Kupwila kwa Nkambi kwa mu 2000 kwa Bakamonyi ba kwa Yehoba kwa “Ba Kuba Kyambo kya kwa Lesa”
1 “Amiwa nkemusanchila mu kipwilo kikatampe: Nkemutota mu bantu bavujisha.” (Sala. 35:18) Fwanyikizhai Davida byo afwainwa kusangalala pa kumona biumbi ne biumbi bya bantu bavula sa bapwila pamo mu mutende kuba’mba bafundwe mikambizho ya kwa Lesa pa kupwila kwetu kukatampe mu ano moba etu a lelo! Nanchi mwajinga pakachi ka bantu 321,545 batainwe ku Kupwila kwa Nkambi kwa “Icebo ca Kusesema Ica kwa Lesa (Kyambo kya Bungauzhi kya kwa Lesa) nyi?” Kutatula pa 13 August kufika ne pa 12 September 1999, muno mu Zambia monse mwajinga Kupwila kwa Nkambi konse pamo 55. Kupwila kwetu kwa nkambi kwa mu uno mwaka wa 2000 kuketupa mashuko apya a kwipwizha pamo na bakwetu batota Yehoba, “bayuka byo bakajilwa ku mupashi” kabiji baji na lusekelo ne kizaku kya “[kumvwa] byamba mupashi ku bipwilo.”—Mat. 5:3,NW; Lum. 2:29.
2 Kunengezha bibamba mwa kulaala: Javula balongo benengezhezha abo bene kwikala na balongo babo nangwa balunda nabo baji ku bwipi na mpunzha kwaikela kupwila. Mu mapunzha a ku mizhi balongo batunga tumisakuta nangwa kulala mu madomitali anengezhiwa na bamingilo ya kwitemenwa ba pa ko ko kupwila. Pa kupwila kumo kumo bengijisha mazubo mulaala bana ba sukulu kuba’mba mulaala beya na kupwila. Inge mu benakwikala na balunda nangwa balongo benu, kechi kyawama kutainamo jishuko ja kwikajijila ne kunungako moba akwabo a kuba’mba mutushisheko pa nyuma ya kupwila ne. Bino bibamba ke byakwingijishatu pa kimye kya kupwila kwapwa. Abo babena kusungwa ku ano mazubo bafwainwa kumona’mba abo pamo ne bana babo banemeka nzubo ya muntu wibatambwila kabiji kechi bafwainwa kwikala na kisuse kya bintu nangwa kupalanguzha mu bipe nangwa kutwela kumyanzo yo babula kuswishiwa kutwelako ne. Umvwe bena nzubo batanyiwa na luno lukatazho, bafwainwa bukiji-bukiji kutwala luno lukatazho ku Dipatimenti itala pa Mazubo pa ko ko kupwila, kabiji balongo bakekala na lusekelo lwa kukwasha.
3 Kukwasha Bantu baKajilwa: Balongo, bakulumpe mu kipwilo ne bakwabotu mu kipwilo, bayuka lukatazho lwa bakikulumpe, balwazhi, balongo ne banyenga baji mu mwingilo wa kimye kyonse, ne bakwabotu bakajilwa, bakonsha kwikala na kijikila ne kumwesha kifyele kupichila mu kukwasha bano bantu kutanwa ku kuno kupwila. (esekanyaiko 1 Timoti 5:4) Fomu wa Sosaiti wa Room Request (kwipuzhizhapo kwa kulala) ulumbulula bintu bikebewa ku yewo muntu ubena kwipuzha nzubo mwakufikila. Luno lunengezho ke lwa basapwishi baji na byubilo byawama, pamo ne boba baji na bana bomvwina, abo baswishiwa na Kometi wa Mwingilo wa Kipwilo. Ano mafomu afwainwa kutumwa bukiji-bukiji ku Dipatimenti itala pa Mazubo.
4 Kwivimbila ku mujilo ne ku mapuso akwabo: Kwakubula nangwa kuzhinaukatune, kilengela kupilamo pa kuno kupwila kechi kuteka kwa kajo kwipi na musakuta ne, kilengela bino ke kulekelela bana kukaisha nangwa kukaila ku mujilo. Onkao mambo, pa kuba’mba mwivimbile ku mujilo anweba bene pamo ne balongo benu ba ku mupashi, kange mulekelele bana benu kupitañana bunke ne; kabiji kange mushile bana mema abena kuselauka’mba batalengamo, nangwa kwibashila mujilo ne. Nangwa kya kuba’mba ku nzubo bengila bingi bulongo, mpunzha pa kupwila ke ingi kabiji pakebewa kujimuka kukatampe pa kuba’mba mwivimbile ku mapuso. Bantu bavula bekala pamo, kabiji ne bana nabo batemwa kukaya bisela inge baji na bakwabo banyike. Balabikwa bingi bukiji-bukiji kabiji kechi bakonsha kumwena jimo mapuso eya ne, onkao mambo kechi twafwainwa kwibapa tundulu, mankishi nangwa malampi ne. Lukatazho lukwabo lumweka inge bansemi baya ku mapulogalamu kimye kya mute sa basha bana mu misakuta bunke kwakubula kusopwa. Bana bafwainwa kwikala pamo na bansemi yabo mukachi ka mapulogalamu. Inge baasha bamona bana sabapitañana bunke ku mpunzha ya kupwila kwakubula ne wa kwibasopa ne, bakonsha kwibabwezha kuji bansemi yabo. Twasansapo, anweba bansemi kwatankanai pamo na baasha ba pa kuno kupwila kabiji mu jino jishinda musakumwesha butemwe bwenu bwa ‘kutemwa balongo.’—1 Pe. 2:17.
5 Jibumba ja kwa Yehoba mu butemwe jipana bya kwituvululako mu kimye kyafwainwa pa mambo a kuno kupwila. Ke kya bulanda bingi kushimuna kuba’mba pa kupwila kumo kumo pa myaka yapita, bipe bya bamo byapijilemo na mujilo watemene na mambo a kubula kutako mana. Balongo baji na uno mwingilo pa kupwila, kikatakata bansemi, bakambizhiwa kuteshako muchima ku bino bishinka bikatampe pa kuba’mba kupwila kwetu kukekale kwa kwitukosesha na lumvwañano lwa wama, kabiji kechi kukekale kwa kufumamo bya bulanda na mambo a kubula kutako muchima kuleta mapuso kimye kimo ne.
6 Kuya na Kupwila ku mpunzha ingi: Kipwilo kimo kimo kya abenwa kutanwa ku kupwila kuji kwipi nako kyaikela. Kwesakana na mpendwa ya basapwishi bakonsha kutanwako, Sosaiti yeseka kuyuka nambala ya bantu bakatanwako kuba’mba inengezhe pa kwikala pawaina, mwa kulala, mabuku, kubikapotu ne bikwabo byafwainwa. Onkao mambo, umvwe paji ene mambo o mukebela kuya na kupwila ku mpunzha ingi yabula kulamatako kipwilo kyenu ne, kanemba wa kipwilo kwenu wafwainwa kuoda fomu wa Room Request (kwipuzhizhapo kwa kulala) kufuma ku Sosaite, ye mu kanembapo ne kusaina. Apa bino uno fomu akatumwe ku mpunzha ko mubena kukeba kuya na kupwijilako.
7 Mwinengezhe kutanwako Moba Onse Asatu: Nanchi Satana waesekapo kala kwimulabika kubula kuta mana ku bintu bya ku mupashi nyi? Ke kya bulanda bingi kuba’mba, balongo ne banyenga bavula pamo ne bisemi byabo babena kushalapo pa kino kya kuja kikatampe kya ku mupashi. Mu ñanyi jishinda? Pa kubula kutanwako pa juba jitanshi ja kupwila kwa nkambi. Kyatanwa kuba’mba mu bimye bimo, balongo betu bavula bashalapo pa mikambizho ya ku mupashi ne lumvwañano lwikalapo pa juba jitanshi.
8 Kya kine kuba’mba balongo bamo bachina kufikila jimo ku bakulumpe ba pa nkito yabo kuba’mba balombe luusa lwa moba a kuya na kupwila. Nanchi nenuwa lo lukatazho lo muji nalo nyi? Mambo ka o mwabujila kwikibika mu lulombelo kwi Yehoba pa kuba’mba muchinchike pa kulumbulula bino ku bakulumpe benu ba nkito? Vulukai buwame bwamwekejile Nehemiya, wajinga mu lukatazho na biji lwenu. (Ne. 2:1-6) Ikalai na luketekelo mwi Shetu wa mwiulu lwa kwimukwasha, kuyuka kuba’mba umvwe mwasambila kukebesha bufumu patanshi, ukemubikilapo bimufwainwa mu bwikalo bwenu.—Mat. 6:32b, 33.
9 Nanchi Kupwila Kwetu Kwimwalula Byepi? Nyenga umo wanembele’mba: “Nemusanchila bingi pa kupwila kwa nkambi kwa mu 1999. Kupwanañana na balongo bomonañanatu nabo kimye kimotu pa mwaka kundetela bingi lusekelo. Natatwile kufunda kiine sanji na jimi ja mu bwanyike bwami, kabiji nkivulukishatu kimye mufunjishi wami wa Baibolo kyo ansendele kimye kitanshi kuya na kupwila kwa nkambi. Natajilenga mu jibumba kimye kyo twajinga mu kibanza aku satwimba lwimbo wa bufumu wa kuba’mba ‘Iminshipendwa ya Bamunyina,’kabiji kino kyandengejile kulakasha mipolo. Neshikishe ami mwine kuba’mba, ‘Nanchi Yehoba wamwene byepi amiwa pa bantu bonse be, bawama bibye banzhokoloka?’ Jonkaja juba nafukwile kwingijila Yehoba na muchima yense.” Byo kyansangajikapo! Ke kintu kya lusekelo bingi kupwila pamo na bantu ba kwa Yehoba ba butooto, ke ibyo nenyi?
10 Byo tuji mukachi ka moba a ku mpelo, tukeba kupwila kwetu kwa pa mwaka pa mwaka kukila kala. Ke nkokozhezho ya kwa Yehoba kusungijila butuntulu ne bukose bwetu bwa ku mupashi. Onkao mambo, kebeshai kutanwako moba onse asatu ku Kupwila kwa Nkambi kwa uno mwaka kwa “ Ba Kuba Kyambo kya kwa Lesa.” Mwakonsha kufikizha byepi uno mulanguluko wenu? Lombai luusa ku bakulumpe ba nkito yenu sakukiji kimye, kuba’mba bemupe luusa lwa kukatanwa ku kupwila konsetu. Umvwe mashinda mwakutaina mali emukatazha, tatulaiko lonkaluno kusungila jimo mali. Lombai kwi Yehoba kwimukwasha kushinda lukatazho lonse. Byo mubena kwinengezha byo byo, ko kuba’mba mubena kupembelela kukeyowa lumvwañano lwa biyampe na balongo ne banyenga yenu ba ku mupashi ne kumvwa ku byambo bya bumi bwa myaka ne myaka kufuma kwi Yehoba, Shetu wa mwiulu.—Esekanyaiko Yoano 6:68.
MONAI KUBA’MBA: Kanemba mu kipwilo kimo kimo usakukatangijila mingilo yonse yatazha ku kupwila kwa nkambi ne kwikala na kizaku kya kwingijilapo. Umvwe kanemba ufwapo, mukulumpe mukwabo wafikapo mu kipwilo wafwainwa kutangijila ino mingilo. Kanemba wafwainwa kupitamo bukiji-bukiji mu mikambizho na biji pa kulaala, ne nkito ya kwifukwila ne bintu bikwabo byanengezhiwa mu nkalata yatumwa na babena kunengezha kupwila. Pafwainwa kwikalako kimye kyabaya pa kupwila kwa kipwilo pa kuba’mba kanemba atange bulongo (Kechi kutanga lubilo-lubilo ne) ne kulumbula makalata onse a kupwila kwa nkambi.