Kechi Mwilengulule na Mambo a Kupayankana ne
1. Mambo ka bamo kyo bakankazhamina kutendeka mafunjisho a Baibolo?
1 Bamo bakankazhama kutendeka mafunjisho a Baibolo na mambo a kupayankana. Kufunjisha muntu Baibolo kechi kwapeela ne. Kikebewa kimye kya kunengezha, kufunjisha ne kukwasha ye mufunjisha kuyuka bya kuba na makatazho. Mutumwa Paulo waambile amba wipaine na mweo wanji yense kukwasha bena Tesalonika kuyuka Yehoba. (1 Tesa. 2:7, 8) Twakonsha kufunjisha byepi mafunjisho a Baibolo nangwa kya kuba twapayankana?
2. Kutemwa Lesa kwitulengela byepi kuyuka bya kwingijisha bulongo kimye kyetu?
2 Kwingijila Yehoba Kukebewa Kimye: Kwambatu kine kwingijila Lesa kukebewa kimye. Kyakumwenako, kutanwa ku kupwila, kuya mu mwingilo, kutanga Baibolo ne kulomba. Muntu wapayankana uji mu masongola wakonsha kwikala nalusekelo umvwe ke ekaleko na kimye kya kwikala pamo na mwina kwanji. Ne atweba twafwainwa ‘kwingijishanga kimye kyetu bulongo’ pa kuba’mba twingilenga ino mingilo mambo twamutemwa Yehoba. (Efi. 5:15-17; 1 Yoa. 5:3) Kwesakana na byaambile Yesu, mwingilo wetu wanema mu mpopwelo yetu, ke wa kulenga baana ba bwanga. (Mat. 28:19, 20) Kulangulukanga pa kino kuketukwasha kubula kukankazhama kufunjishanga mafunjisho a Baibolo.
3. Twakonsha kumwesha byepi kuba’mba twata muchima muntu ye tufunjisha Baibolo umvwe twapayankana?
3 Pano twakonsha kwingila byepi umvwe tupayankana na mambo a nkito ya ku mubiji, kubela bela nangwa mingilo ya mu kipwilo? Basapwishi bamo bafunjisha mafunjisho a Baibolo kwingijisha foni nangwa kompyuta. Aba bakankalwa kwingila na mambo a kubela bela beta ye bafunjisha Baibolo kwiya ku nzubo kuba’mba bamufunjishe. Bakwabo bambila musapwishi mukwabo kwibakwashako kufunjisha muntu umvwe bafumapo.
4. Bintu ka byawama bifuma mu kwingila mwingilo wa kufunjisha bantu Baibolo?
4 Paulo waikalanga na lusekelo umvwe waingijisha kimye ne bulume bwanji kukwashishamo bantu kufunda bukine. (Byu. 20:35) Kimye kyo alangulukilenga pa bintu byawama byafumine mu mwingilo wanji mu Tesalonika kyamulengejile kusanchila Yehoba. (1 Tesa. 1:2) Twafwainwa kwikala balusekelo mu mwingilo umvwe kya kuba kupayankana kwabula kwitulengela kukankalwa kwingila mwingilo wa kufunjisha Baibolo.