Kupwila kwa Nkambi kwa Bakamonyi ba kwa Yehoba kwa mu 2008 kwa “Tangijilwainga na Mupashi wa Lesa”
1. (a) Mambo ka o twafwainwa kutesheshako muchima lelo jino ku lujimuno lwa kwa Paulo lo apele bena Kilishitu Bahebelu? (Tangai Bahebelu 10:24, 25.) (b) Jishuko ka jo tukekala najo ja kwingijishishamo lujimuno lwa kwa Paulo?
1 Mutumwa Paulo wakambizhe bena Kilishitu Bahebelu kupwila pamo “ne kwibikishakotu” kwikosesha abo bene na bene byo bamwenenga aja juba kasa jibena kufwenya pepi. (Hebe. 10:24, 25) Biyukilo byaubatu mbwee bibena kumwesha’mba “juba” jo aambilepo Paulo jafwenya kala pepi! Onkao mambo, tubena kupembelela mashuko a kukapwila pamo na balongo ne banyenga yetu na kufunda mafunde a ku mupashi akonsha kwitutangijila mu ano “moba apelako” akatazha. (2 Timo. 3:1) Jino jishuko jikekalako pa kupwila kwa nkambi kubena kwiya kwa mu 2008.
2. (a) Mambo ka o kyanemena kutanwako moba onse asatu a kupwila kwa nkambi? (b) Twakonsha kutendeka byepi kwinengezha kuba’mba tukatanweko?
2 Mukatanweko Moba Onse Asatu: Tubena kwimutundaika namba mukatanweko moba onse asatu. Umvwe ketubule “kuleka kupwila pamo,” kechi tukapuswapo pa kano kajo ka ku mupashi kanema ne. (Hebe. 10:25) Onkao mambo, tendekai kunengezhezha jimo lonka luno. Lombelai jimo moba ku bakulumpe benu ba nkito kuba’mba bakanengezhe bintu bulongo. Umvwe baana benu bakayanga ku sukulu mu kimye kya kupwila kwa nkambi, isambilai jimo na bafunjishi babo pa mambo a luno lunengezho. Balondolwelai kuba’mba kupwila kwa nkambi ke lubaji lwa mpopwelo yenu ya kimye kyonse. Yehoba ukemupesha byo mubena kwibikako kutangizhako bintu bya Bufumu.—Mat. 6:33.
3. Nga bamo bobapo byepi pa kuba’mba batanwe ku kupwila kwa nkambi?
3 Bantu ba Yehoba bamona’mba mapesho aji mu kutanwa ku kupwila kwa nkambi kechi akonsha kwesakana pamo na mali o bengijisha pa kutanwako ne. Akimonai byaubile bantu bamo bakebelenga kuya na kutanwa ku kupwila kukatampe kwa Bakamonyi ba kwa Yehoba kwa Divine Will International Assembly (Kyaswa muchima wa Lesa) kwajingako mu 1958 mu Muzhi wa New York. Mulongo umo waimikile mwingilo wanji wa buntungi pa milungu ibiji kuba’mba aye na kukakwashako mu mingilo ya kokwa kupwila ne kutanwako. Mulongo mukwabo pa Jikuji ja Virgin wapoteshe mpunzha yanji ya maeka atanu kuba’mba ba mu kisemi kyanji bonse batanu na umo bakatanweko ku kokwa kupwila. Kabiji bamulume ne mukazhi bamo bapoteshe bwato bwabo bwa inginyi kuba’mba bakasende baana babo bonse basatu ku kokwa kupwila kukatampe, kutatula na wa bañondo babiji kufika ne ku wa myaka itanu na ibiji. Bankasa ne kolo basatu mu kyalo kya California bebabujile’mba umvwe bakabule kwiya ku nkito pa oa moba a kupwila, bakebapanga nkito. Pano bino, kino kechi kibalengejile kubula kuya na kutanwa ku kokwa kupwila kukatampe ne.
4. Mu ñanyi mashinda motwakonsha kumweshesha kulangulukilako bakwetu?
4 Kwashai Bakwenu Nabo Kutanwako: Paulo wasashijile ne balongo banji ‘kwilanguluka abo bene na bene.’ (Hebe. 10:24) Nanchi balongo ne banyenga mu Lufunjisho lwa Buku lwa Kipwilo kyenu babena kukebewa bukwasho bwa kuba’mba bakatanweko ku kupwila kwa nkambi nyi? Nanchi mwakonsha kukwasha bantu bo mufunjisha Baibolo kuya nabo ku kupwila kwa nkambi, nangwa kya kuba bakatanwakotu juba jimo nyi? Umvwe kemwisambe pa mambo a kupwila kwa nkambi na ba mu kisemi kyenu babula kwitabila, babulai mukayile nabo pamo. Bukwasho bwenu bwa butemwe bwakonsha kulengela bakwenu nabo kutanwako.
5. (a) Twakonsha kuyuka byepi moba ne mpunzha kukekela kupwila kwa nkambi? (b) Twakonsha kuba byepi umvwe tukeba kwa kukafikila ku kupwila kwa nkambi kukwabo kwabula kutongwelwa kipwilo kyetu?
5 Kutambula Mabulañano: Pa mwaka pa mwaka, ofweshi wa musampi utambwila mafoni kufuma ku bantu bepuzha kimye ne mpunzha kukekela kupwila kwa nkambi. Ano mafoni kikatakata afuma ku balongo ne banyenga bonka bayukila jimo kimye ne mapuzha kukekela kupwila. Saka mukyangye kutuma foni ku ofweshi wa musampi, patanshi monai mu mwingilo Wetu wa Bufumu wa March 2008. Mutanchi wa kupwila kwa nkambi kukekalako muno mu Zambia, uji pa peja 5. Umvwe mukeba kwa kukafikila ku kupwila kwa nkambi kwabula kutongwelwa kipwilo kyenu, nembelai ku konkako kupwila kwa nkambi ko mukeba kukatanwa. Umvwe mu yoyo mpunzha mukekala kupwila kwa nkambi kukila pa kumo, nembai mulaka ne moba akekelamo kupwila kwa nkambi ko mukatanwako.
6. Bya kuvululako ka bimo byaamba pa mambo a pepala wa Kwipuzhizhapo Kibamba mwa Kulaala?
6 Kukeba kwa Kufikila: Umvwe musapwishi ubena kulomba bukwasho bwa mwakulaala, Kometi ya Mwingilo mu Kipwilo yafwainwa kumona kana awo musapwishi wafikilamo kutambula pepala wa Kwipuzhizhapo Kibamba Mwa Kulaala nyi, nangwa ne. Munembeshi mu kipwilo saka akyangye kutuma uno pepala ku Dipatimenti Inengezha Bibamba Mwa Kulaala, wafwainwa kupitulukamo bulongo mu mikambizho yanembwa pa uno pepala.
7. Mambo ka o kukekela kutuntulula majashi mu mulaka wa kwamba na maboko pa kupwila kwa nkambi kumo kwasalululwa?
7 Mulaka wa Kwamba na Maboko: Byonka byo kyamweshiwa mu kabokoshi mwatanchikwa moba ne mapuzha a kupwila kwa nkambi kukekala muno mu Zambia, kutuntulula majashi mu mulaka wa kwamba na maboko KUKEKALAKOTU PA kupwila kwa nkambi kubiji, kwa Kizungu kukekela mu Lusaka ne kukekela mu Ndola. Ku kupwila kukwabo kwashala, KECHI KUKEKALAPO kutuntulula majashi mu mulaka wa kwamba na maboko ne. Luno lunengezho lukalengela ntuntulwilo yawama ya majashi kabiji ne kwikala na jibumba jikatampe ja kwibalengela kwikomesha bene na bene. Bakulumpe mu bipwilo ne bantuntuluzhi ba uno mulaka wa kwamba na maboko bafwainwa kubula bakamama baji mu bipwilo byabo pa mambo a luno lunengezho kabiji ne kwibakwasha kwinengezha kukatanwa ku kupwila kumo pa kukwe kupwila kubiji kwa nkambi kukekala kutuntulula majashi mu mulaka wa kwamba na maboko. Kabiji bakulumpe mu bipwilo bafwainwa kushikisha bakamama bonse baji mu bipwilo byabo umvwe babena kukebewa bukwasho.
8. Mikambizho ka yo twafwainwa kulondela pa kunengezha bya ñendelo?
8 Kunengezha bya Ñendelo: Bipwilo bimo bikeba myotoka ya kwibatwala ku kupwila kwa nkambi. Motoka uji yense ubena kutwala bantu ku kupwila kwa nkambi wafwainwa kwikala wawama bulongo waswishiwa kwenda pa mukwakwa. Myotoka kechi yafwainwa kusenda bantu bavula kukila pa kipimo ne. Kyawama kutongolapo mulongo umo wafwainwa kwikala kapitao wa kunengezha bya ñendelo. Ukabula jibumba bya lwendo, juba ne kimye kya kunyamuka apa kabiji ne pa mpunzha pakupatamina. Lukatazho luji lonse lwafwainwa kuya kwi kapitao kuba’mba abulañane bya kuba. Umvwe kyatanyiwa’mba pabena kukebewa bukwasho, kufundañana, nangwa jishinda mwa kupwishisha lukatazho lumo, balongo bafwainwa, bakakonsha kuyuka bya kuba.
9. Mu ñanyi mashinda motwakonsha kuletela lukumo Yehoba pa kutanwa ku kupwila kwa nkambi?
9 Mingilo Yawama: Kukokela mukambizho wa Yehoba wa kupwila pamo na kumupopwela kwitukwasha ‘kumwenamo byawama.’ Kyakilamo kunema, kwitupa mashuko a kutumbijikilamo jizhina ja Yehoba. (Isa. 48:17) ‘Mingilo yetu yawama imweka ayo ine’ ku bantu bavula pa kupwila kwa nkambi, kabiji bamo batundaikwa ne kwiambila abo bene biji ku michima yabo. (1 Timo 5:25) Byubilo byetu byawama bisangajika muchima wa Lesa wetu, aye Yehoba!
10. Nga Mateo 4:4 wamwesha byepi buneme bwa kutelekesha ku majashi onse a pa kupwila?
10 Yesu waambile’mba bwikalo bwetu bwaimena pa kumvwina “byambo byonse bifuma mu kanwa ka Lesa.” (Mat. 4:4) Pa kupwila kwetu kwa nkambi kubiwa pa mwaka pa mwaka, Yehoba witunengezhezha “kajo” ka ku mupashi “pa kimye pafwainwa” kupichila mwi ‘kalume wa kishinka ne wa maana.’ (Mat. 24:45) Mwingilo wa kunengezha kino kijilo kikatampe kya ku mupashi wabaya bingi. Twayai atweba bonse tukamweshe lusanchilo lwa kumusanchila Yehoba kupichila mu kukatanwako ku bipungu byonse kabiji ne kukatelekesha ku majashi akambiwanga.
[Kitenguluzha pa peja 3]
Bimye bya Kupwila:
Juba Jitanshi ne ja Bubiji
8:20 hrs. - 15:55 hrs.
Juba ja Busatu
8: 20 hrs. - 15:00 hrs.