Mapesho Afuma Mukusanchila Butemwe bwa Yehoba—Lubaji 1
1 Mutumwa Yoano wanembele’mba: “Atweba tutemwañana mambo [Yehoba] witutemenwe patanshi.” (1 Yoa. 4:19) Umvwe twalanguluka pabyonse Yehoba byoetupa, bitulengela kumusanchila pakatampe bingi. Yesu wajinga wakumwenako mukino byoasapwijilenga mambo ajizhina ja Lesa ne Bufumu. (Yoa. 14:31) Kyawama bingi kulangulukapo mashinda amo motwakonsha kumweshesha lusanchilo lwakusanchila butemwe bwa Yehoba nemapesho afumamo.
2 Kuya Kunzubo Nenzubo: Yesu wafunjishe baana banji babwanga byakwingila mwingilo wakusapwila mambo a Bufumu. Mikambizho yanji yoebabujile imwesha patoka kuba’mba bailenga kunzubo nenzubo nakusampanya mambo awama. (Luka 9:1-6; 10:1-7) Kikebewa patanshi kutemwa Lesa nebantu bakwetu pakuba’mba tutwajijile nakusapwila kunzubo nenzubo nangwa kyakuba bantu babena kukana nekwitulengulula. Onkao mambo, byotuya kunzubo nenzubo tumwenamo mfweto atwe bene mambo lwitabilo neluketekelo lwetu bikoselako nekwituletela lusekelo.
3 Byotwingila nalutangijilo lwabamalaika tumwenamo mapesho mambo tutana baji nanzala nekilaka kyakukeba kufunda bukine. (Lum. 14:6) Bantu botutana pamazubo bamba’mba nabalombengatu namba kine mmonepo Kamonyi afike panzubo yami. Bakamonyi babiji ne mwanyike mucheche basapwijilenga kunzubo nenzubo pajikuji ja Caribbean. Bakulumpe byobakebelenga kukotoka, mwanyike aye watwajijile bunke nekuya nakukonkonsha panzubo yalondejilepo. Wamukazhi washinkwileko. Bakulumpe byobamwene kino, baileko nekukesamba nanji. Wibechile munzubo nekwibambila’mba ubalombenga kwi Lesa amba atumepo Bakamonyi kwiya nakumufunjisha Baibolo!
4 Kusapwila Mumikwakwa: Kumapunzha amo byokyashupa kutana bantu pamazubo, kusapwila mumikwakwa kejishinda jimo jawama kusapwilamo. Kikwabo, bavula bekela mumapunzha akatazha kotwakonsha kukankalwa kuya nakusapwila kunzubo nenzubo. Bino nangwa byonkabyo, lusanchilo lwetu lwakusanchila butemwe bwa Yehoba lwitutundaika kwingijisha mashinda onse otwakonsha kwambilamo nabantu mambo a Bufumu, kuvwangako nebusapwishi bwamumukwakwa.—Mana. 1:20, 21.
5 Kubwelako: Mambo akuba tukeba boba “bata muchima kumupashi,” tukeba kwingila nangovu yetu yonse kwibakwasha kutana kyobakeba. (Mat. 5:3, NW) Kino kikebewa kubwelako nakutekezha nkunwa yabukine yotwabyajile. (1 Ko. 3:6-8) Nyenga umo mu Australia washile talakiti kumwanamukazhi wamwekele nobe kechi wateleko muchimane. Bino, nyenga wakoseleko nakukeba pajinga nzubo yanji. Byoamutaine, nyenga yetu wataine kuba’mba panyuma yakumufwakesha kimye kitanshi, uno mwanamukazhi wapotele ne Baibolo yabaya mutengo. Uno nyenga watatwile kufunjisha yewa wamukazhi!
6 Kufunjisha Mafunjisho a Baibolo: Luno kelubaji lumo lwamwingilo lwawama bingi nekumwenamo mfweto. Kine, kejishuko jikatampe bingi kukwasha bantu kufunda amba bayuke Yehoba nekubamo kupimpula bwikalo bwabo bwakumutokesha pamuchima, kabiji nekumwesha patoka kwipana kwabo mulubatizhilo lwabwina Kilishitu kwi Lesa!—1 Tesa. 2:20; 3 Yoa. 4.
7 Mu ukalondelapo, tukesamba pamashinda akwabo motwapeshiwa namambo akusanchila butemwe bwa Yehoba.