Sukulu ya Mwingilo wa Teokalasi ya mu 2004

¹ Yehoba ufunjisha bantu babulapotu nangwa kufunda ne kuba’mba bengile mwingilo wanema wa ntanda yonse. Jishinda jimo jo obilamo bino ke kupichila mu lufunjisho lupanyiwa mulungu ne mulungu mu Sukulu ya Mwingilo wa Teokalasi. Abya mubena kwivwangamo pakatampe kufika papelela bulume bwenu nyi? Mu mwaka wa 2004 kutendeka mu January, kukekala lupimpu lucheche lukakwasha baji mu sukulu kutainamo mfweto yabaya mu luno lunengezho.

² Kupimpuzhana kwa ba Kufundañanako ba Kibiji: Balongo bamba jashi ja kufunda ne bishinka bikatampe kufuma mu kutanga Baibolo bamusanchila bingi wa kufundañanako wa kibiji pa kwibafundako mumo mumo. Mu bipwilo muji bakulumpe mu kipwilo bafikapo, bafwainwa kwipimpuzhananga pa mwaka pa mwaka kwikala bakufundañanako ba kibiji. Mu jino jishinda, mwingilo kechi ukazeñaminangatu pa muntu umo ne; bino kyakilamo kunema ke kya kuba’mba bakulumpe mu kipwilo ne bankwasho bafikapo bakamwenamo bingi mu majashi akambanga bañambi ne bafunjishi bapusana pusana bayuka kufunjisha bulongo.

³ Kutanchika Mutanchi wa Mwisambo wa Kupitulukamo mu Byafunjiwe: Umvwe kipwilo kyenu kyaikala na kupwila kwa kijiiji mulungu wa kwisamba kwa kupitulukamo mu byafunjiwe, mwafwainwa kwikupimpuzhana, mwisambo wa kupitulukamo (ne mutanchi yense wa mu yewo mulungu) mwamutwala mu mulungu walondelapo panyuma ya kupwila kwa kijiiji kabiji mutanchi wa yewo mulungu wa panyuma ya kupwila kwa kijiiji mwamubwezha mu mulungu waikelamo koko kupwila. Bino kechi kyafwainwa kupimpuzhana mbaji yonse ya mu milungu ibiji umvwe kwisamba kwa kupitulukamo mu byafunjiwe kwaikela mu mulungu ye bemufwakesha ku mukulumpe wa kijiiji ne. Mukifulo kya kuba byo byo, lwimbo, jashi ja ñambilo, ne bishinka bikatampe kufuma mu kutanga Baibolo byafwainwa kwambiwa byonka byo byatanchikwa. Pano bino jashi ja kufunda (jambiwa panyuma ya kwamba jashi ja ñambilo) jiji mu mutanchi wa mulungu walondelapo mwafwainwa kwijishapo. Panyuma ya kwamba bishinka bikatampe kufuma mu kutanga Baibolo, pafwainwa kulondela Kupwila kwa Mwingilo kwa maminiti 30, ako kwafwainwa kwabanwa mu maminiti 10 jashi jimo umvwe muji mbaji isatu, nangwa maminiti 15 jashi jimo umvwe muji mbaji ibiji. (Bya kubijika mwafwainwa kwibishapo.) Panyuma ya Kupwila kwa Mwingilo, pafwainwa kulondela lwimbo apa bino ne jashi ja maminiti 30 na mukulumpe wa kijiiji. Kupwila kwa Sukulu ya Mwingilo wa Teokalasi kwa mulungu ukalondelapo, kutendeka na jashi ja ñambilo, palondela bishinka bikatampe kufuma mu kutanga Baibolo apa bino ne mwisambo wa kupitulukamo mu byafunjiwe.

⁴ Londelai luno lunengezho kuba’mba mukomenga ku mupashi. Byo mufunda byavula mu Sukulu ya Mwingilo wa Teokalasi, mutundaika kipwilo, mukwasha kufikizhiwa kwa bungauzhi bwa mu Baibolo ne kuletela lukumo Mwine wa byambo byawama byo twafwainwa kusapwila.—Isa. 32:3, 4; Lum. 9:19.