Kwashaingako Bakote Bakishinka
1 Nangwa kyakuba Ana wajinga mwanamukazhi wafwilwa kabiji mukote wamyaka yakusemwa 84, ‘kechi walupukilenga mu nzubo ya Lesa ne.’ Yehoba wamupesheshe bingi namambo abukishinka bwanji. (Luka 2:36-38) Nelelo jino, balongo nebanyenga bavula bamwesha byubilo byajingapo na Ana, nangwa kyakuba bapita mumakatazho. Bano bakishinka byobapita mumakatazho abutuntulu bwamubiji, nekupelelwa namambo abukote, kimo kimye bakonsha kwiumvwa balefulwa. Twayai twisambe pamashinda amo motwakonshesha kwibatundaikila nekwibakwasha pakuba’mba batwajijile nabintu byakumupashi.
2 Kupwila Nemwingilo Wamubujimi: Umvwe bamo mukwitemenwa sabanengezhapo byañendelo yakuya nakusendako bakote bakishinka, kyakonsha kwibakwashako bingi bakote kutanwanga kukupwila kimye kyonse. Kino kikosesha bano bakalume baingila myaka yavula bakishinka kumupashi kabiji nekipwilo nakyo kimwenamo bingi mfweto mubano. Abya mwakibakwashapo kala muuno mwingilo wawamanyi?—Hebe. 13:16.
3 Kuya kimye kyonse mumwingilo wamubujimi kuleta bingi lusekelo lwabwina Kilishitu. Pano bino, kino kikatazha bingi bakote neboba babula bulume bwakwingijisha namambo amisongo. Abya mwafwainwa kwendapo naumo mutemwe wetu wabyonkabye ‘mukwenu wakwingila nanji’ kimye kimo mumwingilo wabusapwishinyi? (Loma 16:3, 9, 21) Kampe mwakonsha kumwitako kuba’mba engile neanweba busapwishi bwapa foni nangwa kuya nanji kubantu bomwasapwijile nangwa kulufunjisho lwa Baibolo. Umvwe kyakuba awo mukote wikalatu panzubo kechi wendane, nanchi ubena kufunda Baibolo wakonsha kwiya kunzubo yauno mukote kuba’mba afunjilekonyi?
4 Kufunda Nekupwañena Pamo: Pakimye nekimye, bamo betako bakote nangwa boba babula bulume bwakuba bintu namambo amisongo kufunjila nabo pamo lufunjisho lwakisemi, nekimye kimo kufunjila monka munzubo yayewo wabula bulume. Inetu umo watwajile baana banji babiji kunzubo yanyenga umo mukote nakufunjilako lufunjisho lwabo mubuku wa Icitabo Candi ca Malyashi ya mu Baibolo, kabiji bekoseshe bingi bonse pakokwa kupwañana. Kabiji bantu bauno mutundu basanta bingi umvwe bebetako nakuja kajo nangwa kubintutu bikwabo. Umvwe bantu babula bulume bwakuba bintu bakolwa bingi kyakukankalwa kubapo kintu, kampepo mwakonsha kwibafwakesha nangwa kuchimpukilapotu nekwibatangilapo kinembelo, nangwa kwisamba nabo mwisambo wakwikomesha.—Loma 1:11, 12.
5 Yehoba wibanemeka bingi bakote bakishinka. (Hebe. 6:10, 11) Neatweba twafwainwa kumulonda kupichila mukwibanemeka bakote nekwibakwashako kutwajijila kuba bintu byakumupashi.