Kuwamishako Busendwe Bwetu bwa Kusapwila—Kuta Bantu Muchima
Ene Mambo o Kwanemena: Yesu watele muchima bantu kabiji wibatemenwe. Kyakumwenako, pa kimye kimo Yesu byo amwene muntu washinka matwi amba wajinga na moyo, wamutwajile kwa bunke ne kumubuka. (Mako 7:31-35) Wamwesheshe amba watele muchima baana banji ba bwanga pa kubula kwibafunjisha bintu byavula pa kimye kimo byo babujile kukonsha kukwatankanya. (Yoano 16:12) Nangwatu byo aji mwiulu, Yesu wata bantu muchima. (2 Timo. 4:17) Ne atweba byo tuji baana ba bwanga ba kwa Kilishitu, twafwainwa kulondela byo aubile. (1 Pe. 2:21; 1 Yoa. 3:16, 18) Kabiji tukengilanga bulongo mu mwingilo umvwe twata muchima mwina nzubo ne kuyuka bintu byo apitamo, byo atemwa ne makatazho anji. Kino kikamulengela kumvwa byo tubena kumufunjisha umvwe wayuka amba kechi tubena kusapwilatu nangwa kushatu mabuku ne, bino amba twamuta ne muchima.
Esekai Kuba Bino mu uno Ñondo:
Nengezhainga kuba bino kimye kyo muji na kupopwela kwa kisemi nangwa mweshai musapwishi wapimpula jishinda janji ja kusapwilamo kwesakana na byoatana mwina nzubo kimye kyo aji mu mwingilo.
Pa kusambakana kwa kuya mu mwingilo, mulongo ubena kutangijila wafwainwa kwambapo nangwa kumwesha mashinda a kutelamo bantu muchima.