Tainga Bantu Muchima—Kupichila mu Kwibatakaika
1 Kutakaika bantu kufuma mu muchima kutundaikañana bingi, kabiji kwibalengela kubapo kintu kimo ne kwibaletela lusekelo. Basapwishi bavula bekitana kuba’mba, byambo bichechetu bya lutakaiko, javula bilengela bantu kumvwa bintu byo tubena kwamba mu mwingilo. Twakonsha kutakaika byepi bantu kimye kyo tubena kukeba amba twisamba nabo mambo awama?
2 Talatalainga: Panyuma ya kuba Yesu Kilishitu waya mwiulu, watajilenga byawama mu bipwilo bitanu na bibiji bya mu Asha Maina. (Lum. 2:2, 3, 13, 19; 3:8) Mu jishinda jimotu, kuta bantu muchima kya kine bo tutana mu mwingilo, kuketulengela kumonapo bimye bya kwibatakaikilamo. Kya kumwenako, lubanza wasungwa bulongo, nsemi uji na kifyele na baana banji, nangwa lusekelo lwa mwina nzubo ne lwimu lwanji, byakonsha kwitupa kimye kya kumutakaikilamo. Nanchi mutalatala ne kwingijisha bulongo bino bintu nyi?
3 Telekeshainga Bulongo: Kimye kyo mubena kusapwila bantu, bepuzhai kwiambila abo bene bintu biji ku muchima kupichila mu kwibepuzha mepuzho awama. Bamweshai mushingi kupichila mu kutelekesha bulongo bintu byo babena kwamba. (Loma 12:10) Mu bintu byo bakonsha kwamba, mwakonsha kutanamo bimo byakonsha kwimulengela kwibatakaika kabiji ne kutendeka mwisambo kwesakanatu na bintu byo baamba.
4 Ikalainga na Milangwe: Twafwainwa kuba byepi umvwe mwina nzubo waamba bintu bimo byabula kwesakana na bukine bwa mu Baibolo? Mu kifulo kya kukana byo aamba, musanchila apa bino mutwajijile na byambo biji nobe bino, “Namona’mba uno mutwe mwamutemwa bingi.” (Kolo. 4:6) Nangwa kya kuba muntu uji bingi na mapata, twakonsha kumutakaika na mambo a kutemwa yewo mutwe. Nsolomokelo ya uno mutundu yakonsha kufomona muchima wa muntu watemwa bingi kuba mapata ku mambo awama.—Mana. 25:15.
5 Pa kuba’mba twikale batundaikañana, kutakaika kwetu kwafwainwa kwikala kufuma panshi ya muchima. Kwingijisha ino ñambilo ikomeshañana kutumbijika Yehoba kabiji kwakonsha kukebwila bantu ku mambo a Bufumu.