Kajo ka ku Mupashi pa Kimye Kyafwainwa
1. Ezikyo 36:29 ubena kufikizhiwa byepi ano moba?
1 Nkambo Yehoba waamba’mba: “Nkakambizha kajo kumena ne kwikavuzha, kechi nkaleta nzala jibiji pe anweba ne.” (Ezi. 36:29) Abino byambo bya bungauzhi bingila ku bantu ba Lesa ano moba. Muñambilo ya kifwanyikizho, Yehoba wamenesha kajo kavula kapana bumi ku bantu banji. Kajo ka pa kimye kyafwainwa kapanyiwa ku kupwila kwa nkambi kamwesha kino patokatu to.
2. Yehoba waingijisha byepi kupwila kwa nkambi kupainamo kajo ka ku mupashi pa kimye kyafwainwa?
2 Pa kupwila kwajingako mu Columbus, Ohio, mu 1931, Yehoba watangijile bapopweshi banji kwikala na jizhina jakatataka ja kuba’mba Bakamonyi ba kwa Yehoba. (Isa. 43:10-12) Mu 1935 jibumba jikatampe ja mu Lumwekesho 7:9-17 jayukanyikilwe bulongo. Mu 1942, Mulongo Knorr waambile jashi ja kuba’mba “Nanchi Mutende Wakonsha Kutwajijila Nyi?” Jino jashi jatundaikile bingi mwingilo wa kusapwila mwaya ntanda yonse kabiji jalengejile kwaikala ne Sukulu ya Baibolo ya Gileada ya Watchtower. Nangwa kya kuba kupwila kumo kuvulukwa bingi, bino konse kwamweshatu patoka’mba ke kijiilo kya tebulu waalwa bulongo wa kajo kanuna kapana ngovu ku mupashi pa kimye kyafwainwa.—Sala. 23:5; Mat. 24:45.
3. Twafwainwa kuba byepi pa kuba’mba tumwenemo mu kijiilo kya ku mupashi pa kupwila kwetu kwa nkambi?
3 Nanchi Mubena Kuja kya Kuba Mwaikuta Nyi? Twakonsha kwikala na kajo kavula pano bino umvwe twabula kwibikako kwikaja, twakonsha kufwetuka na nzala. (Mana. 26:15) Byobyo kiji ne ku mupashi. Pa kupwila kumo, kyatanyiwa kuba’mba bavula bazebauka zebaukamotu nangwa kwisamba na bakwabo kimye kya kupwila. Byo kiji kuba’mba kwisamba kukoseshañana ke lubaji lwanema bingi pa kupwila, kino kyafwainwa kubiwanga saka mukyangye kutendeka kupwila ne panyuma ya kupwila kipungu kimo kimo. (Sapwi. 3:1, 7) Umvwe kechi twaikala pa bipona byetu saka tutelekesha ne, kuba twaumvwapo kishinka kyanema nangwa kimo ne. Bakulumpe ba madipatimenti a kupwila ne balongo bapewa mingilo, kimo kimye bakonsha kwisamba bya kupwila kimye kibena kwambiwa majashi. Pano umvwe kechi babena kwisamba bya kupwila ne, bafwainwa kwikala bakumwenako bawama mu kwikala babena kutelekesha ku majashi. Kafwako nangwa umo wa mwiatweba wafwainwa kushalapo pa kajo ka ku mupashi nangwa kamo kapanyiwa ne.—1 Ko. 10:12; Fili. 2:12.
4. Twakonsha kumwesha byepi muchima wa kusanta pa kajo kavula ka ku mupashi koapana Yehoba?
4 Byo tusangalalapo pa kwikala na kajo kavula ka ku mupashi ka bukine koapana Yehoba, kupusanako na mafunjisho a bubela a Kilishitendomu! (Isa. 65:13, 14) Jishinda jimo jo twakonsha ‘kwikelamo na michima ya kusanta’ ke kumona kupwila kuba’mba kyo kimye kya kufunjishiwa kwi Yehoba. (Kolo. 3:15) Teshaitu muchima ku byambo bibena kwambiwa kechi kuta muchima ku mwine ñambi ne, kabiji monai byobyo byambo kuba’mba bibena kufuma ku ‘Mufunjishi wetu Mukatampe.’ (Isa. 30:20, 21; 54:13) Telekeshai. Nembainga bishinka bipi. Mu kimye kya mabanga, pitulukai mu bishinka bikatampe byaji kwambiwa jojo juba. Ingijishainga byo mufunda.
5. Bimye bya kupwila kwa nkambi bitupa bishinka ka bya kusangalelamo?
5 Kupwila konse kwikalako Amagedonyi saka ikyangye kufika, kikale kubiwa mu kampu ya babipuluka, mu byalo bya makondo, nangwa mu mapunzha muji mutende, kumwesha’mba Satana washindwa! Byo twakwatankana mu bulongo bwetu, tusanchila bingi mashuko etu a kupwila pamo pa kupwila kwa nkambi. (Ezi. 36:38) Twaketekela kuba’mba Yehoba uketupa jikwabo “kajo pa bimye byafwainwa.”—Luka 12:42.
[Kitenguluzha pa peja 4]
Ikalai na Lusanchilo lwa Tebulu wa Yehoba
◼ Teshaiko muchima
◼ Nembai bishinka bikatampe
◼ Mu kimye kya mabanga, pitulukai mu bishinka bya kupwila kwa juba ne juba
◼ Ingijishainga byo mufunda