“Musamenga Pamo Nobe Byeya”
1 Nangwa kyakuba tuji mu buno bwikalo mwayula mfishi ya ku mupashi ne byubilo byatama, bantu 6,000,000 bapopwela Lesa wakine Yehoba, babena ‘kusama pamo nobe byeya’ mu byalo 234 kuzhokoloka mwaya ntanda yonse. (Fili. 2:15) Kino kituyukanyikisha ku bantu. Nanchi tumwesha byepi kyeya kyanema kya bukine kifuma kwi Yehoba?—2 Ko. 3:18.
2 Byubilo Byetu: Bantu bapelawizha bingi kumona byubilo byetu. (1 Pe. 2:12) Wamukazhi umo wimwenejile kuba’mba Kamonyi mwanamulume umo yeaingilanga nanji nkito wajinga bingi na kifyele ne kukwashañana, kabiji kechi waambangapo ñambilo ya bunya nangwa kusekako bisela byabula kufwainwa ne. Umvwe bamo ke ba mutendeke uno Kamonyi na kumwambila ñambilo yatama sa omvwako ne mwine, kechi waubanga bukaji ne, watwajijilangatu kuba byawama. Kino kyakwashishe byepi mwanamukazhi? Uvuluka’mba: “Nakomokele bingi byubilo byanji kine natatwile ne kumwipuzha mepuzho pa mambo a Baibolo. Natatwile kufunda Byambo bya Lesa, kepo mu kupita kwa kimye nabatizwe.” Kabiji wanungilepo’mba: “Byubilo byanji byo byandengejile amba mpalanguzhe lwitabilo lwa Bakamonyi bakwa Yehoba.”
3 Mushingi ye tumwesha ku bantangi, kuchinuzhuka byubilo bya ino ntanda, ne ñambilo yetu yawama itulengela atweba Bakamonyi bakwa Yehoba kwituyuka kuba’mba twi bantu bakokela mafunde a mu Baibolo. Byubilo byawama bya uno mutundu bileta lukumo kwi Yehoba ne kukokela bantu ku mpopwelo yanji.
4 Kwisamba Nabo: Pano bino bantu bamona byubilo byetu byawama kimo kimye kechi bakonsha kuyuka byo twapusanako ne, kanatu umvwe twisamba nabo pa bintu byotwaitabilamo. Nanchi bo mwingila nabo mingilo nangwa bo mufunda nabo sukulu bayuka kuba’mba mwi Bakamonyi bakwa Yehoba nyi? Abya kimye kyomwisamba na bakwenu mumonapo mumo mwakuba mwibasapwila nyi? Nanchi mwafuukula kuba’mba “kyeya kyenu kimweke ku meso a bantu” pa kimye kijitu kyonse kyafwainwa nyi?—Mat. 5:14-16.
5 Pa kuba’mba twingile uno mwingilo wetu wa kusamisha kyeya, twafwainwa kwipana atweba bene. Kwipana kwa na muchima wetu yense kuketukwasha kubula kuta muchima ku bintu byabula kunema kuba’mba twingile na ngovu mu mwingilo wa kupulusha bantu wa kusapwila ne kulenga baana ba bwanga.—2 Ko. 12:15.
6 Twayai tutwajijile kusama pamo nobe byeya, mu byubilo byetu ne mu byambo byetu. Umvwe twauba bino, bantu bakonsha kutundaikwa kwiya na kwivwanga ne atweba mu kupana lukumo kwi Yehoba.