Funjilai Ku Bangauzhi—Amosi

1. Mambo ka kyakumwenako kya kwa Amosi o kyafwainwa kwitutundaikila?

¹ Nanchi mwiumvwa kuba’mba kechi mwafikilamo kusapwila, na mambo a kuba amba kechi mwafunda ne nyi? Umvwe byobyo kiji, kyakumwenako kya kwa Amosi kyakonsha kwimukosesha. Waingilangako mwingilo wa kulama mikooko ne bunjimi, bino Yehoba wamupeele mwingilo wanema wa kusapwila. (Amosi 1:1; 7:14, 15) Ne lelo jino, Yehoba wingijisha bantu babula kufunda. (1 Ko. 1:27-29) Ñanyi bintu bikwabo byo twakonsha kufunjilako ku ngauzhi Amosi?

2. Mambo ka o twafwainwa kutwajijila kwikala bachinchika umvwe ke betumanyike mu mwingilo?

² Ikalai Bachinchika Kimye kyo Babena Kwimumanyika: Kimye ñanga Amaziya wapopwelanga mwana ñombe mu Bufumu bwa ku bulenge bwa mikoka jikumi bwa bena Isalela byo aumvwine byambo byaawile ngauzhi Amosi, kyajinga nobe ubena kwamba amba: ‘Kechi tubena kukeba ne! Yanga! Tuji na bupopweshi bwetu!’ (Amosi 7:12, 13) Amaziya byo ayile ku Mfumu Yeloboma wakambile byambo bya bubela byabujile kwamba ngauzhi pa kuba’mba mfumu akanye mwingilo waingijilenga Amosi. (Amosi 7:7-11) Bino kechi byalengejile Amosi kuleka kwingila ne. Lelo jino, bantangi ba bupopweshi bamba bya bubela ku ba mu kafulumende pa kuba’mba bamanyike bantu ba Yehoba. Bino, Yehoba witubula kuba’mba kafwako kyela nangwa kimo ne kyo bakengijisha kulwisha kika kushinda ne.—Isa. 54:17.

3. Ñanyi bintu bibiji byo tusapwilapo lelo jino?

³ Kusapwila pa Lonaiko lwa Lesa ne Mapesho a Kulutwe: Nangwa kya kuba Amosi waambile bungauzhi pa bufumu bwa bisaka jikumi bwa bena Isalela, wapezhezheko kunemba buku wanji uji mu Baibolo ubena kwamba pa mulaye wa Yehoba wa kupesha bantu banji. (Amo. 9:13-15) Ne atweba tusapwila pa kwiya kwa “juba ja lonaiko” ja Lesa, kabiji kuba bino ke lubajitu lumo lwa “mambo awama a Bufumu” o twafwainwa kusapwila. (2 Pe. 3:7; Mat. 24:14) Juba ja Yehoba ja konauna bangubabibi pa Amagedonyi, jikalengela ntanda kwikala ke paladisa.—Sala. 37:34.

4. Ñanyi bintu bitulengela kuketekela kuba’mba Yehoba uketukwasha kuba kyaswa muchima wanji?

⁴ Kusapwila mambo awama mu ntanda muji bantu betumanyika kulengela kwipana kwetu kwa kwingijila Yehoba ne kuba kyaswa muchima wanji kukatazha. (Yoa. 15:19) Nangwa byonkabyo, twaketekela kuba’mba Yehoba ukatwajijila kwitukwasha pa kuba’mba tube kyaswa muchima wanji byonka byo akwashishe Amosi.—2 Ko. 3:5.