Lutakaiko Lukoseshañana
1 Byo kyaubile ke kimye kya kulaala kashimbi aku saka ashikunuka waambile’mba: “Nanchi lelo kechi naji kutekanya ne nyi?” Jino jipuzho jakumishe bingi bainanji. Nangwa kya kuba pa jino juba bainanji bemwenejile abo bene uno kashimbi byo atekenye kwa kubula nangwa kulubankanyapo, kechi baambilepotu nangwa kyambo kimo kya kumutakaika ne. Kujila kwa uno kashimbi na mambo a kubula kumutakaika kwituvululako kuba’mba atweba bonse, banyike ne bakulumpe, tukeba kutakaikwa. Nanchi aba botwikala nabo kinkalankulo twibakosesha kupichila mu kwibatakaika pa bintu byawama byo boba nyi?—Mana. 25:11.
2 Bena Kilishitu bakwetu bengila mingilo yawama yavula yo twafwainwa kwibatakaikilapo. Bakulumpe mu kipwilo, bankwasho, ne bapainiya bengila bingi na ngovu mingilo yabo. (1 Timo. 4:10; 5:17) Bansemi baji na moyo wa kwakamwa Lesa bengila papelela bulume bwabo kukomesha baana babo mu mashinda a Yehoba. (Efi. 6:4) Banyike ba bwina Kilishitu bengila na ngovu kushinda “mupashi wa panopantanda.” (1 Ko. 2:12; Efi. 2:1-3) Bakwabo nabo bamwingijila Yehoba nangwa kya kuba bakota, bakolwakolwa, nangwa bapita mu meseko akwabo. (2 Ko. 12:7) Abano bonse bafwainwa kwibatakaika. Nanchi twibamona byo bengila ino mingilo yabo yafwainwa lutakaiko nyi?
3 Lutakaiko lwa Kushinkamika: Kine atweba bonse tusanchila bingi lutakaiko lo tumvwa mu kipwilo. Bino, lutakaiko lukilapo kukoseshañana umvwe betutakaika pa muntu pa muntu. Kya kumwenako, mu kyapitala 16 kya nkalata ya ku bena Loma, muji byambo bya kushinkamika Paulo byo anembele bya kutakaika ba Fibe, Pilisila ne Akwila, Tilifena ne Tilifosa, ne Pelesisi. (Loma 16:1-4, 12) Bino byambo byanji bibakoseshe bingi aba bantu bakishinka! Lutakaiko lwa uno mutundu lulengela balongo ne banyenga yetu kuyuka’mba kine twibakabila kabiji lwitukwatankenya pamo. Nanchi mwatakaikapo kala muntu katataka pa po nyi?—Efi. 4:29.
4 Kufuma Panshi ya Muchima: Pa kuba’mba tukoseshañane, lutakaiko lwafwainwa kwikala lwa kine. Bantu bakonsha kuyuka byo tubena kwamba umvwe kya kuba bibena kufuma panshi ya muchima, inyi kana tubena ‘kwambatu bya mulambisha.’ (Mana. 28:23) Byo twifunjisha atweba bene kumona byawama mu bakwetu, muchima wetu uketulengela kwibatakaika. Twayai twikale bakishinka mu kutakaikañana kwa kine, byo twayuka’mba “kyambo kyayila monka mwayila bintu byamweka byo kyawama!”—Mana. 15:23.