Kulukuka Kwa Na Bambili Ko Mwavwangiwamo
1, 2. Bakalume ba Lesa lelo jino bavwangiwamo byepi mu kufikizhiwa kwa kimwesho kya bungauzhi bwanembwa mu Lumwekesho 9:13-19?
1 “Aye malaika wa butanu na bumo naye waimbile.” Kabiji palondejile “nzhita ya baji pa bambili” babajilwe “biumbi jikumi bya biumbi jikumi jibiji” kasa baluluma nobe mvula. Ino kechi nzhita yubiwapo jonse ne. “Mitwe ya bambili yauba nobe mitwe ya babokwe.” Kutunwa twabo kulupuka mujilo, bwishi ne kibiliki, kabiji “mikila yabo yauba nobe milolo.” Kuno kulukuka kwa kifwanyikizho kwa na bambili, mu kupelako konauna byavula. (Lum. 9:13-19) Nanchi mwayuka byo mwavwangiwamo mu kufikizhiwa kwa kino kimwesho kya bungauzhi bwa kulukukañana nyi?
2 Bashingwa bashalapo ne balunda nabo ba mikooko ikwabo, mu kukwatankana bayukanyikisha buchibamambo bwa Lesa. Kifumamo mu kuba bino, bayukanyikisha patooka Kilishitendomu byo afwa ku mupashi. Twayai tumone mashinda abiji a bungauzhi alumbulula ene mambo mwingilo wa bakalume ba Lesa kyoengijiwa bulongo.
3. Kufunjishiwa ka ko mwatambwila kwa kwamba byambo bya Lesa bulongo?
3 Bafunjishiwa ne Kwinengezha Kutwala Mambo a Lesa: Kupichila mu Sukulu ya Mwingilo wa Teokalasi ne kupwilatu kukwabo kwa kipwilo, bakalume ba Lesa bafunjishiwa kwamba mambo a Lesa kwa kubula moyo. Byo balonda Yesu ne baana banji ba bwanga, nabo baya na kwipuzhamo bantu bafwainwa, kusapwila konse konse kwakonsha kutanwa bantu. (Mat. 10:11; Mako 1:16; Luka 4:15; Byubilo 20:18-20) Byo jaingilapo bulongo jino jishinda jaambiwa mu Baibolo ja kwingijisha pa kusapwila!
4. Bintu ka bingijisha basapwishi bavula kuba’mba bakonshe kwingila mwingilo wabo?
4 Ma Baibolo avula, mabuku, ma buloshuwa ne magazini, asampanyishiwa na bakalume ba bwina Kilishitu mu kwingila mwingilo wa kusapwila ye bapewa na Lesa. Ano mabuku anembwa mu milaka pepi na 400, aamba pa mitwe yavula yapusana pusana ne mashinda a kwingijisha ku bantu ba misango ne misango. Abya mubena kwiengijisha bulongo ano mabuku nyi?
5, 6. Ki ka kimwesha kuba’mba bantu ba Yehoba bakwashiwa na Lesa?
5 Kutangijilwa ne Kukwashiwa na Lesa: Kabiji kimwesho kya bungauzhi kimwesha kuba’mba, mwingilo waimenwako na kulukuka kwa na bambili, utundaikwa na Lesa. (Lum. 9:13-15) Mwingilo wa kusapwila mwaya ntanda yonse ubena kwingijiwa kechi na maana nangwa na bulume bwa bantu ne, bino na mupashi wa Lesa. (Zeka. 4:6) Yehoba ubena kwingijisha bamalaika kutangijila uno mwingilo. (Lum. 14:6) Onkao mambo, na mambo a kwibikishako kwa Bakamonyi banji, Yehoba upana bukwasho bwanji bwa kukoka bakimote kufwenya kwi aye.—Yoano 6:45, 65.
6 Na mambo a kufunjishiwa, kwinengezha bulongo kutwala mambo a Lesa ne kutangijilwa na bamalaika, kafwako nangwa umo wakonsha kulekesha bantu ba Yehoba kwingila ne. Twayai tutwajijile kwingila lubaji lwetu lwa kufikizhizhamo kino kimwesho kya bungauzhi bwa kukumya.