Mutanchi wa Kisemi—Lufunjisho lwa Kisemi
1 Bupe bwanemesha anweba nsemi wa bwina Kilishitu bo mwakonsha kupapo baana benu, ke kwibafunjisha butemwe bwa kutemwa Yehoba bo mujipo nabo. Kino kyafwainwa kubiwa pa kimye ‘kyo muji mu nzubo yenu’ na kufunda lufunjisho lwa Baibolo lwa kisemi lubiwa mulungu ne mulungu. (Mpitu. 6:5-7) Kikale muji na mwina kwenu waitabila, mwikala mu nzubo muji bantu baya ku bupopweshi bungi, nangwa mwi nsemi wabula mulume nangwa mukazhi, mwakonsha kukwasha baana benu kufwenya kwi anweba ne kwi Yehoba kupichila mu kwikala jonse na lufunjisho lwa kisemi.
2 Kutendeka Lufunjisho lwa Kisemi: Kintu kitanshi kya kutendekelapo, ke kwikala na muteeto wa kufunjila pamo kisemi kyonse. Umvwe kechi mwayuka kimye kya kubilamo lufunjisho ne, mwakonsha kwisambila pamo kino kisemi kyonse. (Mana. 15:22) Umvwe muji na baana ba bacheche, mwakonsha kuba saka mwikala na mafunjisho avula epi epi mukachi ka mulungu. Yukai mutanchi wakonsha kuwam a bulongo ba mu nzubo yenu. Pa mutanchi wenu wa kisemi nembaipo kimye kyo mwafwainwa kufunjilangamo lufunjisho kabiji ne kumona kuba’mba mubena kwikilondela.
3 Bintu ka byo mwakonsha kufundanga? Bamo banengezha lufunjisho lukafunjiwa pa Lufunjisho lwa Buku lwa Kipwilo nangwa pa Lufunjisho lwa Kyamba kya Usopa. Bakwabo nabo bafunda mitwe kikatakata yo banengezhezha bakyanyike. Nsemi umo uji na mwana wamulume ne wamukazhi waambile’mba: “Kintu kimo baana kyo batemwa kuba mukachi ka mulungu ke bifwanyikizho byo tukaya bifuma mu bipikichala biji mu buku wa Icitabo Candi ca Malyashi ya mu Baibolo. Bino bifwanyikizho bitufika bingi pa muchima kukila ne kibelengelo kya mapalagalafu o tutanga.”
4 Fundainga Mulungu ne Mulungu: Lufunjisho lwa kisemi lwafwainwa kubiwanga kimye kyonse kabiji ba mu kisemi bonse bafwainwa kwikala na mujojo wa kwilukebesha. Umvwe pa jojo juba ne pa kimye kyo mubilamo lufunjisho pasombwa bintu bya kupulumukilatu, mwakonsha kwikala na lufunjisho pa juba jingi. Kabiji kwakonsha kwikalako bimye bimo po kyakonsha kukebewa kupimpulako mutwe wa kwisamba kwesakana na kibena kukebewa. Pano bino, lupimpu luji lonse lwaubiwa kechi lwafwainwa kupimpula mutanchi wa kisemi walengwa kala ne. Umvwe kimye kya kubilamo lufunjisho kyapimpulwa, nsemi umo wamulume unemba kino kimye ne kusha pa mpunzha pa kuba yense mu kisemi wamonapo. Aba banengezha kwikala na lufunjisho lwa kisemi jonse basanchilwa bingi. Byo mubena kukomesha baana benu na “kwibafunjisha ne kwibajimuna monka mwaswila aye Nkambo,” mumwesha butemwe bo mwibatemwa kabiji ne bo mwatemwa Shetu wa mwiulu.—Efi. 6:4.