Kange Muleke Ne!
1. Mu ñanyi jishinda mo ‘tubujila kuleka kuba byawama’?
1 Kupichila mu kusapwila mambo awama a Bufumu bwa Lesa, kechi ‘tuleka kuba byawama’ ku boba baji mu nyaunda yetu ne. (Mana. 3:27) Byambo byawama byo twafwainwa kubulako bantu ke byobya byaamba pa bintu byawama bikoba bukalama bwa Lesa. Nangwa kya kuba mubulako bantu luketekelo lwa Bufumu kupichila mu busapwishi bwa kushukilwa nangwa kupichila mu kwibashila mabuku, mambo ka a kubujila kwibikila kikonkwanyi kya kwikalapo na muntu wa kufunjisha Baibolo umvwe mufwaye pa kino kimye?
2. Ki ka kyakonsha kwitulengela kubula kumonapo muntu wa kufunjisha Baibolo?
2 Javula kintu kikatampe kitulengela kubula kwikalapo na muntu wa kufunjisha Baibolo ke kulanguluka amba kechi nakonsha kutangijila lufunjisho ne. Bamo baleka kutangijila lufunjisho lwa Baibolo na mambo a kulanguluka’mba kechi bafikilamo ne, nangwa na mambo a kupayankana. Ano mashinda alondelapo akonsha kwimukwasha kubula kuleka kwingilako mwingilo wa kufunjisha mafunjisho a Baibolo.—Mat. 28:19; Byubilo 20:20.
3. Mambo ka o twaikela bafikilamo kufunjisha bantu Baibolo?
3 Kwilengulula: Apo kampe kechi mwafika palepa mu kufunda sukulu wa ku mubiji ne, nangwa apo kampe na mambo a bintutu bikwabo mwiumvwa kubula kufikilamo kutangijila mafunjisho a Baibolo. Bena Kilishitu ba mu myaka kitota kitanshi ‘kechi bafunjile ne, bajingatu bantutu.’ Ki ka kibakwashishe kufunjisha bantu bukine? “Bajinga ne Yesu.” (Byubilo 4:13) Bafunjile ku Mufunjishi Wayukile bingi kufunjisha, aye Yesu, mwina mafunjisho ne mashinda asungiwa mu Binembelo kuba’mba tufunjilengako. Nangwa kya kuba kechi mwafunda kufika palepa ne, mubena kufunjishiwa lufunjisho lwa ku mupashi lwakila lufunjisho luji lonse lwa ku mubiji.—Isa. 50:4; 2 Ko. 3:5.
4. Ki ka kyo twakonsha kufunjilako ku byajinga Amosi?
4 Kimye kimo Yehoba waingijishanga bangauzhi kukajipila bakalama nangwa bantutu bakwabo bajinga pa bifulo bikatampe balenganga mambo. Bangauzhi bamo nabiji Amosi bajingatu bantutu. Amosi waswile’mba: “Amiwa kechi ne ngauzhi wa mfweto ne, nangwa umo wa mu kipanyi kya bangauzhi ne; bino amiwa ne kafunga, ne wa kuwamisha bichi bya mikuyu.” (Amo. 7:14) Nangwa byonkabyo, Amosi kechi walekele kwamba byambo bya bunchibamambo bwa Yehoba kwi Amaziya, ñanga wapopwelanga mwana ñombe ne. (Amo. 7:16, 17) Kimye kyonse twafwainwa kuvulukanga’mba tubena kwingila mwingilo wa Lesa kabiji ne kuba’mba ubena kwitufunjisha bya kwingila uno mwingilo ye etupa.—2 Timo. 3:17.
5. Mambo ka o twafwainwa kwibikilako kumonapo muntu wa kufunjisha Baibolo nangwa kya kuba twapayankana?
5 Kupayankana: Nangwa kya kuba mwapayankana, apo kampe mwaabanyapo kala kimye kya kwingilangako jonse mu mwingilo. Kufunjisha muntu Baibolo ke lubaji lumo lwa mwingilo luleta bingi lusekelo. Ke jishuko jikatampe bingi kumona Mambo a Yehoba byo abena kukwasha bantu mu bwikalo bwabo. (Hebe. 4:12) Yehoba usekela bingi umvwe twipana kukwasha muntu ‘kwikala na maana alumbuluka a bya bukine.’ (1 Timo. 2:4) Nangwatu bamalaika nabo basekela bingi umvwe muntu waleka byubilo byanji byatama, waikala ke kalume wa Lesa.—Luka 15:10.
6. Ñanyi jishuko jo tuji najo byo tubena kuba kyaswa muchima wa Lesa?
6 Lesa ‘wasaka’mba, bantu bonse bapuluke, bekale na maana alumbuluka a bya bukine.’ (1 Timo. 2:4) Byo twaikalapo na jishuko jikatampe ja kwingijila mwayila kyaswa muchima wa Lesa ne kubula kuleka kufunjisha bantu Baibolo!