Kushonkena kwa Nkambi kwa Bakamonyi ba kwa Yehoba kwa “Labainga Mukenkentenga!” kwa mu 2009
1. (a) Tukamwenamo ka umvwe twashinkwako moba onse asatu a kushonkena kwa nkambi? (b) Bintu ka byo mwafwainwa kutendeka kunengezha lonka luno?
1 Atweba bonse tubena kutengela Kushonkena kwa Nkambi kwa uno mwaka wa 2009 potukekalapo jikwabo na kimye kya kupwanañana pamo na bakwetu batota Yehoba kabiji ‘bata muchima ku mupashi.’ (Mat. 5:3) Juba ja Yehoba byo jibena kufwenya pepi, tubena kwimutundaika anweba bonse kukashinkwako moba onse asatu, kuba’mba mukamwenemo mu kupwanañana kwa bwina Kilishitu ne mu lutundaiko lwa ku mupashi lukosesha lwitabilo. (Zefwa. 1:14) Bulai bafunjishi ne bakulumpe ba nkito bayuke kuba’mba kuno kushonkena ke lubaji lwanema bingi lwa mpopwelo yenu. Tendekaiko kwinengezha lonka luno ne kulomba Yehoba kwimupesha; ne aye ukemukwasha.—Isa. 50:10
2. Mambo ka o twafwainwa kubujila kuya ku kukonkana kwa byalo umvwe kechi betusala ne?
2 Kukonkana kwa Byalo: Byo kiji kuba’mba kuno kukonkana kukekalatu mu byalo bicheche, aba bonka bo basala bo bakatanwakotu kwapwa. Kukokela luno lunengezho kukakepeshako kwishindaika na mambo a kuvujisha kwa bantu.—1 Ko. 14:40; Hebe. 13:17.
3. Twakonsha kumwesha byepi butemwe bwa bwina Kilishitu ku bakwetu mu kipwilo?
3 Kwashai Bakwenu Bakatanweko: Nanchi mu kipwilo kyenu mujipo bamo bakeba kwibakwashako pa kuba’mba bakatanwe ku kushonkena nyi? Umvwe mwakwasha bakwenu mu jino jishinda, ko kuba’mba ‘kechi mwatatu muchima ku bintu byenu byonka ine, mwata ne ku bya bakwenu pamo.’—Fili. 2:4.
4. Bamo baubilepo byepi pa kuba’mba batanwe ku kushonkena kwa nkambi?
4 Mfweto yo bamwenamo bantu ba Yehoba pa kushonkena, kechi beyesakanya ku mali o bengijisha ne. Umvwai byaubile bamo bakebeshe kuya na kutanwa ku kukonkana kwa byalo kwa Bakamonyi ba kwa Yehoba kwa Divine Will (Kyaswa Muchima wa Lesa) kwajingako mu 1958 mu Muzhi wa New York. Mulongo umo washinkile kampanyi wanji wa buntungi pa milungu ibiji, ne kuya na kukakwasha ne kukatanwako ku kuno kukonkana. Mulongo mukwabo mu kyalo kya Virgin Islands wapoteshe mpunzha yanji ya maeka atanu pa kubatu’mba ba mu kisemi kyanji batanu na umo bakatanweko. Bamulume ne mukazhi bamo bapoteshe bwato bwabo bwa inginyi pa kuba’mba bamwenemo mali a kusenda baana babo basatu, kutatwila pa wa bañondo babiji kufika ku wa myaka itanu na umo. Balongo basatu ba mu jivumo jimo mu kyalo kya California bebabujile’mba umvwe bashe nkito baye, pa kubwela bakebapanga. Nangwa byonkabyo, kechi kibalengejile kubula kuya ne.
5. Umvwe kechi mukaya ku kushonkena kwa nkambi kukaya kipwilo kyenu ne, mwafwainwa kuba byepi?
5 Inge Mukeba Bukwasho: Umvwe musapwishi ukeba bukwasho bwa mwa kukafikila, Kavoto ka Mwingilo mu Kipwilo kafwainwa kumona’mba wafikizha bikebewa pa kuba’mba bamupe Pepala wa Kulomba Kibamba mwa kulaala. Bafwainwa kupitulukamo mu mikambizho iji pa uno pepala munembeshi mu kipwilo saka kyangye kumutuma ku Dipatimenti Inengezha Bibamba mwa Kulaala.
6. Ñanyi ene mambo o kukekelatu kutuntulula kwa mulaka wa kwamba na maboko pa kushonkena kwa nkambi pa mapunzha abiji?
6 Mulaka wa Kwamba na Maboko: Byonka byo mwamona mu kakitenguluzha muji moba ne mapunzha a kushonkena kwa nkambi kukekala muno mu Zambia, kutuntulula kwa mulaka wa kwamba na maboko kukekalakotu pa MAPUNZHA ABIJI, ku Lusaka ne ku Ndola. KECHI KUKEKALAPO kutuntulula kwa mulaka wa kwamba na maboko pa kushonkena kukwabo kungi ne. Luno lunengezho lukakwasha kutuntulula bulongo kabiji ne kwikala na mabumba abaya kuba’mba pakekale kwikomesha ne kupwanañena pamo. Bakulumpe mu kipwilo ne bantuntuluzhi ba mulaka wa kwamba na maboko bafwainwa kubula bantu bashinka matwi baji mu bipwilo byabo pa luno lunengezho kabiji ne kwibakwasha kwinengezha kutanwa ku kushonkena kumo pa kukwe kubiji kwa nkambi. Kabiji bakulumpe mu kipwilo bafwainwa kumona inge pajipo bamo bashinka matwi baji mu kipwilo kyabo babena kukebewa bukwasho.
7. Mikambizho ka yo twafwainwa kulondela umvwe tubena kunengezha bya ñendelo?
7 Kunengezha Ñendelo: Bipwilo bimo biteula myotoka ya kwibatwala ku kushonkena. Motoka yense ubena kutwala bantu ku kushokena, wafwainwa kwikala wawama bulongo, kechi kisasa ne. Motoka kechi wafwainwa kusenda bantu bavula kukila pa kipimo kyo asenda ne. Mulongo wakoma ku mupashi ye ye bafwainwa kupa mutembo wa kunengezha bya ñendelo. Ukabula jibumba mutanchi byo aji, kimye ne pa mpunzha pa kwiya na kwibasendela. Makatazho onse akonsha kumweka mwafwainwa kubula uno kapitawa kwimubula bya kuba. Umvwe pamweka bimo bikebewa kwikwasha, kwifundako nangwa bya kuba na lukatazho lumo, balongo bayuka mwakubila bakonsha kuba byonkabyo.
8. Ñanyi bintu byo twafwainwa kutako muchima byo tubena kwinengezha ne pa kukatanwa ku kushonkena kwa nkambi?
8 Mingilo Itumbijika Lesa: Umvwe ketumweshe bipangwa bya mupashi mu byonse byo tuba, kulama lujimi ne kwikala na byubilo byawama, tulengela jizhina ja bantu ba Yehoba kubula kunenwa bibi kabiji ne kubula kutuntwisha bakwetu. (1 Ko. 10:31; 2 Ko. 6:3, 4) Mwane byubilo byenu bikatumbijike Lesa mu ino mbaji byo mukatanwa ku Kushonkena kwa Nkambi kwa uno mwaka wa 2009.—1 Pe. 2:12.
[Kitenguluzha pa peja 5]
Bimye bya Majashi:
Juba Jitanshi ne ja Bubiji
8:20 hrs. - 15:55 hrs.
Juba ja Busatu
8:20 hrs. - 15:30 hrs.