankambi, abya twakonsha ‘kubaisha michima yetu’ mubutemwe nekumukwashanyi? (2 Ko. 6:12, 13; Mpitu. 15:7) Bino byobyubilo, Paulo byoatundaikilepo mu 2 Kolinda 8:14. Nga mamboka akubula kwichilako bantu bauno mutundu kuyila nabo pamo kukupwila kwankambi, nangwa kwibalipililako mali kumotoka? Umvwe bapainiya, apo kampe baji nabyavula byobapitamo byawama byobakonsha kwimushimikilako kimye kyomuji palwendo. Umvwe bakikulumpe mukipwilo, apo bajipo namajashi amo awama amubwikalo bwabo bwakunyuma bwa teokalasi omukyangye kumvwapo kala. Nanchi kupwañena pamo nabano balongo nebanyenga kuba kwimukwasha anweba nekisemi kyenu pamo nenyi? Bakemusanchila bingi pamuchima wenu wabumpanyi yemuji nanji kabiji Yehoba ukemufweta.—Mana. 28:27; Mat. 10:42.
8 Ipanai Kwingilako Mwingilo Wakwitemenwa: Kimye kyakupwila kwankambi, balongo bavula bepana kukwasha muma dipatimenti apusana-pusana. Baasha bengijila muluonde nepa mpunzha yakwimikilapo myotoka betubula pakwikala kabiji bobasopa myotoka nemakinga etu kimye kyamute. Dipatimenti ya Butooto iji namwingilo wakusunga nkuwa yabutooto yotwayukanyikwa nayo. Bamona kuba’mba mpunzha yetu pakupwila yashala yabutooto kukila nebyotwiitaine. Abya twakonsha kukwasha muano madipatimenti nangwa akwabotu abena kukebewa bukwashonyi? Nanchi mukepana kuba’mba mukengileko “na muchima umotu” nabalongo benunyi?—Zefwa. 3:9.
9 Kwivimbila Kumapuso: Jibumba ja Yehoba mubutemwe jituvululako pakimye kyafwainwa pamambo akupwila kwankambi. Kekyabulanda bingi kuba’mba pakupwila kwankambi kumo kwajingako mumyaka yakunyumakwe, bamo batainweko kukuno kupwila, bipe byabo byapile namujilo wafwainwe kubula kwikalako. Mumapuso amyotoka namo mwafwile bantu. Balongo baji nauno mwingilo nebansemi, balombwa kutesha muchima kubino bishinka pakuba’mba kupwila kwetu kukekale kwakukoseshañana nekupwañena pamo kwawama, kechi kwakuleta bulanda namambo akubula kutako maana kulengela mapusone.
10 Kwakubula nangwa kuzhinaukatune, kilengela mujilo kwambuka pakupwila kwankambi kechi kuteka kajo kwipi namisakutane, bino kilengela kekusha baana bunke sabakaisha mujilo nangwa kwibasha kukyoto. Onkao mambo, pakuba’mba mwivimbile anweba bene nebalongo benu pamo, kechi mwafwainwa kuswisha baana babacheche nakwendauka bunkene; kabiji kechi mwafwainwa kwibashila mema abena kuselauka, nangwa kwibasha amba bamonenga mumpotone. Nangwa kyakuba kunzubo bengilatu bulongo, mpunzha pakupwila keingi kabiji pakebewa kutako bingi muchima pakuba’mba mwivimbile kumapuso. Bantu bavula inge baikala pamo, banyike batemwa bingi kukaya bisela nabakwabo. Balabikwa bingi bukiji-bukiji kabiji kechi bamwena jimo byakonsha kuleta mapusone. Onkao mambo kechi twafwainwa kwibashila tundulu, mankishi nangwa malampine. Lukatazho lukwabo lwikalapo umvwe bansemi baya nakupwila kimye kyamute nekusha banyike babacheche bunke mumisakuta. Banyike bafwainwa kwikala pamo nabansemi yabo kimye kyakupwila. Umvwe baasha bamona banyike babacheche sabendauka bunke, bafwainwa kwibabwezha paikala bansemi yabo. Twasansapo, bansemi kwatankanai pamo nabaasha pakuno kupwila kabiji kino kikamwesha ‘butemwe kubalongo bonse.’—1 Pe. 2: 17.
11 Bipwilo bimo bibukiña myotoka yakwibatwala nakupwila. Motoka uji yense ubena kutwala bantu nakupwila wafwainwa kwikala wakosa bulongo kechi kisasane. Myotoka kechi yafwainwa kusenda bantu bavula kukila pakipimone. Kyawama kwikala namulongo wayuka bulongo bintu, kwikala kapitao wakunengezha byalwendo. Yeukabulanga bonse bakaya lwendo byoluji, kimye nempunzha pobakebasendelanga. Lukatazho lonse luji nabobo babena kuya lwafwainwa kutwalwa kwikapitao usakwibabula byakuba. Umvwe pabena kukebewa bukwasho, kufundañana, nangwa kumona mwakubila nalukatazho lumo, balongo bafwainwa bakonsha kupwisha lolo lukatazho.
12 Abya Kine Bantu Bamona Byotubanyi? Kimye kyakupwila kwankambi kwajingako mwaka wapwa, mwanamulume umo walekele kufunda na Bakamonyi bakwa Yehoba kukila pamyaka 20 yapita waingijilenga muhotela. Walondolwejilepo Bakamonyi bamo kuba’mba pano ubena kukeba kutatula jibiji kufunda Baibolo nekuyanga nakupwila. Mamboka? Mambo abyubilo byawama byamubijile Bakamonyi moba obaikele muhotela.
13 Mwanamulume umo mupoteshi wabujile balongo betu’mba: “Mwibantu bawama bingi ... . Bantu benu batekanya bingi kabiji baji namushingi.” Akino kintu byokisangajikapo Shetu wamwiulu byoetumona satulondela lujimuno lwakwa Yesu lwakuba’mba: “Kyeya kyenu kimweke ku meso a bantu; bamone mingilo yenu yawama, ne kumutumbijika Shenu uji mwiulu”!—Mat. 5: 16.
14 Twayai twikale namuchima wajingapo na Mfumu Davida, awo wapembelejilenga nalusekelo kuya kunzubo yakupopwelamo Yehoba. Kupwila kwetu kwankambi yonsulo yanema iji nakajo kakumupashi kabiji jojishuko jibula kumweka mweka jakupwañena pamo mubutemwe. Onkao mambo, tubena kwimutundaika nalusekelo kutatwilako jimo kwinengezha kuba’mba mukatanweko kubipungu byonse byamoba asatu a Kupwila Kwankambi kwa “Bamukoyo Wakutaya Mbila ya Bufumu”!
MONAI’MBA: Banembeshi mubipwilo byonse, bobasakumonanga mingilo yonse yalamata kukupwila kwankambi nekwikutentemesha. Umvwe munembeshi ufwapo, mukulumpe mukwabo mukipwilo wayuka byakwingila bulongo yewafwainwa kwingila inomingilo. Munembeshi wafwainwa kupituluka bukiji-bukiji mumikambizho yonse yapanyiwa mumakalata afuma kubabena kutala pakupwila kwankambi pamambo amingilo nabiji yakumona mwakulaala, mingilo yakwitemenwa, neyoya yubiwa kupwila saka kukyangye kwikalako neya panyuma yakupwila. Mwafwainwa kushako kimye kyafwainwa pakupwila kuba’mba munembeshi atange (KECHI kwambatu kyalubilone) nekulumbulula makalata onse akupwila kwankambi. Bakulumpe bonse mukipwilo, kikatakata munembeshi, wafwainwa kuyuka lunengezho lwakupwila kwankambi lwanembwa mumakalata nemu Mwingilo Wetu wa Bufumu.
Bimye Byakupwila
Juba Jitanshi ne Jabubiji
8:45 hrs. - 16:30 hrs.
Juba Jabusatu
8:45 hrs. - 16:00 hrs.