Kabokoshi Kamepuzho
◼ Kimyeka kyafwainwa kulenga jibumba jabantu bamba mulaka ungi?
Umvwe munyaunda yakipwilo mwikala bantu bavulako bamba mulaka ungi, bakulumpe mukipwilo bafwainwa kwingila nangovu nekunengezha kuba’mba bano bantu basapwilwenga muyewo mulaka. (Km-KD 7/02 pe.1; km-CW 2/98 mape. 3-4) Apo kampe bano bantu bamba mulaka ungi bekala mumanyaunda abipwilo bibiji nangwa abipwilo byavula biji kipi-kipi. Mujino jishinda, Mukulumpe Wakijiiji wafwainwa kupana mikambizho yakukwasha bipwilo biji naano manyaunda kukwatankena pamo mumwingilo wabusapwishi. Umvwe papita kimye, bafwainwa kupwila nekumvwa jashi jamvula-bantu nangwa lufunjisho lwa Kyamba kya Usopa kuba’mba muyukenga kibelengelo kyabantu babena kutanwako.
Jibumba jabantu bamba mulaka ungi jakonsha kulengwa inge kyakuba abo bantu baji bino: (1) Umvwe muji basapwishi nangwa bantu baji nalusekelo lwakukeba kufunda bukine bomvwisha mambo awama muyewo mulaka ungi. (2) Mukulumpe nangwa nkwasho wafwainwa poaji wakonsha kutangijilanga nangwatu kampe kupwila kwamulungu nemulungu jimo. (3) Umvwe jibumba jabakulumpe mukipwilo bepana kukakoseshanga jojo jibumba. Bino byonse byatongolwa umvwe byaikalako, bakulumpe mukipwilo bafwainwa kuyukisha ofweshi yamusampi kuba’mba jibumba jiyukanyikwe nekupana mikambizho ikwabo.
Mabumba avula atendekelapo kwikala na Lufunjisho lwa Buku Pakipwilo mulungu nemulungu. Panyuma yabino, bakulumpe mukipwilo bakonsha kuswisha kuba’mba bekalenga nakupwila kukwabo nabiji Kupwila kwamvula-bantu ne Lufunjisho lwa Kyamba kya Usopa. Majashi Na. 2, 3, ne 4 amu Sukulu ya Mwingilo wa Teokalasi akonsha kubiwa mukalasilumu ingi, inge paji mukulumpe mukipwilo nangwa nkwasho wafwainwa kutangijila bulongo kwikala wakufundañana. Pano bino, saka bakyangye kuya mukalasilumu yabo bafwainwa patanshi kumvwa jashi jakufunda, jashi ja bishinka bikatampe kufuma mukutanga Baibolo, apa bino ne Kupwila Kwamwingilo pakupwa sukulu. Kupwila kwakwinengezha kuya mumwingilo wamubujimi nako kwafwainwa kunengezhewa mujino jibumba.
Jibumba jonse jafwainwa kulamwa na jibumba ja bakulumpe mukipwilo. Bakulumpe mukipwilo bafwainwa kupana mikambizho yafwainwa mukwesakana nekwikala nakizaku kyakukwasha jibumba mubibena kukebewa. Umvwe Mukulumpe Wakijiiji wafwakashisha kipwilo kijimo jino jibumba, ukanengezha kwingijila pamo najino jibumba mumwingilo wabusapwishi pakuba’mba jikome kumupashi. Nabukwasho bwa Yehoba mwine, mukupita kwakimye jino jibumba jamba mulaka ungi jakonsha kwikala kekipwilo.