Kupwila kwa Nkambi kwa Bakamonyi Bakwa Yehoba kwa “Pai Lesa Lukumo” kwa mu 2003

¹ Yehoba wakambizhe kupichila mwi ngauzhi wanji wakishinka Isaya kuba’mba: “Teshai michima ko nji amiwa anweba bantu bami, umbikai matwi kwi amiwa, anweba ba mu mukoka wami.” (Isa. 51:4) Mu kino kimye kya kupelako kibena kuyatu na kukatazha, nanchi kechi twaswa kuba’mba kutesha muchima ku mikambizho ya Yehoba kwanema bingi kukila ne byokyajinga kala ne nyi? Jishinda jimo ‘jotumbikilamo matwi’ kwi Yehoba ke kukokela mukambizho wa kupwila pamo. Kine tubena kutengela bingi kimye kyawama kya kupwila kwetu kwa nkambi kwikalako pa mwaka pa mwaka! Jibumba jitangijila ja Bakamonyi bakwa Yehoba janengezha ne jikwabo kupwila kwa nkambi kwa mu 2003 kwikala mu mapunzha apusana pusana a muno mwetu mu Zambia.

² Kabiji kukekala ne kupwila kwa mikoka mu byalo bimo, byonka byo kyaambiwe mu Kyamba kya Usopa kya July 1, 2002 kya Kibemba. Na mambo akuba mu byalotu bicheche mo mukekala kupwila kwa mikoka, bantutu bacheche bo baketabizhiwa kuya na kutanwako. Pano nanchi twakonsha kuba byepi pa kuba’mba tufunde byavula mu kupwila kwa nkambi kwanengezhewa uno mwaka?

³ Tanwaiko Moba Onse: Pa kuba’mba tufunde byavula mu mikambizho ikapanyiwa kupichila mu kalume wa kishinka ne wa maana, twafwainwa kutanwako moba onse ku kupwila kwa nkambi. (Mat. 24:45) Abya mwafwainwa kulombela jimo bakulumpe benu ba nkito kwimupapo moba akukonsha kuba’mba mukatanweko moba onse ku kupwila nyi? Nehemiya saka akyangye kuya kwi Mfumu Atazakeshi na kulomba lūsa lwa kuya ku Yelusalema na kushimika nsakwa, ‘walombele kwi Lesa wa mwiulu.’ (Neh. 2:4) Ne anweba mwafwainwa kulomba kwi Yehoba kuba’mba emupe bulume bwa kusolomoka mukulumpe wenu wa nkito ne kumulomba moba onse asatu akutanwa ku kupwila. Ibyepi umvwe kyakuba bakulumpe benu ba nkito babena kuwaya waya kwimupa moba? Kampe kyakonsha kwibakwasha, ke kwibalumbulwila bayuka kuba’mba kutanwa ku kuno kupwila kwitufunjisha mikambizho ya kwikala muntu wa nkito wa kishinka, wingila na ngovu, kabiji waketekelwa. Kabiji kikwabo, umvwe mu kisemi tuji na bantu babula kwitabila, kyawama kwibabulako nabo byotwanengezha ñendelo yetu ya kuya na kutanwa ku kupwila kwa nkambi saka kukiji kimye.

⁴ Nengezhezho ya Bibamba mwa Kulaala: Javula balongo benengezhezha bene kwikala na balongo babo nangwa balunda nabo baji ku bwipi na mpunzha kwaikela kupwila. Mu mapunzha a ku mizhi balongo batunga tumisakuta nangwa kulaala mu madomitale atungwa na balongo bepana kwingila pa koko kupwila. Pa kupwila kumo kumo bengijisha mazubo mulaala baana ba sukulu kuba’mba mulalenga baiya na kupwila. Umvwe balongo ba ku mupashi nangwa balongo benu ba ku mubiji bo bemutambwila kwikala nabo, kechi kyawama kuba’mba mambo kyaikela ka bemutambwila bulongo, monka mwaikela kuba’mba mukokolokeleko panyuma ya kupwila ne. Bibamba byo bemupa kulaalamo bya kwikalamotu kimye kya kupwila kwapwa. Babena kusungwa mu ano mazubo bafwainwa kumona’mba abo pamo ne baana babo banemeka nzubo ya muntu wibatambwila, kabiji kechi bafwainwa kwikala na kisuse kya bintu nangwa kupalanguzha mu bipe nangwa kutwela kumyanzo yo babula kuswishiwa kutwelako ne. Umvwe bena nzubo batanyiwa na lukatazho lwa uno mutundu, bukiji bukiji bafwainwa kwilutwala ku Dipatimenti ibena kunengezha Bibamba mwa kulaala baiya na kupwila, kabiji balongo bakekala na lusekelo lwa kukwasha.

⁵ Kukwasha Bantu Bakajilwa: Nanchi mu kipwilo kyenu mujipo bamo bakonsha kukeba bukwasho pa kutanwa ku kupwila nyi? Bakikulumpe, balwazhi, ne bakwabotu baji mu mwingilo wa kimye kyonse, javula bebakwasha ku balongo babo bena Kilishitu, pano bino bakulumpe mu kipwilo ne bakwabotu bayuka lukatazho luji na bano bantu bakonsha kwibakwashako mu butemwe.

⁶ Kometi ya Mwingilo mu Kipwilo ikapituluka mu mapepala onse anemba basapwishi a Kushikisha Bibamba. Kulondela mikambizho yanembwa pa uno pepala, kometi ya mwingilo yafwainwa kutalatala bulongo ne kuyuka umvwe bashikisha baji na lukatazho lo mwakonsha kukankalwa kwingijilapo ko ko kwenu. Luno lunengezho ke lwa basapwishi babula kaneneno pamo ne baana babo beshingika bulongo. Dipatimenti inengezha Bibamba mwa kulaala ikashikisha munembeshi mu kipwilo umvwe bajipo na jipuzho jiji jonse pa mambo a kukwasha bakajilwa.

⁷ Kuya na Kupwila ku Mpunzha Ingi: Umvwe mukeba kuya na kutanwa ku kupwila ku mpunzha ingi, mubena kukeba ne kibamba mwa kulaala, mwane monai munembeshi mu kipwilo kyenu. Wakonsha kwimupa pepala wa Room Request form wa kushikishilapo. Tumai pepala wenu ku ofweshi mukatampe wa ku yo yo mpunzha yomukeba kuya na kupwilako. Umvwe mu muzhi ye mubena kukeba kuya na kupwilamo kupwila kwa nkambi muji kupwila kwavula, monai kuba’mba pa pepala mwanembapo moba ne mulaka ukengijishiwa ku kupwila ko mukeba kutanwa.

⁸ Kwivimbila ku Mapuso: Jibumba ja Yehoba mu butemwe jitupa bya kwituvululako pa kimye kyafwainwa pa mambo a kupwila. Ke kya bulanda bingi kushimuna’mba pa kupwila kumo myaka ya kunyuma kwe, bipe bya batainwe pa kupwila byapijilemo na mujilo watemene na mambo a kubula kutako muchima. Kabiji bafwa ku mapuso apa mukwakwa nabo bavula. Balongo baji na uno mwingilo pa kupwila ne bansemi, bakambizhiwa kuteshako muchima ku bino bintu pa kuba’mba kupwila kwetu ku kekale kwa kwitukosesha ne kupwanañana kwawama, kechi kwa bulanda na mambo a muleele uleta mapuso ne.

⁹ Kwakubula nangwa kuzhinaukatu ne, kilengela kupilamo pa kupwila kechi kutekelatu kajo kwipi na musakuta ne, kilengela kino ke kulekelela baana sabakaisha mujilo. Onkao mambo, pa kuba’mba mwivimbile ku mujilo anweba bene ne balongo benu ba ku mupashi, kange muleke baana saka bapitañana bunke ne; kabiji kange mushile baana mema abena kuselauka’mba batalengamo, ne kwibasha ku mujilo ne. Nangwa kyakuba ku nzubo bengilatu bulongo, mpunzha pa kupwila ke ingi. Pakebewa kutako muchima ku kino pa kuba’mba mwivimbile ku mapuso. Bantu bavula bekala pamo, kabiji ne baana nabo batemwa kukaya bisela inge baji na bakwabo banyike. Balabikwa bingi bukiji bukiji kabiji kechi bamwena jimo byakonsha kuleta misongo ne, onkao mambo kechi twafwainwa kwibapa tundulu, mankishi nangwa malampi ne. Lukatazho lukwabo lwikalako inge bansemi baya na kupwila kimye kya mute, pano basha baana mu misakuta bunke kwakubula wa kwibasopa. Baana bafwainwa kwikala pamo na bansemi yabo saka bateleka bibena kwambiwa. Inge baasha bamona baana sabapitañana bunke kwakubula wa kwibasopa, bafwainwa kwibabwezha kuji bansemi yabo. Twasansapo, anweba bansemi kwatankanai na baasha pa kupwila mambo mu jino jishinda motumweshesha ‘butemwe ku balongo [bonse, NW].’—1 Pe. 2:17.

¹⁰ Bipwilo bimo bikeba myotoka ya kwibatwala ku kupwila. Motoka yense ye mwakonsha kwingijisha wafwainwa kwikala wawama, waswishiwa kwenda pa mukwakwa. Motoka kechi wafwainwa kusenda kibelengelo kya bantu bavula kukila boisenda ne. Kyakonsha kuwama kutongolapo mulongo umo wafwainwa kwikala kapitao mu kunengezha bya ñendelo. Ukabula balongo byo bakenda, kimye kya kunyamuka ne mpunzha pa kupatamina. Kapitao wafwainwa kuyuka makatazho onse aji na balongo pa kuba’mba bayuke byakuba. Umvwe kyatanyiwa’mba akebewa bukwasho, kufundañana nangwa mwakubila na lukatazho, balongo bafwainwa, bakonsha kwingijilapo.

¹¹ Betutalatala Bavula: Nanchi bantu bamona Bakamonyi bakwa Yehoba byo bapusanako na bantu ba ino ntanda nyi? Ee, bamona! Umvwai byambo bimo byaambile bantu babula Bakamonyi bakwa Yehoba: “Kimye kyonse tumona byubilo byenu byo mumwesha pa kupwila kabiji twatana kuba’mba mwi bantu bamo bakwatankana bingi bulongo ne kwiubila kifyele.” “Mulungu wapwa, twajinga na kipwilo kya bupopweshi bukwabo. Pano twamona byo mwapusana nabo.” “Twashiinwa namba kine mwi bantu bakwashañana kabiji mwingijila pamo.” Nanchi bino byambo kechi bitukwasha kumona ‘maana afuma mwiulu’ byo etukwasha kuwamisha byubilo byetu ne nyi? (Yako. 3:17) Byo “twaalulwa ke kya kutalatala ntanda yonse,” twayai tumone kuba’mba pa kimye kiji kyonse byubilo byetu bibena kumwesha mushingi ne buwame bwa Lesa wetu, Yehoba.—1 Ko. 4:9.

¹² Byokiji kuba’mba “musango wa panopantanda ubenakupichijila,” kupwila kwetu kwa nkambi kwafwainwa kwitukwashanga kwikala balaba ku mupashi. (1 Ko. 7:31) Kunengezha kukatanwako moba onse kikakebewa kwibikishako, kabiji mukamona mfweto mu kuba bino. Kupwila kwa nkambi kwa uno mwaka kwa “Pai Lesa Lukumo” kwanengezhewa kwitukwasha kwikala bashikamatu byo tubena kupembelela juba Yehoba jo akonauna ntanda ya kwa Satana. Twayai tumone kuba’mba kechi twaleka kiji kyonse kwituzhikijila kutambwila mikambizho yoetunengezhezha Yehoba ne.—Isa. 51:4, 5.

YUKAI’MBA: Munembeshi mu kipwilo kyonse usakukatangijila mingilo yonse yalamata ku kupwila kwa nkambi ne kwikutentemesha. Umvwe Munembeshi ufwapo, mukulumpe mu kipwilo mukwabo wafikapo wafwainwa kutangijila ino mingilo. Munembeshi wafwainwa kupitamo bukiji bukiji mu mikambizho yonse iji mu makalata afuma ku babena kunengezha kupwila kwa nkambi na biji abena kwamba pa bya ndajilo, nkito ya kwifuukwila, ne lunengezho lwa bakwingila kupwila saka kukyangye kutendeka, kabiji ne bakwingila panyuma ya kupwila. Pafwainwa kwikalako kimye kyabaya pa kupwila kwa kipwilo pa kuba’mba Munembeshi atange bulongo, (KECHI kwambatu lubilo ne) ne kulumbulula makalata onse a kupwila kwa nkambi. Bakulumpe bonse mu kipwilo, kikatakata munembeshi bafwainwa kumona’mba bayuka lunengezho lonse lwa kupwila kwa nkambi lwanembwa mu makalata ne mu Mwingilo Wetu wa Bufumu.

Bimye bya Kupwila

Juba Jitanshi ne ja Bubiji

8:45 hrs. – 16:00 hrs.

Juba ja Busatu

8:45 hrs. - 15:25 hrs.