Inengezhai Kufunda Bungauzhi bwa Isaya!

¹ “Bapopweshi bakishinka baketekela’mba Yehoba ... kechi ukaleka ntanda ya kwa Satana kutwajijila ne.” Bino byambo byo bibena kwitukoseshapo! Byafuma pi? Byafuma mu buku wa Ukusesema kwa kwa Esaya—Ulubuuto lwa Bantu Bonse I. Nanchi bungauzhi bwa Isaya bwitubulapo bishinka byalengela kuba’mba twambe byambo bya kwitukosesha bya yewo mutundu nyi? Ee! Uno buku wa mu Baibolo wakonkomwenapo bingi bulongo kuba’mba kukekala lupulukilo. (Isa. 25:9) Kyo kyo betukoseshesha bingi kufunda uno buku wa mu Byambo bya Lesa pa Kupwila kwa Lufunjisho lwa Buku. Abya tukatanwangako na kufunda mulungu ne mulungu nyi? Mambo ka o tukatainwangako?

² Pa Isaya 30:20, Yehoba watelwa’mba “Mufunjishi [Mukatampe, NW].” Mwina Kilishitu yense wafwainwa kumvwisha Yehoba byo abena kwitufunjisha mu Byambo byanji ne mu mabuku alumbulula Baibolo anembwa na ‘kalume wa kishinka ne wa maana.’ (Mat. 24:45; Isa. 48:17, 18) Byo byo tukobanga ne na buku wa Ukusesema kwa kwa Esaya I. Mwakonsha kuba byepi pa kuba’mba mukomvwishenga bishinka pa kufunda uno buku?

³ Nengezhai Kuba’mba Mukakumbulengapo: Ikalaipo na kimye kyafwainwa kya kunengezhezhamo lufunjisho lwa buku mulungu ne mulungu. Tangai mapalagalafu onse abena kufunjishiwa yewo mulungu. Langulukaipo pa jipuzho ne jipuzho. Nembai tushilwa paji mikumbu mu buku wenu. Mavesi anembululwa kufumu mu Isaya anembwa mu bisopelo bifita. Atangishai bulongo. Tangai binembelo bikwabo byamweshiwa pa kuba’mba mumvwishe byo byakwatankana na byambo bibena kwambiwapo. Languluka-langulukaipo pa byo mubena kufunda. Apa bino mukumbulepo pa kuba’mba bakwenu bo muji nabo pa lufunjisho lwa buku nabo bafundeko ku byo mwanengezha.

⁴ Mulongo ubena kutangijila lufunjisho lwa buku wafwainwa kukwasha bonse batanwako kutanga Baibolo ne kumvwisha buneme bwa byambo bibena kufunjiwa ne byo byakonsha kwingila. Umvwe bemutongola kukumbulapo, kumbulai mukumbu wapela kabiji ubena kwamba pa bishinka. Umvwe umo wakumbulapo kala, mwakonsha kunungapo byambo bikwabo bibena kukosesha kishinka kibena kwambiwapo. Kimo kimye mwakonsha kwamba pa kinembelo muji kishinka kikatampe kibena kulumbulula mutwe ye mubena kufundapo. Esekai kukumbula mu byambo byenu, ne kwikala na lusekelo mu nkumbwilo yenu.

⁵ Twayai tutepo muchima na kufunda byambo byanema biji mu buku wa Isaya. Biketukosesha kwikala basangalala juba ne juba byo tubena kupembelela lupulukilo kufuma kwi Yehoba!—Isa. 30:18.