Kupwila kwa Nkambi kwa Bakamonyi ba kwa Yehoba kwa “Endainga na Lesa” kwa mu 2004
1 Ki ka kilengela kupwila kwetu kwa nkambi kwa pa mwaka pa mwaka kwimuwamina? Nanchi majashi akoseshañana ne kifwanyikizho bitunengezhezha ‘kalume wa kishinka ne wa maana’ nyi? (Mat. 24:45-47) Abya mabuku akatataka muji kajo kawama ka ku mupashi ka pa kimye pafwainwa nyi? Inyi balongo ne banyenga bamba pa Baibolo byo yapimpula bumi bwabo? Nanchi masawakya amba pa mwingilo wa kusapwila Bufumu byo abena kuyilako palutwe mu byalo bikwabo nyi? Inyi kupwañena pamo na bakwetu ba mu lwitabilo ba jifumbi jiji jonse nyi? Ee kine, tutengela kwilemena bingi bino bintu ne bikwabotu bikekalako pa kupwila kwetu kwa nkambi!
2 Tanwaiko Moba Onse Asatu: Kupichila mwi Mosesa, Yehoba wakambizhe’mba: “Mukebakonkanye bantu ... namba bakomvwenga ne kufunda.” (Mpitu. 31:12) Kupichila mwi kalume wa kishinka ne wa maana, Yehoba wanengezha pologalamu wawama wa kwitufunjisha pa juba pa juba pa kupwila kwetu kwa nkambi. Byo abena kwitufunjisha kuba’mba ‘tumwenemo byawama,’ twakebesha kutanwako ku mafunjisho anji onse. (Isa. 48:17) Umvwe kibena kukebewa kulomba moba ku bakulumpe benu ba nkito, patanshi lombai kwi Yehoba apa bino mutambule lūsa ku mukulumpe wenu wa nkito, kulonda kya kumwenako kya kwa Nehemiya kya kuchinchika. (Neh. 1:11; 2:4) Kabiji kyakonsha kuwama bingi kwibabulako ba mu kisemi kyenu babula kwitabila pa mambo a byo mwanengezha lunengezho lwenu saka kukiji kimye.
3 Lunengezho lwa mwa Kulaala: Javula balongo benengezhezha bene kwikala na balongo babo nangwa balunda nabo baji ku bwipi na mpunzha kwaikela kupwila. Mu mapunzha a ku mizhi balongo batunga tumisakuta nangwa kulaala mu madomitale atungwa na balongo bepana kwingila pa koko kupwila. Pa kupwila kwa nkambi kumo kumo bengijisha bibamba mulaala baana ba sukulu kuba’mba mulalenga bamo baiya na kupwila. Umvwe balongo ba ku mupashi nangwa balongo benu ba ku mubiji bo bemutambwila kwikala nabo, kechi kyawama kulanguluka’mba pano twashukwa betutambwila bulongo tunungeko ne tumoba twa kukokolokelako panyuma ya kupwila ne. Abino bibamba ke mwakulaalatu pa moba a kupwila kwapwa. Babena kusungwa mu ano mazubo bafwainwa kumona’mba abo pamo ne baana babo banemeka nzubo ya muntu wibatambwila, kabiji kechi bafwainwa kwikala na kisuse kya bintu nangwa kupalanguzha mu bipe nangwa kutwela ku bibamba bikwabo byo babula kwibaswisha ne. Umvwe bena mazubo batana makatazho a uno mutundu, bukiji bukiji bafwainwa kubuula balongo ku Dipatimenti Inengezha Bibamba Mwa Kulaala baiya na kupwila, kabiji balongo bakatemwa bingi kwimukwasha.
4 Kukajilwa Pakatampe: Mutumwa Paulo wavulwileko kipwilo kya mu Ngalatiya ‘kubila bantu bonse byawama, pakuba bene bene bonka [bakwabo] ba mu lwitabilo.’ (Nga. 6:10) Balongo ne banyenga bakikulumpe, balwazhi, bansemi babula bena kwabo nangwa boba baji mu mwingilo wa kimye kyonse, kimo kimye kechi bakonsha kwimulomba kuba’mba mwibakwasheko ne, pano bino bakonsha kwikala na makatazho pa kubatu’mba batanwe ku kupwila kwa nkambi. Abya mwakonsha ‘kwibobila byawama’ ne kwibakwashako nyi? Balongo babo ba bwina Kilishitu ne bakulumpe mu kipwilo kikatakata bakonsha kulabijila bwikalo bwa bantu ba uno mutundu.
5 Umvwe musapwishi wapana pepala wa Kushikisha Kibamba, Kometi ya Mwingilo mu Kipwilo ikapitulukamo kulondela mikambizho yanembwa mu ino pepala. Bafwainwa kutalatala bulongo ne kuyuka umvwe luno lubaji lwakonsha kwingijiwa ponka pa kipwilo kyabo. Luno lunengezho ke lwa basapwishitu babula kaneneno pamo ne baana babo beshingika bulongo. Umvwe Dipatimenti Inengezha Bibamba Mwa Kulaala yaikala na mepuzho aji onse, ikashikisha munembeshi mu kipwilo.
6 Kuya na Kupwila ku Mpunzha Ingi: Kimye kimo na mambo a bintu bimo biyako, byakonsha kwimulengela kuya na kutanwa ku kupwila ku mpunzha ingi. Umvwe mubena kukeba kuyuka juba jikekelamo kupwila kwa nkambi ko mukeba kuya, mwane monai mutanchi uji pa peja 5 ubena kumwesha moba aji mu ndonda a kupwila kwa nkambi kwa uno mwaka kukekela muno mwetu mu Zambia. Tumai pepala wenu wa Kushikisha Kibamba ku babena kunengezha kupwila kwa nkambi ku yoyo mpunzha ko mukeba kuya na kupwila. Umvwe kupwila kwa nkambi kubiji nangwa kukilapo kwaikela mu muzhi umo, monai’mba pa pepala mwanembapo moba ne mulaka ukengijishiwa ku kupwila kwa nkambi ko mukeba kutanwa.
7 Kwivimbila ku Mapuso: Jibumba ja Yehoba mu butemwe jituvululako pa kimye kyafwainwa pa mambo a kupwila kwa nkambi. Ke kya bulanda bingi kushimuna’mba pa kupwila kumo kumo myaka ya kunyuma kwe, bamo batainweko bipe byabo byapijilemo na mambo a kubula kutako muchima. Kabiji bamo nabo bafwile mu mapuso apa mukwakwa. Balongo bapewa mwingilo pa kupwila ne bansemi, bakambizhiwa kuteshako muchima ku bino bishinka pa kuba’mba kupwila kwetu kukekale kwa kwitukosesha ne kupwanañana kwawama, kechi kwa kufumamo bulanda na mambo a muleele uleta mapuso ne.
8 Kwakubula nangwa kuzhinaukatu ne, kilengela misakuta kupya pa kupwila kwa nkambi kechi kutekelatu kajo kwipi na musakuta ne, kilengela kino ke kulekelela baana sabakaisha mujilo. Onkao mambo, pa kuba’mba mwivimbile ku mujilo anweba bene ne balongo benu, kange muleke baana saka bapitañana bunke ne; kabiji kange mushile baana mema abena kuselauka’mba batalengamo, nangwa kwibasha amba bamonenga mu mpoto ne. Kimo kimye ku nzubo kampepo bengilatu bulongo, bino mpunzha pa kupwila ke ingi kabiji pakebewa kutako bingi muchima pa kuba’mba mwivimbile ku mapuso. Bantu bavula bekala pamo, kabiji ne baana nabo batemwa kukaya bisela inge baji na bakwabo banyike. Balabikwa bingi bukiji bukiji kabiji kechi bamwena jimo byakonsha kuleta mapuso ne, onkao mambo kechi twafwainwa kwibashila tundulu, mankishi nangwa malampi ne. Lukatazho lukwabo lwikalako inge bansemi baya na kupwila kimye kya mute ne kusha baana bunke mu misakuta kwakubula wa kwibasopa. Baana bafwainwa kwikala pamo na bansemi yabo kimye kya kupwila. Inge baasha bamona baana sabapitañana bunke kwakubula wa kwibasopa, bafwainwa kwibabwezha kuji bansemi yabo. Twasansapo anweba bansemi kwatankanai pamo na bapewa mingilo pa kupwila, mu jino jishinda tumwesha ‘butemwe ku balongo [bonse, NW].’—1 Pe. 2:17.
9 Bipwilo bimo bikeba myotoka ya kwibatwala ku ma mpunzha a kupwila. Motoka uji yense ubena kutwala bantu ku kupwila kwa nkambi wafwainwa kwikala wawama, waswishiwa kwenda pa mukwakwa. Myotoka kechi yafwainwa kusenda bantu bavula kukila pa kipimo ne. Kyawama kutongolapo mulongo umo wafwainwa kwikala kapitao wa kunengezha bya ñendelo. Ukabuula jibumba pa bya lwendo, juba ne kimye kya kunyamuka apa kabiji ne pa mpunzha po bakapatamina. Umvwe jibumba jaikala na makatazho aji onse, kapitao wafwainwa kuyuka kino pa kuba’mba ebabule bya kuba. Umvwe kyatanyiwa’mba pa bena kukebewa bukwasho, kufundañana nangwa jishinda mwakupwishila lukatazho lumo, balongo bafwainwa, bakakonsha kwingijilapo.
10 Pa kupwila kwa nkambi kwa bantu ba Yehoba kwaikeleko pepi na myaka 2,500 yapitapo, Ezela ne balunda nanji bena Levi, batangile Byambo bya Lesa ne kwibilumbulula ku luonde. Ki ka kyafuminemo? Nehemiya 8:12 witubula’mba, “bantu bonse bayile na ... kuba lusekelo lukatampe mambo baumvwishishe byambo byo bebambijile.” Abya kechi tusanchila jibumba ja kalume washingwa, pamo nobe Ezela ne bena Levi, byo bengijisha Byambo bya Lesa, kwibilumbulula, ne kwitumwesha byo twakonsha kwibingijisha mu bwikalo bwetu ne nyi? Mu kuba bino, uno kalume umwesha Yehoba byo atemwa bantu Banji bonse ne byoebata muchima. Ibikilai kikonkwanyi kya kuba’mba kechi mukapuswako juba nangwa jimotu ku Kupwila kwa Nkambi kwa “Endainga na Lesa” ne!
YUKAI’MBA: Munembeshi yense mu kipwilo kimo kimo usakukatangijila mingilo yonse yalamata ku kupwila kwa nkambi ne kwikutentemesha. Umvwe munembeshi ufwapo, mukulumpe mukwabo wafikapo mu kipwilo wafwainwa kutangijila ino mingilo. Munembeshi wafwainwa kupitamo bukiji bukiji mu mikambizho yonse iji mu makalata afuma ku babena kunengezha kupwila kwa nkambi abena kwamba pa bya bibamba mwa kulaala, nkito ya kwifuukwila, ne lunengezho lwa mingilo yubiwa kupwila saka kukyangye kutendeka ne panyuma ya kupwila. Pafwainwa kwikalako kimye kyabaya pa kupwila kuba’mba munembeshi atange bulongo (KECHI kwambatu lubilo ne) ne kulumbulula makalata onse a kupwila kwa nkambi. Bakulumpe bonse mu kipwilo, kikatakata munembeshi, bafwainwa kuyuka lunengezho lonse lwa kupwila kwa nkambi lwanembwa mu makalata ne mu Mwingilo Wetu wa Bufumu.
Bimye bya Kupwila
Juba Jitanshi ne ja Bubiji
8:45 hrs. - 16:10 hrs.
Juba ja Busatu
8:45 hrs. - 15:05 hrs.