Kupwila kwa Nkambi kwa Bakamonyi ba kwa Yehoba kwa “Londelainga Kilishitu!” kwa mu 2007
1, 2. (a) Mosesa watundaikile byepi bena Isalela kuba’mba bamwenengamo mu kupwila pamo? (b) Bintu ka byo twafwainwa kutendeka kunengezha lonka luno?
1 Mosesa wakambizhe bena Isalela bonse ne benyi bo baikalanga nabo kupwilanga pamo ku mpelo ya myaka itanu na ibiji, itanu na ibiji kuba’mba bakebatangile Mizhilo. Mambo ka? Na mambo a kuba’mba “bakomvwenga ne kufunda.” (Mpitu. 31:10-12) Yehoba wakebelenga’mba bantu banji bakonkanenga mu mabumba akatampe. Katatakatu bantu ba Yehoba bakekale na Kupwila kwa Nkambi kwa moba asatu kwa “Londelainga Kilishitu!”
2 Nanchi mwatendeka kwinengezha nyi? Abya mubena kukeba kulomba moba ku mukulumpe wenu wa nkito nyi? Nanchi mwakonsha kukwasha bo mufunjisha Baibolo ne ba mu kisemi kyenu babula Bakamonyi kuba’mba bakatanwe ku kupwila kwa nkambi nyi? Abya kujipo bamo mu kipwilo bakebewa bukwasho kuba’mba bakatanweko nyi? Nanchi mubena kulanguluka kuya na kukapwila ku mpunzha ingi kwabula kutongwelwa kipwilo kyenu nyi? Abya mukakebanga kwa kufikila? Mabulañano alondelapo akemukwasha kwinengezha.
3. (a) Nga Isaya 25:6 ubena kufikizhiwa byepi lelo jino? (b) Ki ka kyatanyiwa pa juba jitanshi ja kupwila kwa nkambi, kabiji twafwainwa kuba byepi atweba bonse pa muntu pa muntu?
3 Mukatanweko Moba Onse Asatu: Yehoba unengezhezha bantu banji kajo kavula ka ku mupashi. (Isa. 25:6) Kino kyavwangamo kijiilo kya ku mupashi kinengezhiwa pa kupwila kwa nkambi. Kyatanyiwa kuba’mba bavula kechi batanwako ku juba jitanshi byonka byo kikala pa moba akwabo ne. Monai kuba’mba mukatanweko moba onse asatu ku kupwila kwa nkambi kwitunengezhezha jibumba ja Yehoba! Umvwe mubena kukebewa kulomba moba ku mukulumpe wenu wa nkito, kilombaingapo. Apa bino ‘mukachinchike’ pa kwamba na mukulumpe wenu wa nkito aku babijikatu juba ja kupwila kwa nkambi. (1 Tesa. 2:2; Ne. 2:4, 5) Kyakonsha kukwasha inge mwamulumbulwila kuba’mba kupwila kwetu kwa nkambi kubiwa pa mwaka pa mwaka, ke lubaji lwa mpopwelo yetu. Kulombela jimo saka kukiji kimye kukakwasha mukulumpe wenu wa nkito kumona bya kuba pa kuba’mba emuswishe.
4. Twakonsha kukwasha byepi bo tufunjisha Baibolo ne ba mu kisemi kyetu babula Bakamonyi kukatanwa ku kupwila kwa nkambi?
4 Kukwasha bo Mufunjisha Baibolo ne ba mu Kisemi Kyenu: Byo mukasangalalapo pa kumona bo mufunjisha Baibolo batanwa ku kupwila kwa nkambi ne kwimwena abo bene lusekelo lwa bulongo bwetu bwa bwina Kilishitu “mu kipwilo kikatampe”! (Sala. 22:25) Babujilai jimo kuba’mba bakekale na kimye kya kutanwako. Babulai kimulengela kutanwa ku kupwila kwa nkambi. Mwakonsha kukwasha bo mufunjisha Baibolo pa byo kikala pa kupwila kwa nkambi kupichila mu kwibamwesha mavidyo abena kumwesha kupwila kwa nkambi kwa kala, kikatakata vidyo wa United by Divine Teaching. Bulaiko ba mu kisemi kyenu babula Bakamonyi pa byo mwanengezha. Kampe bakonsha kukeba kutambako kifwanyikizho nangwa kukatanwako ne anweba juba jimo ja kupwila kwa nkambi.
5, 6. Nga kusenda kajo kaesakana pa kuya na kupwila kwitukwasha byepi kabiji ñanyi mutembo atweba umo umo ye tuji nanji?
5 Kufuma ku myaka ya kunyuma kwe, lunengezho lwa kupwila kwa nkambi belupezhako. Betutundaika kukepeshako bintu bya kusenda kabiji ne kusendatu kajo kaesakana pa kuya na kupwila. Twamona kuba’mba bintutu bicheche ‘byo byafwainwa’ pa kuba’mba bitukwashe kumwenamo mu kupwila. (Luka 10:42) Kukepeshako bya kuja ne bintutu bikwabo byo tusenda pa kuya na kupwila, kikepeshako biswaswa ne kubula kutamisha mpunzha yetu. Nangwa kya kuba kijitu bulongo atweba bonse kuwamisha po twaikala ku mpelo ya juba ne juba, bino twafwainwa ne kumona’mba twasunga mpunzha yonse kwikala ya butooto juba jonse.
6 Yesu byo anengezhejile bantu bakila pa 5,000 kajo, kwajinga kwibekazha bulongo kabiji panyuma ya kupwisha kuja wakambizhe ponkapotu kuwamisha mpunzha po bajinga. (Luka 9:14, 15; Yoa. 6:10-13) Kwesakana na Mizhilo ya Mosesa, banabalume bakulumpe bapewe mwingilo wa kulama bulongo tubibamba twa kujiilamo mu nzubo ya Lesa. (1 Moba. 9:26) Nanchi twamona Yehoba byo akeba’mba tube nyi? Kyanema bingi kubula kusha bipepala, bintu byapwa nkito, mitumwa ne bizhiko, nangwa tubipompa po twaikala. Kometi ya kupwila kwa nkambi itunengezhezha mwa kutaya biswaswa, onkao mambo twayai twibingijishenga.
7. Ki ka kikakwasha bakulumpe ne baana kukokoloka bulongo pa kimye kya pachaile?
7 Bimye bya kuja kajo pa kupwila kwa nkambi byo bimye bansemi byo bakonsha kwisambilamo na baana babo bishinka bikatampe byaji kwambiwa mu majashi ne kwibasanchila na mambo a kutelekesha bulongo. (Monai fy-CW kitango. 1 pala. 2.) Nangwa kya kuba betutundaika kupitañana ne kupwanañana kuba’mba ‘twikwashe atwe bene na bene’ kimye kya kukokoloka, baana kechi bafwainwa kulekelelwa amba banyeme nyemenga, nangwa kwikala ‘babula kufundwa,’ ne kutendeka kwishindaika shindaika ne.—Loma 1:11, 12; Mana. 29:15.
8, 9. (a) Twakonsha kumwesha byepi muchima wa bumpanyi watongolwa mu 1 Timoti 6:18? (b) Ñanyi lunengezho lujipo lwa kukwasha bamo bakeba bukwasho bwa kutana kwa kufikila?
8 Kukwasha Balongo ne Banyenga: Mutumwa Paulo wabujile bena Kilishitu bajinga na bunonshi bwa ku mubiji ‘kuba byawama ne kwikala banonshi ba mu mingilo yawama, bekale bampanyi ba kukwashañana.’ (1 Timo. 6:17, 18) Twakonsha kumwesha muchima wa bumpanyi waambilepo Paulo umvwe twakwasha bakikulumpe ne babelabela, aba baji mu mwingilo wa kimye kyonse, bisemi mujitu nsemi umo, kabiji ne bakwabotu mu kipwilo bakonsha kukeba bukwasho pa kuba’mba batanwe ku kupwila kwa nkambi. Balongo babo baji mu bukine bo baji na mutembo wa kwibakwasha, bino bakulumpe mu kipwilo ne bakwabo bakonsha kumona byo kiji ne kwibakwasha umvwe kibena kukebewa.—Nga. 6:10; 1 Timo. 5:4.
9 Umvwe musapwishi mu kipwilo ubena kukeba bukwasho bwa kutana kwa kufikila, Kometi ya Mwingilo mu Kipwilo yafwainwa kumona umvwe awo musapwishi wafwainwa kunemba pepala wa Kwipuzhizhapo Kibamba. Saka mukyangye kutuma uno pepala ku Dipatimenti Inengezha Bibamba mwa Kulaala, mwafwainwa kukipituluka mu mikambizho ijipo.
10. Mikambizho ka yo twafwainwa kulondela pa kunengezha bya ñendelo?
10 Bipwilo bimo bikeba myotoka ya kwibatwala ku mapunzha a kupwila kwa nkambi. Motoka uji yense ubena kutwala bantu ku kupwila kwa nkambi wafwainwa kwikala wawama, waswishiwa kwenda pa mukwakwa. Myotoka kechi yafwainwa kusenda bantu bavula kukila pa kipimo ne. Kyawama kutongolapo mulongo umo wafwainwa kwikala kapitao wa kunengezha bya ñendelo. Ukabula jibumba bya lwendo, juba ne kimye kya kunyamuka apa kabiji ne pa mpunzha po bakapatamina. Umvwe jibumba jaikala na makatazho aji onse, kapitao wafwainwa kuyuka kino pa kuba’mba ebabule bya kuba. Umvwe kyatanyiwa’mba pabena kukebewa bukwasho, kufundañana, nangwa jishinda mwa kupwishisha lukatazho lumo, balongo bafwainwa, bakakonsha kwingijilapo.
11. Mikambizho ka yanengezhiwa umvwe mubena kukeba kuya na kupwila ku mpunzha ingi kukabula kutanwa kipwilo kyenu?
11 Kuya na Kupwila ku Mpunzha Ingi: Pa kuba’mba kukekale mpunzha yabaya pa kwikala, mabuku avula, bibamba mwa kulaala, ne bikwabotu, mwatundaikwa kutanwa ku kupwila kwa nkambi kwatongwelwa kipwilo kyenu. Umvwe kya kuba kuji bimo bikemulengela’mba mukapwile ku mpunzha ingi, kabiji ne kuba’mba mukakebanga kwa kufikila, mwane tumai pepala wenu wa Kwipuzhizhapo Kibamba ku babena kunengezha kupwila kwa nkambi ku yoyo mpunzha ko mukeba kuya na kupwila. (Monai mutanchi uji pa peja 5 ubena kumwesha moba a kupwila kwa nkambi kwa uno mwaka kukekela muno mu Zambia.) Umvwe ku yoyo mpunzha kukekala kupwila kwa nkambi kukila pa kumo, nembaipo mulaka ne moba akekelapo kupwila kwa nkambi ko mukatanwako.
12. Mambo ka o kyanengezhiwa kuba’mba kutuntulula kwa kwamba na maboko kukekaletu pa mapunzha amo asalululwa kwapwa?
12 Mulaka wa Kwamba na Maboko: Byonka byo kyamweshiwa mu kabokoshi mwatanchikwa moba ne mapunzha a kupwila kwa nkambi kukekala muno mu Zambia, kutuntulula kwa mulaka wa kwamba na maboko kukekalakotu PA MAPUNZHA ABIJI, Lusaka-English ne Ndola-English. KECHI KUKEKALAPO kupwila kwa mulaka wa kwa kwamba na maboko pa mapunzha akwabo ne. Luno lunengezho lulengela kutuntulula bulongo kabiji ne kwikala na mabumba abaya kuba’mba pekale kwikomesha ne kupwanañena pamo. Bakulumpe mu kipwilo ne bantuntuluzhi ba mulaka wa kwamba na maboko bafwainwa kubula bantu bashinka matwi baji mu bipwilo byabo pa luno lunengezho kabiji ne kwibakwasha kwinengezha kutanwa ku kupwila kumo pa kukwe kupwila kubiji kwa nkambi. Kabiji bakulumpe mu kipwilo bafwainwa kumona inge bantu bashinka matwi baji mu kipwilo kyabo babena kukebewa bukwasho.
13, 14. Lunengezho ka lo betunengezhezha saka tukyangye kufika pa mpunzha po tukapwila? (b) Twakonsha kumwesha byepi lusanchilo pa mingilo yonse yo betwingijila? (Tangai Bahebelu 13:17.)
13 Londelai Lunengezho Lwanengezhiwa: Umvwe twafika pa mpunzha pa kupwila, tumona kuba’mba mingilo yavula yaingijiwa kuba’mba tufikile pawama. Balongo babutemwe bapewa mwingilo wa buasha betwimuna, kwitupa mitanchi ya kupwila, ne kwitubula pa kwikala. Balongo ne banyenga bawamisha mpunzha ne kunengezha pulatifomu bulongo. Kabiji mingilo ikwabo ikatampe ingijiwa mu kunengezha majashi ne bintutu bikwabo.
14 Kupwila kwa nkambi kuji konse, bantu bavula bengila pa bañondo bavula kuba’mba banengezhe bibena kukebewa, kabiji bisemi byabo bikwashañana bingi kupichila mu kwibashilako kanya ka kwingijilamo bino bintu byanema. Nanchi kechi musanchila bano bantu bepana kuba’mba tumwenemo nenyi? Twakonsha kumwesha lusanchilo lwetu kupichila mu kulondela mikambizho yaambiwa mu kino kibaba kabiji ne mikambizhotu ikwabo yo tukapewa saka tukyangye kuya na kupwila. (Hebe. 13:17) Umvwe muntu yense waumvwina mikambizho na muchima yense kilengela bintu byonse ‘kubiwa na mushingi ne mo byalondakena.’—1 Ko. 14:40.
15. Mambo ka kupwila kwa bantu ba Yehoba o kwanemena mu ano moba etu? (b) Ki ka atweba bonse kyo twafwainwa kuba lonka luno?
15 ‘Byo tubena kumona aja juba kasa jibena kufwenya pepi,’ kupwila kwa bantu ba Lesa kwanema bingi. (Hebe. 10:25) Pa kupwila kwetu kwa nkambi kwa bwina Kilishitu, kalume wa kishinka ne wa maana ubulañana byambo bya kwitukwasha ‘kuteshako michima yetu kulama byambo byonse’ Yehoba byo akeba amba tulondelenga. (Mpitu. 31:12) Onkao mambo, tendekai kwinengezha lonka luno kukatanwako moba onse asatu ku Kupwila kwa Nkambi kwa Bakamonyi ba kwa Yehoba kwa “Londelainga Kilishitu!” kabiji ne kukamwenamo pakatampe mu mikambizho ya ku mupashi ne mu kupwanañena pamo na bakwenu!
[Kitenguluzha pa peja 3]
Bimye bya Kupwila
Juba Jitanshi ne ja Bubiji
8:20 hrs. - 16:15 hrs
Juba ja Busatu
8:20 hrs. - 15:35 hrs