Kabokoshi Ka Mepuzho

◼ Nanchi lwimbo wa kushinkwila Kupwila kwa Sukulu ya Mwingilo wa Teokalasi, kwa Mwingilo, kwa Mvula bantu, kabiji ne kwa Lufunjisho lwa Kyamba kya Usopa wafwainwa kutendeka byepi kabiji na ñanyi?

Nyimbo ya kushinkwila imbiwa mulungu ne mulungu pa kupwila kwa Sukulu ya Mwingilo wa Teokalasi, iji pa Mutanchi wa kupwila kwa Sukulu ya Mwingilo wa Teokalasi wikala mu kya mukachi kya mu Mwingilo Wetu wa Bufumu wa October. Nyimbo ya kushinkwila ne ya kupezhako Kupwila kwa Mwingilo kwa mulungu ne mulungu ikala mu Mwingilo Wetu wa Bufumu pa peja 2. Kabiji manambala a nyimbo imbiwa pa kupwila kwa Lufunjisho lwa Kyamba kya Usopa lubiwa mulungu ne mulungu, atanwa pa peja 2 ya Kyamba kya Usopa munshi ya mutwe wa kufunda uji yense. Nyimbo imbiwa yanengezhiwa kwesakana na koko kupwila, onkao mambo yafwainwa kutongolwa na mulongo ubena kutangijila koko kupwila mu kifulo kya kutongolwa na cheyamani wa kupwila kwafumako.

Kya kumwenako, mukulumpe utangijila kupwila kwa Sukulu ya Mwingilo wa Teokalasi ye utambwila luonde, kutongola lwimbo wa kushinkwila, kutangijila Sukulu, apa bino waita ku pulatifomu ñambi mutanshi wa Kupwila kwa Mwingilo. Mulongo uji na lubaji lutanshi mu Kupwila kwa Mwingilo ye wafwainwa kutongola lwimbo wa kushinkwila Kupwila kwa Mwingilo.

Kabiji cheyamani ye ushinkula Kupwila kwa Mvula bantu. Utambwila na lusekelo bonse baiya na kupwila ne kwibambila kwimbila pamo lwimbo wa kushinkwila ye asala ñambi. Cheyamani (nangwa mulongo mukwabo wafikapo wabujilwe jimo) ushinkula kupwila na lulombelo. Kabiji wita ñambi wa jashi ne kutongola mutwe wa jashi janji. Panyuma ya jashi, cheyamani kechi upituluka mu bishinka byaji kwamba ñambi ne, wambakotu pacheche byambo bya kusanchila ñambi pa jashi jo aamba. Ubijikila jimo mutwe wa jashi ja Mvula bantu ukambiwa mulungu ukalondelapo kabiji ne kwambila luonde kupembelela Lufunjisho lwa Kyamba kya Usopa. Kechi kyafwainwa cheyamani kwambila luonde kutuma mutende ku kipwilo kwafuma ñambi mwenyi ne. Panyuma ya bino, cheyamani wita ku pulatifomu mukulumpe utangijila Lufunjisho lwa Kyamba kya Usopa.

Mukulumpe utangijila Lufunjisho lwa Kyamba kya Usopa utongola lwimbo mutanshi lufunjisho saka lukyangye kutendeka. Utangijila lufunjisho kwesakana na mikambizho yanembwa kabiji panyuma ya lufunjisho utongola lwimbo wa kupezhako. Javula mukulumpe utangijila Lufunjisho lwa Kyamba kya Usopa wita mulongo waji kwamba jashi ja mvula bantu kwiya kushinka kupwila na lulombelo lwa kupezhako.

Kulondela ino mikambizho kukwasha kumona’mba kupwila kwetu kwa kipwilo kubena kubiwa monka mokyaila.