Mutanchi wa Bukumo wa Kupwila kwa Kipwilo
1, 2. Ñanyi lupimpu lukobiwa ku kupwila kwetu kutatula mu January 2009?
1 Mu mulungu wa April 21-27, 2008, balongo betu mwaya ntanda yonse baumvwine kya kubijika kyaletele bingi lusekelo. Kino kya kubijika kyajinga kya kuba’mba: “Kutatula pa 1 January 2009, Lufunjisho lwa Buku lwa Kipwilo lukobiwanga pa kyonka kimye kyubiwa Sukulu wa Mwingilo wa Lesa ne Kupwila kwa Mwingilo. Kupwila kwa Lufunjisho lwa Buku lwa Kipwilo kukatelwanga’mba Lufunjisho lwa Baibolo lwa Kipwilo.”
2 Mutanchi wa Kupwila kwa Mulungu ne Mulungu: Kuno kupwila kuvwangako nyimbo ne milombelo, kukobiwanga mu awala umo ne maminiti 45. Lwimbo ne lulombelo lwa kushinkwila kupwila bikobiwanga mu maminiti 5, apa bino palondela Lufunjisho lwa Baibolo lwa Kipwilo mu maminiti 25. Umvwe luno lufunjisho lwapwa, pakalondelanga Sukulu wa Mwingilo wa Lesa mu maminiti 30. Sukulu inge wapwa, pakalondelanga maminiti 5 a kwimbilamo lwimbo wa kutendekelamo Kupwila kwa Mwingilo kwa maminiti 35. Panyuma ya kuno kupwila, kukashalanga maminiti 5 a kwimbilamo lwimbo ne kulombelamo lulombelo lwa kupezhako. Pa kuba’mba kikemukwashengako kunengezha kuno kupwila konse, mutanchi wa Lufunjisho lwa Baibolo lwa Kipwilo, Sukulu wa Mwingilo wa Lesa ne wa Kupwila kwa Mwingilo, ukanembwanga pa ñondo pa ñondo mu Mwingilo Wetu wa Bufumu.
3. Nga Lufunjisho lwa Baibolo lwa Kipwilo lukatangijilwanga byepi?
3 Lufunjisho lwa Baibolo lwa Kipwilo: Kuno kupwila kukobiwangatu byonka byubiwa Lufunjisho lwa Kyamba kya Usopa. Pa kutendeka, kechi kikakebewanga kukipitulukako mu byafunjiwe mulungu wapwa ne. Awa ubena kutangijila wafwainwa kwambakotu pacheche byambo bya kutatwilamo kuno kupwila. Kino kikalengelanga kwikala na kimye kyawaina bulongo kuba’mba bonse bakakumbulengapo mikumbu ipi. Mukulumpe utangijila ukatongolanga bakulumpe bakutangijila kuno kupwila saka bepimpuzhanya mulungu ne mulungu.
4. Nga Kupwila kwa Mwingilo kukalulwa byepi?
4 Kupwila kwa Mwingilo: Kupwila kwa Mwingilo kukobiwangatu byonka byo kukelwa kubiwa, pano bino kukekalanga na majashi epi. Bya kubijika bikobiwanga mu maminiti atanu. Akye kimye kyabayatu bulongo kutangilamo bya kubijika bibena kukebewa kabiji ne makalata amo afuma ku musampi. Bya kubijika nabiji lunengezho lwa kuya mu mwingilo wa mu bujimi, mitanchi ya kupyanga, masawakya a bya mali ne makalata amo afuma ku ofweshi wa musampi a kimye kyonse, akabikwanga pa kipabi kya mabulañano kuba’mba balongo bene baketangilenga. Aba bapewa majashi a kuno kupwila bafwainwa kunengezha bulongo ne kulondela mikambizho yapanwa kabiji ne kubula kuja kimye.
5. Mu mulungu mwaishila mukulumpe wa kijiiji, nga mutanchi wa kupwila kwa kipwilo ukekalanga byepi?
5 Umvwe Mukulumpe wa Kijiiji Waiya: Mutanchi wa mu mulungu mwaishila mukulumpe wa kijiiji kechi ukalulwa ne. Sukulu wa Mwingilo wa Lesa ne Kupwila kwa Mwingilo bikobiwanga pa Kibiji byonka byo bikelwa kubiwa. Panyuma ya kuno kupwila, kukekalanga kwimba lwimbo, apa bino mukulumpe wa kijiiji waamba jashi ja maminiti 30. Byonka byo kikelwa kubiwa mu mulungu ye aishilamo, kukekalanga kunengezhapo juba jikwabo ja Lufunjisho lwa Baibolo lwa Kipwilo, kwimba lwimbo apa bino palondela jashi ja mwingilo ja mukulumpe wa kijiiji. Kuno kupwila kukapwanga na lwimbo ne lulombelo.
6. Mukulumpe wa kajibumba ukengilanga mwingilo ka?
6 Kupwila kwa Kuya mu Mwingilo wa mu Bujimi: Bakulumpe ba tumabumba bakatongolwanga na jibumba ja bakulumpe kutangijilanga mwingilo wa mu bujimi wa tumabumba ne kutalanga pa bantu baji mu koko ka jibumba kabo. Umvwe kekukebewe nkwasho wa kwikala pa kino kifulo, wafwainwa kutelwanga’mba “kalume wa kajibumba.”
7. Mutanchi wa bukumo wa kupwila kwa kipwilo uketulengela kuba ka?
7 Kwesakana na uno mutanchi wa bukumo, tukafundanga bintu byavula bingi bya ku mupashi. Kino kiketulengela kwikala basapwishi ne bafunjishi bayuka kufunjisha bulongo mu mwingilo.—Efi. 4:13, 14; 2 Timo. 3:17.
8. Nga kunengezhezha jimo kuno kupwila kuketukwashanga byepi atwe bene ne bakwetu?
8 Kunengezhezha jimo kuno kupwila konse kuketukwashanga kulabijila bishinka bikambiwanga. Tukakonshanga kukumbulapo kuba’mba tukekoseshenga atwe bene na bene. (Loma 1:11, 12; Hebe. 10:24) Kikonkwanyi kyetu kyafwainwa kwikala kya kuba’mba ‘kuya kwetu palutwe kumwekenga ku bonse’ kupichila mu ‘kwambatu bulongo mambo a bukine.’—1 Timo. 4:15; 2 Timo. 2:15.
9. Tukeba kuba ka, kabiji mambo ka?
9 Twi balusekelo bingi pa mambo a lunengezho lwa bukumo lwa kupwila kwa kipwilo. Twayai atweba bonse tulondelenga lutangijilo lo abena kunengezha ‘kalume wa kishinka ne wa maana’ kuba’mba tukakachile kwi Kafunga wetu Mukatampe byo abena kwitunengezha kukapuluka “malwa” akatampe afwenya kala pepi.—Mat. 24:21, 45; Hebe. 13:20, 21; Lum. 7:14.