Tainga Bantu Muchima—Kupichila mu Kutalatala
1 Yehoba Lesa ne Kilishitu Yesu bayuka bingi bintu bikajilwa bantu kabiji bayuka ne mwa kwibakwashisha. (2 Moba. 16:9; Mako 6:34) Inge twayuka bintu byatemwa ne byo bakeba bantu botutana mu mwingilo wetu, twakonsha kuyuka mwa kwambila mambo awama.
2 Tajishainga Bintu: Yesu watajishanga bintu. (Mako 12:41-43; Luka 19: 1-6) Mu jishinda jimotu, ne atweba umvwe twafika pa nzubo ya muntu ne kumona bintu byo akobaika kobaika bya bupopweshi, byambo byanembwa pa myotoka, nangwa tubintu twakukaisha tuji pa lubanza, kyakonsha kwitukwasha kuyuka mwakwambila bulongo mambo awama.
3 Mwekanyikilo ya kilungi ne bibena kuba muntu byakonsha kwitubula kyo abena kulanguluka. (Mana. 15:13) Kampe na mambo a kufwisha mulunda nanji nangwa makatazho akwabo kwamulengela kukeba lutekenesho. Wakonsha kutemwa bingi kwisamba nanji binembelo bimo byafwainwa. (Mana. 16:24) Abya mwina nzubo ubena kwinengezha kufumapo nyi, nyi ubena kulelezha mwana ubena kujila? Umvwe ibyo, twakonsha kunengezha kubwelako kimye kikwabo. Umvwe saka tulangulukilako bantu ne ‘kuba lusa,’ kyakonsha kwibalengela kutelekako kimye kikwabo kyo twabwelako.—1 Pe. 3:8.
4 Kuyuka bya Kwamba: Mutumwa Paulo wamwene kuba’mba mu muzhi wa Atena mwajinga kipandawilo kyapainwe ‘Kwi Lesa Wabula Kuyukanyika.’ Kino kya mulengejile kuyuka bya kwamba mambo awama, mambo waambile’mba: “Aye ye mupopwela pa kubula kumuyuka, i ye ye nemusapwila.” Mashinda awama aingijishe Paulo alengejile bamo pa boba bamutelekelenga kumvwa mambo a Bufumu kabiji ne kwitabila.—Byubilo 17:23, 34.
5 Mu Jishinda jimotu, ne atweba umvwe saka tutalatala bulongo kitukwasha kuyuka bikeba bantu kabiji ne kuyuka bya kwamba bulongo. Ipuzhai mepuzho akonsha kulengela mwina nzubo kwamba biji ku muchima. Langulukaipo binembelo byakonsha kubaisha kizaku kyanji. (Mana. 20:5) Umvwe saka tutalatala ne kumwesha’mba twatemwa bantu kya kine, kiketukwasha kwikala basendwe ba kwibabulako mambo awama.