Bintu Byafwainwa Kwimukwasha Kutanga Baibolo pa Bunke Bwenu Kimye Kyonse

NANCHI kimukatazha kufunda Baibolo pa bunke bwenu kimye kyonse nyi? Abya mumwenamo pa kufunda Baibolo nyi? Atweba bonse byo byo tumvwa ku muchima pa bimye bimo. Pano akilangulukai pa bintu bikwabo byo tuba kimye kyonse nabiji kowa. Kuchapa bivwalo kukebewa kimye ne kwibikako. Pano bino pa kwibivwala tutemwa bingi. Kufunda Baibolo nako twakonsha kwikwesakanya ku ‘kwitovwa na mema kupichila mu mambo a Lesa’ kabiji kwitulengela kumvwa bingi bulongo. (Efi. 5:26) Akilangulukai pa bintu bimo byafwainwa kwimukwasha:

• Ikalai na mutanchi. Kufunda Baibolo pa bunke kuji pa “bintu byanemesha” byafwainwa kubanga mwina Kilishitu yense. (Fili. 1:10) Pa kuba’mba mufundenga Baibolo kimye kyonse, nembai juba ne kimye pa mutanchi wenu ne kumulamika pabena kumweka pa kuba’mba mutalengapo. Nangwa kampe mwakonsha kubika alamu pa foni wenu wa kwimuvululako kimye kyo mwafwainwa kutendeka kufunda Baibolo.

• Salai kimye ne jishinda ja kufunjilamo Baibolo jimuwamina. Nanchi mumvwisha byo mubena kutanga inge ke mufunde Baibolo pa jiola jimo nyi, inyi anweba kimupeelela kumvwisha inge ke mumutange mu kimye kicheche? Anweba yenu mwayuka bulongo bintu byo biji. Onkao mambo, mwafwainwa kupimpula jishinda ja kufunjilamo Baibolo kwesakana na bintu byo biji. Inge muzhinyazhinya pa kimye kya kutendeka kufunda Baibolo pa bunke bwenu, mwafwainwa kufuukulapo kufunda Baibolo nangwatu pa maminiti jikumi. Inge ke mutange Mambo a Lesa pa bunke bwenu nangwatu pa maminiti acheche, mukamwenamo bintu byavula bingi kukila kwikalatu. Kabiji inge mwatendeka kufunda, mukekala na mujojo wa kukeba kutwajijila kufunda.​—Fili. 2:13.

• Sajilai jimo mitwe ya kufundapo. Kimye kya kutanga Baibolo kechi kyo kimye kya kusala mitwe ya kufundapo ne. Inge byo byo muba ko kuba’mba kechi mubena ‘kwingijisha kimye kyenu bulongo’ ne. (Efi. 5:16) Nembelai jimo mutanchi wa mitwe yo mukeba kufundapo. Inge muji na bwipuzho pa bintu byo mwabula kumvwisha, bunembai pa mutanchi wa bintu byo mukeba kufundapo. Kabiji inge mwapwisha kufunda Baibolo pa bunke bwenu, mwafwainwa kunungapo bikwabo pa mutanchi wa bintu byo mukeba kufundapo.

• Pimpulaingako bintu. Pimpulaingako mutanchi wenu wa kutanga Baibolo, nabiji kimye kyo mwafwainwa kufunjilamo Baibolo nangwa mitwe yo mukeba kufundapo. Kyanema kechi juba jo mutanga Baibolo, kimye kyo mwingijisha pa kutanga Baibolo nangwa bintu byo mufunda ne. Kintu kyanema ke kutanganga kimye kyonse.

Tumwenamo bintu byawama bingi inge ke tutange Baibolo kimye kyonse mambo kwitukwasha kufwenya kwipi ne Yehoba, tufuukula bintu bulongo mu bwikalo bwetu kabiji lwitabilo lwetu lukakosa bingi.​—Yosh. 1:8.