Baishai Lusekelo Lwenu Mumwingilo Wakusapwila
1 Abya mwikala nalusekelo lwakusapwila mambo awama kimye kyomuji mumwingilo wenu wabusapwishinyi? Umvwe nekujimukane, bantu batama baino ntanda bakonsha kwitulefula mumwingilo wakusapwila, nekwitupwishisha lusekelo. Kusapwila munyaunda muji bantu babula kutambwila mambo awama nako kwakonsha kwitulefula. Pano twakonsha kuba byepi kuba’mba tutwajijile balusekelo mubusapwishi?
2 Ikalai Naluketekelo: Kwikala naluketekelo kukwasha bingi. Jishinda jimo jakubilamo bino kekulanguluka-languluka pajishuko jikatampe jotuji najo jakwingila “mu mwingilo umo ne Lesa.” (1 Ko. 3:9) Yesu naye uji neatweba muuno mwingilo. (Mat. 28:20) Kabiji witukwasha nabamalaika. (Mat. 13:41, 49) Twaketekela namba mwingilo wetu ubena kutangijilwa na Lesa. (Lum. 14:6, 7) Onkao mambo, kemambone nangwa kyakuba bantu bamo baumvwa nangwane, byamwiulu abyo bisekela bingi!
3 Nengezhai Bulongo: Kunengezha bulongo nako kwituletela bingi lusekelo. Kwinengezha kwakuya mumwingilo kechi kwafwainwa kwikala mwingilo wakatazhane. Pataiwatu kakimye kacheche kakulanguluka pamutwe umo wakwisambapo mumagazini abukumo nangwa buku ubena kutambikwa yewo ñondo. Salaipo ñambilo imo mu Mwingilo Wetu wa Bufumu, pamutwe wakuba’mba “Byakwamba Pakutambika Magazini.” Monai kyamukachi kya January 2002, pamutwe wakuba’mba “Ñambilo imo Yakwamba Mumwingilo Wamubujimi,” nangwa monai ñambilo imo yakonsha kwingila bulongo iji mubuku wa Ukupelulula. Umvwe benamazubo bemwipuzha mepuzho akosa obepuzhapo javula, nengezhai mukumbu wakonsha kukumbula jojo jipuzho, apa bino muletepo mutwe ubena kwamba pabyakonsha kukeba kutelekako. Buku wa Ukupelulula ukwasha bingi pakuba bino. Kwingijisha ano mashinda kuketupa luketekelo lotukeba pakusapwila nalusekelo.
4 Lombai Namukoyo: Lulombelo lukebewa bingi pakuba’mba tutwajijile kwikala balusekelo. Byotubena kwingila mwingilo wa Yehoba, twafwainwa kumusashijila’mba etupe mupashi wanji, mambo lusekelo kekipangwa kimo kyamupashi. (Nga. 5:22) Yehoba uketupa bulume bwakutwajijila nakusapwila. (Fili. 4:13) Kulombela mwingilo wetu kwakonsha kwitukwasha kumona bintu monka mobyafwainwa kwikela umvwe twabula kumona byawama. (Byu. 13:52; 1 Pe. 4:13, 14) Umvwe twaumvwa moyo, lulombelo lwakonsha kwitukwasha kukosako satwachinchika nekwikala balusekelo.—Byu. 4:31.
5 Monaipo Kimye: Mwingilo wetu uwama umvwe satutana bantu nekwibasapwila. Kupimpula mutanchi wetu wakusapwila kunzubo nenzubo pabimye byapusana-pusana, nabiji mubimye byamabanga nangwa kimye kyakulemba juba, kwakonsha kwitulengela kutana bantu botwakonsha kusapwila. Kimye kyonse kyomwenda mujishinda, kyomuya nakupota byakupota-pota, kyomuji mumotoka, nangwa kimye kyomufwakesha mapunzha awama, mutana bantu. Nga mamboka akubula kunengezhezha ñambilo imo nekusolomokapo bamo babena kumweka’mba bakeba kwisamba nabo? Kimo kimye mwingila nkito nangwa muya kusukulu, komwisamba nabakwenu juba nejuba. Mwakonsha kushukilwapo kimye kyakusapwila pakuletapotu mutwe umo wamu Binembelo wakonsha kutundaika bantu kumvwa. Ñambilo imo yawama iji papeja itanshi mukyamukachi kya Mwingilo Wetu wa Bufumu January 2002. Ano onse mashinda akonsha kubaishako lusekelo lwa muntu mumwingilo wakusapwila.
6 Lusekelo byolwitukwasha kuchinchika, kyanema bingi kwilusunga! Umvwe twauba bino, tukanowa mfweto ikatampe bingi muuno mwingilo ukabula kubwezhiwapo byoakapwa. Luno luketekelo lwakonsha kubaishako lusekelo mumwingilo wetu wakusapwila.—Mat. 25:21.