Kupwila kwa Nkambi kwa Bakamonyi ba kwa Yehoba kwa “Bafunjishi ba Mambo a Lesa” kwa mu 2001
1 Ngauzhi Isaya watelele Yehoba amba Mufunjishi Mukatampe, ao mu butemwe ubena kwitwita amba: “Jishinda jino jo mwafwainwa kuyamo.” (Isa. 30:20, 21) Pano bino tumvwa byepi jiwi ja Yehoba kuba’mba jitukwashe? Yehoba wamba na bantu banji kupichila mu Baibolo, kubikapo ne mabuku alumbulula Baibolo, kupwila, kupwila kwa kijiiji, kupwila kwiikajila ne kupwila kwa nkambi kunengezhewa na ‘kalume wa kishinka ne wa maana.’ (Mat. 24:45) Twakonsha kusanchila Yehoba pa kwitubula jishinda jo twafwainwa kuyamo.
2 Pa mwaka pa mwaka, kupwila kwa nkambi kwitupa jishuko ja kupwila pamo na bakwetu baitabila ne kutelekesha ku mikambizho ya Yehoba. Mwaka wapwa, bantu 326,888 batainwe ku kupwila kwa nkambi kwa “Ba Kuba Kyambo kya kwa Lesa” ako kwibakoseshe ku mupashi. Mu 2001, kupwila kwa nkambi kwa moba asatu kwa “Bafunjishi ba Mambo a Lesa” kukekalako mu kino kyalo. Twayuka namba mubena kwinengezha kutanwako, onkao mambo twanengezha mikambizho yalondelapo ya kwimukwasha.
3 Kunengezha Bibamba mwa Kulaala: Javula balongo benengezhezha bene kwikala na balongo babo nangwa balunda nabo baji ku bwipi na mpunzha kwaikela kupwila. Mu mapunzha a ku mizhi balongo batunga tumisakuta nangwa kulala mu madomitale atungwa na balongo bepana kwingila pa ko ko kupwila. Pa kupwila kumo kumo bengijisha mazubo mulaala baana ba sukulu kuba’mba mulaale baiya na kupwila. Inge mubena kwikala na balunda nangwa balongo benu, kechi kyawama kutainamo jishuko ja kwikajijila ne kunungako moba akwabo a kuba’mba mutushisheko pa nyuma ya kupwila ne. Bino bibamba ke bya kulaalamotu kimye kyo mubena kupwila kwapwa. Babena kusungwa mu ano mazubo bafwainwa kumona’mba abo pamo ne baana babo banemeka nzubo ya muntu wibatambwila, kabiji kechi bafwainwa kwikala na kisuse kya bintu nangwa kupalanguzha mu bipe nangwa kutwela kumyanzo yo babula kuswishiwa kutwelako ne. Umvwe bena nzubo batanyiwa na luno lukatazho lwa uno mutundu, bukiji-bukiji bafwainwa kwilutwala ku Dipatimenti ibena kunengezha Bibamba mwa kulaala baiya na kupwila, kabiji balongo bakekala na lusekelo lwa kukwasha.
4 Kukwasha Bantu Bakajilwa: Bakikulumpe, balwazhi, balongo ne banyenga baji mu mwingilo wa kimye kyonse, ne bakwabotu bakajilwa bakonsha kukeba bukwasho pa kupwila. Balongo, bakulumpe mu kipwilo ne bakwabotu mu kipwilo bayuka lukatazho lwabo, bo bafwainwa kukwasha bano bantu. Kechi kyafwainwa kulekela mwingilo wafwainwa kwingila ba mu kisemi nangwa kipwilo babena kunengezha kupwila ne. (1 Timoti 5:4) Fomu wa Room Request ulumbulula bintu bikebewa ku yewo muntu ubena kwipuzha nzubo mwakufikila. Kometi ya Mwingilo wa Kipwilo yafwainwa kupengauka bibena kukebewa ku muntu yense ubena kwipuzha mwa kulaala saka bakyangye kwiituma ku Dipatimenti ibena kunengezha Bibamba mwa kulaala. Kanemba mu kipwilo wafwainwa kunemba keyala ne nambala yanji ya foni pa fomu pa kuba’mba umvwe kwaikala luzhinauko Dipatimenti ibena kunengezha Bibamba mwa kulaala ikakonshe kumwipuzha bulongo.
5 Kwivimbila ku Mujilo ne ku Mapuso Akwabo: Kwakubula nangwa kuzhinauka, kilengela kupilamo pa kupwila kechi kutekelatu kajo kwipi na musakuta konka ne, kilengela kino ke kulekelela baana sabakaisha nangwa kukaila ku mujilo. Onkao mambo, pa kuba’mba mwivimbile ku mujilo anweba bene ne balongo benu ba ku mupashi, kange muleke baana saka bapitañana bunke ne; kabiji kange mushile baana mema abena kuselauka’mba batalengamo, ne kwibasha ku mujilo ne. Nangwa kya kuba ku nzubo bengilatu bulongo, mpunzha pa kupwila ke ingi kabiji pakebewa kutako muchima ku kino pa kuba’mba mwivimbile ku mapuso. Bantu bavula bekala pamo, kabiji ne baana nabo batemwa kukaya bisela inge baji na bakwabo banyike. Balabikwa bingi bukiji-bukiji kabiji kechi bamwena jimo byakonsha kuleta misongo ne, onkao mambo kechi twafwainwa kwibapa tundulu, mankishi nangwa malampi ne. Lukatazho lukwabo lwikalako inge bansemi baya na kupwila kimye kya mute, pano basha baana mu misakuta bunke kwakubula wa kwibasopa. Baana bafwainwa kwikala pamo na bansemi yabo saka bateleka bibena kwambiwa. Inge baasha bamona baana sabapitañana bunke kwakubula wa kwibasopa, bafwainwa kwibabwezha kuji bansemi yabo. Twasansapo, anweba bansemi kwatankanai na baasha pa kupwila mambo mu jino jishinda mo tumweshesha butemwe bwetu bwa ‘kutemwa balongo.’—1 Pe. 2:17.
6 Jibumba ja Yehoba mu butemwe jitupa bya kwituvululako pa kimye kyafwainwa pa mambo a kupwila. Ke kya bulanda bingi kushimuna’mba pa kupwila kumo myaka ya ku nyuma kwe, bipe bimo bya batainwe pa kupwila byapijilemo na mujilo watemene na mambo a kubula kutako mana. Balongo baji na uno mwingilo pa kupwila, kikatakata bansemi, bakambizhiwa kuteshako muchima ku bino bishinka bikatampe, pa kuba’mba kupwila kwetu kukekale kwa kwitukosesha ne kupwañana kwawama, kechi kwa bulanda na mambo a muleele uleta mapuso kimye kimo ne.
7 Ñendelo: Kimo kimye kwenda kwakonsha kwimushupa. Bino kechi mwakonsha kuleka kino kimulengele kupuswa ku kupwila ne. Bamo babukiña myotoka ya kwibatwala ku kupwila. Motoka yense ye mwakonsha kwingijisha wafwainwa kwikala wawama, waswishiwa kwenda pa mukwakwa. Motoka kechi wafwainwa kusenda nambala ya bantu bavula kukila boisenda ne. Kyakonsha kuwama kutongolapo mulongo umo wafwainwa kwikala kapitao mu kunengezha bya nsendelo. Ukabula balongo byo bakenda, kimye kya kunyamuka ne mpunzha pa kupatamina. Kapitao wafwainwa kuyuka makatazho onse aji na balongo pa kuba’mba bayuke bya kuba. Umvwe kyatanyiwa’mba pakebewa bukwasho, kufundañana nangwa mwakubila na lukatazho, balongo bafwainwa bakonsha kwingijilapo.
8 Kuya na Kupwila ku Mpunzha Ingi: Kipwilo kimo kyonse kyaabenwa kutanwa ku kupwila kuji kwipi na kokyaikela. Kwesakana na kibelengelo kya basapwishi batanwa ku kupwila kumo konse, Sosaiti yeseka kusomba nambala ya bantu bakatanwako kuba’mba inengezhe pa kwikala pawana, mwa kulaala, mabuku, kubikapotu ne bikwabo byafwainwa. Onkao mambo, umvwe paji ene mambo o mukebela kuya na kupwila ku mpunzha ingi yabula kulamatako kipwilo kyenu, kanemba mu kipwilo kyenu wafwainwa kuoda fomu wa Room Request kufuma ku Sosaiti, ye mwafwainwa kunembapo ne kusaina. Apa bino mutume uno fomu ku mpunzha ko mubena kukeba kuya na kupwilako.
9 Twafwainwa Kutanwako: Balongo betu ba ku mupashi bavula bashupikwa bingi pa kubatu’mba batanwe ku kupwila. Bakinjika kupwila kwa bantu ba Yehoba kwikala kya kwibapulusha. Bamo benda misinso yalepa bingi kuya na kupwila, kechi bakeba kupuswako ne. Mulongo umo wa myaka ya kusemwa 73 waendele panshi makilomita 450 kuya na kupwila. Pa nyuma ya kwenda moba 16 wafikile saka avimba maulu, nangwa byonkabyo wasangalele bingi pa kutanwako. Pa nyuma ya kupwila, wasekejile ne kukoseshiwa ku mupashi kabiji wabwelelemo kwabo panshi jibiji. Byo byo akelwa kuba myaka yonse!
10 Banyenga babiji baendele musinso walepa pepi na makilomita 160 kuya na kupwila. Muka nyenga umo pa bano banyenga babiji wamubujile’mba kechi bakatanwa ku kupwila ne, mambo mali a kwendela baji bafwao. Nyenga mukwabo naye wajinga na lonka luno lukatazho. Bano banyenga babiji bekoseshe bene na bene kabiji bafuukwile kuyatu panshi. Baubile byonkabyo ne baana babo, kabiji basekejile bingi pa kutanwa ku kupwila.
11 Kechi’mba nenuwa mukenda panshi musinso walepa ne, pano bino mwafwainwa kwibikako ne kwipana pa kuba’mba mukatanweko pamo ne kisemi kyenu. Pa kuba’mba mutambule lūsa ku nkito yenu kikebewa kukosapo. Abya mwasolomoka kala bakulumpe ba pa nkito yenu ne kulomba livi nyi? Uno mwaka, kupwila kwa nkambi kumo kukekalako pa kimye baana basukulu saka bakyangye kushinka sukulu. Umvwe muji na baana bafunda sukulu, mu meso anteka lombai bafunjishi babo’mba baana benu kechi bakeya ku sukulu pa oo moba ne, mambo a lufunjisho lukwabo lwanema lwa Lesa.—Mpitu. 31:12.
12 Bonsetu twikala na makatazho byonka byo kikala ku balongo batongolwa mu mapalagalafu peulu po. Nangwa byonkabyo, twakonsha kweseka byonka byo boba ne kuya na kutanwa ku bipungu byonse bya kupwila kwa nkambi. Umvwe pabena kukebewa lupimpu, lombai Yehoba kwimutangijila, ne kuyuka kuba’mba ukemukwasha mu kwibikako kwenu mukatanwe ku majashi onse.
13 Nowai Mapesho: Twatemwa bingi Mambo a Lesa, mambo twayukaamba aketukomesha kufika ne ku lupulukilo. (1 Pe. 2:2) Kutanwa kwetu ku kupwila kwa nkambi ne kuteleka ku majashi onse kuketukwasha atweba bonse pa muntu pa muntu kukosa mu lwitabilo lwa Mambo a Lesa ne kwikala bawaina kushinda bulemo buleta Satana. Inge twauba bino tukamwesha Yehoba ne boba betumona kuba’mba tunemeka bintu byazhila kabiji ‘kechi twi boba babwela mu nyuma ne ... twi boba baji na lwitabilo lwa kupulusha mweo.’—Hebe. 10:39; 12:16; Mana. 27:11.
14 Kupwila kwa Nkambi kwa Bashinka Matwi: Kutuntulula kwa kwamba na maboko kukekalako pa kupwila kwa nkambi kwa Kizungu ku Lusaka. Majashi onse akatuntululwa mu ñambilo ya Kwamba na maboko kwa kina America ku luonde, abo nabo bakeyowa kupwañana pamo kwa kwikosesha. KAFWAKO LUNENGEZHO lwa bino lukekalako pa kupwila kukobiwanga ku mapunzha angi ne. Onkao mambo kyanema bingi kuba’mba bashinka matwi bonse batatule KYONKA KINO KIMYE kwinengezha bakatanwe ku kupwila kwa nkambi kwa bashinka matwi. Bakulumpe mu kipwilo bafwainwa kumona bonse bashinka matwi mu kipwilo kyabo ne kwibabula kuba’mba bayuke luno lunengezho ne kumona bukwasho bwafwainwa bobakonsha kukwasha bano bantu kuba’mba bakatanweko. Ku bobo bakeba mwa kulaala, monai mapalagalafu 3 ne 4.
15 Kupezhako: Kimye kya kutanwa ku kupwila kwa nkambi byo kyafwenya kala ke pepi, lombainga kwi Yehoba kuba’mba mukatanwe ku bipungu byonse pa moba onse asatu ne kufunda byavula mu majashi. Nanchi mwalomba kala livi ku nkito ya moba asatu kuba’mba mukatanwe ku kupwila nyi? Umvwe mukyangye kuba kino, lombai kyonka kino kimye. Kulomba livi kimye sakyapwa kala javula kechi iswishiwa ne. Uno mwaka kalume wa kishinka ne wa maana wanengezha kupwila kwa nkambi kwa “Bafunjishi ba Mambo a Lesa” kuketufunjisha mikambizho ya ku mupashi ne kukosesha lwitabilo lwetu. Onkao mambo, tatulaiko kyonka kino kimye kwinengezha mukatanweko, kulondela mukambizho wa nyimbi wa masalamo wa kuba’mba: “Totai Lesa mu bipwilo”!—Sala. 68:26.
YUKAI’MBA: Kanemba mu kipwilo kyonse usakukatangijila mingilo yonse yalamata ku kupwila kwa nkambi ne kwikutentemesha. Umvwe kanemba ufwapo, mukulumpe mukwabo mu kipwilo wafwainwa kutangijila ino mingilo. Kanemba wafwainwa kupitamo bukiji-bukiji mu mikambizho yonse iji mu makalata afuma ku babena kunengezha kupwila kwa nkambi na biji abena kwamba pa bya ndajilo, nkito ya kwifuukwila ne bintutu bikwabo. Pafwainwa kwikalako kimye kyabaya pa kupwila kwa kipwilo pa kuba’mba kanemba atange bulongo, (KECHI kwambatu lubilo) ne kulumbulula makalata onse a kupwila kwa nkambi ne. Bakulumpe bonse mu kipwilo, kikatakata bakanemba bafwainwa kumona’mba bayuka lunengezho lonse lwa kupwila kwa nkambi lwanembwa mu makalata ne mu Mwingilo Wetu wa Bufumu.