Kabokoshi Ka Mepuzho

◼ Nanchi twafwainwa kunemba sawakya wa lufunjisho lwa Baibolo lwa kisemi nyi?

Umvwe nsemi mwina Kilishitu ufunjisha lufunjisho lwa Baibolo lwa kisemi kabiji saka muji ne baana babula kubatizwa, uno nsemi wafwainwa kunemba sawakya wa awala umo mu mulungu umo, kubwelamo kumo mu mulungu umo, ne lufunjisho lwa Baibolo lwa pa nzubo lumo pa ñondo. Bino byo byo kyafwainwa ne kwikala nangwa kya kuba lufunjisho lubiwa kukilaila pa awala umo, lufunjiwa javula mu mulungu umo, nangwa lwa kufunjisha baana umo umo. —Monai buku wa Abateyanishiwa, pe. 104.

Umvwe bonse mu nzubo Bakamonyi babatizwa, kechi kyafwainwa kunemba kimye ne lufunjisho mu sawakya wa mwingilo ne (kana inge kya kuba mwana ukifunda buku wa bubiji panyuma ya lubatizho). Kiji bino mambo sawakya wa mwingilo wa kipwilo unembwa kwesakana na mwingilo ubena kwingijiwa wa kusapwila mambo awama ne kufunjisha bukine bwa mu Baibolo ku boba babula kwipana ne kubatizwa kwikala bakalume ba kwa Yehoba. (Mat. 24:14; 28:19, 20) Bino, kino kechi kyafwainwa kulengela lufunjisho lwa uno mutundu kubula kufunjiwanga kimye kyonse ne.

Ke mutembo wa bansemi bena Kilishitu kufunjisha baana babo. Aba bakeba bukwasho bwa kutatula nangwa kukosesha lufunjisho lwabo lwa kisemi bafwainwa kubula bakulumpe mu kipwilo kuba’mba bebakwasheko. Umvwe kyakebewa’mba musapwishi mukwabo afunjishenga lufunjisho lwa Baibolo yewo mwana wa mulume nangwa wa mukazhi ukyangye kubatizwa mu kyo kyo kisemi kya bwina Kilishitu kiji mu kipwilo, kyawama kwipuzha mukulumpe utangijila mu kipwilo nangwa mukulumpe utangijila mwingilo wa mu bujimi. Umvwe lufunjisho lwaitabizhiwa, awa ubena kufunjisha wafwainwa kunembanga sawakya kwesakana na byonka byo anemba mafunjisho akwabo a Baibolo.

Kufunjisha baana kuyuka mashinda a Yehoba kukebewa kimye kyabaya ne kwingila na ngovu kukila ne maawala o munemba a mwingilo wa mu bujimi. (Mpitu. 6:6-9; Mana. 22:6) Bansemi ba bwina Kilishitu batakaikwa bingi byo bengila mingilo yabo yanema ya kukomesha baana babo “na kwibafunjisha ne kwibajimuna monka mwaswila aye Nkambo.”—Efi. 6:4.