Komeshainga Bulunda Bwenu ne Yehoba
1. Nyenga umo waishile kuyuka ka pa mambo a mingilo yanji ya moba onse ya ku mupashi?
1 Nyenga umo mwina Kilishitu waswile’mba: “Naikala kala mu bukine pa myaka nobe 20 yapitapo saka ngyatu na kupwila ne kuya mu mwingilo wa mu bujimi.” Bino watwajijila kwamba’mba: “pano naiya kuyuka namba nangwa kya kuba kupwila ne mwingilo wa mu bujimi byanema, pano bunke bwabyo kuba byankwasha ne inge paikala makatazho... . Pano nayuka namba nafwainwa kwalulula ndangulukilo yami ne kwikala na mutanchi wa lufunjisho lwawama pa kuba’mba kine namuyukishe Yehoba ne ku mutemwa ne kusanchila Mwananji pa bintu byo etupa.”
2. Mambo ka o kyanemena kukomesha bulunda bwetu ne Yehoba?
2 Kikebewa kwibikako bingi pa kubatu’mba twikale balunda ne Yehoba. Kechi amba kikulu tubena kwingila jonse mingilo ya bwina Kilishitu ne. Umvwe ketukankalwe kulomba kwi Yehoba kimye kyonse, kikapelako tukambangatu amba kala wajinga mulunda netu pano luno bulunda bwetu bwapwatu mpalampala. (Lum. 2:4) Twayai tumone lufunjisho lwa Baibolo lwa pa bunke ne lulombelo byo byakonsha kukomesha bulunda bwetu ne Yehoba.—Sala. 25:14.
3. Lufunjisho lwetu lwa pa bunke lwafwainwa kwikala byepi pa kuba’mba lwitukwashe kufwenya kwipi ne Lesa?
3 Lulombelo ne Kulanguluka languluka Byanema Bingi: Lufunjisho lwa pa bunke lusangajika muchima kechi lwaimena pa kushilatu bishinka mu kibaba kya lufunjisho lubena kufunjiwa ne kutanga binembelo bijimo ne. Lufunjisho lwa pa bunke lukebewa atweba kuyuka abyo byambo byo byaamba pa mashinda a Yehoba, mizhilo, ne bumuntu bwanji. (Lupu. 33:13) Kuyuka mwatala bintu bya ku mupashi kwitufika bingi pa muchima ne kwitulengela kulanguluka pa bwikalo bwetu byo buji. (Sala. 119:35, 111) Kyo twikela na lufunjisho lwa pa bunke ke kukeba kufwenya kwipi ne Yehoba. (Yako. 4:8) Lufunjisho lwawama lukebewa kimye ne mpunzha kwazhindama, kabiji kikebewa kutako muchima pa kuba’mba mufundenga jonse. (Da. 6:10) Nangwa kya kuba muji na byavula bya kuba, nanchi mwikalapo na kimye pa juba pa juba kya kulanguluka pa byubilo byawama bya Yehoba nyi?—Sala. 119:147, 148; 143:5.
4. Kulomba lulombelo saka tukyangye kutendeka lufunjisho lwetu lwa pa bunke kwitukwasha byepi kukomesha bulunda bwetu ne Yehoba?
4 Lulombelo lufuma panshi ya muchima lwanema bingi mambo lwitukwasha kwikala na lufunjisho lwawama lwa pa bunke. Kikebewa bingi kwikala na mupashi wazhila wa Lesa pa kuba’mba bukine bwa mu Baibolo buzakule michima yetu ne kwitutundaika kuba’mba “tumwingijile Lesa mingilo ya kumutokesha pa muchima, na kunemeka Lesa ne kumwakamwa.” (Hebe. 12:28) Onkao mambo, saka tukyangye kutendeka lufunjisho luji lonse, patanshi twafwainwa kumulomba Yehoba kuba’mba etupe mupashi wanji. (Mat. 5:3) Umvwe twalanguluka pa Binembelo ne kwingijisha mitwe ya lufunjisho itupa jibumba ja Yehoba, tupungulwila michima yetu kwi Yehoba. (Sala. 62:8) Kwikala na lufunjisho mu jino jishinda ke lubaji lwa mpopwelo motumweshesha kwipana kwetu kwi Yehoba ne kukosesha bulunda bwetu ne aye.—Yuda 20, 21.
5. Kyanemena ka kwi atweba kulanguluka langulukanga pa Byambo bya Lesa pa juba pa juba?
5 Byonkatu bikala bulunda bonse, ne atweba bulunda bwetu ne Yehoba bwafwainwa kutwajijila saka bwawama kuba’mba bukomenengako mu bwikalo bwetu bonse. Onkao mambo, mwane kine twayai tumonengapo bimye bya kufwenyenyamo kwipi ne Lesa pa juba pa juba, ne kuyuka’mba ne aye ukafwenya kwipi ne atweba.—Sala. 1:2, 3; Efi. 5:15, 16.