Sukulu ya Lufunjisho lwa Mwingilo—Kibelo Kikatampe kya Kwingijilamo Mingilo
1 Kupichila mwi ngauzhi Yelemiya, Yehoba waambijile jimo amba: ‘Nkebatongwela [bantu bami] bakafunga bakebalamanga bulongo, ne abo kechi bakoba moyo jibiji ne, nangwa kususuta ne, kabiji kechi pakabulwa nangwa umotu ne.’ (Yele. 23:4) Uno mwingilo wa bukafunga ubena kwingijiwa lelo jino mu bantu ba mikoka yonse. Ubena kwingijiwa na bakulumpe mu bipwilo bavula bingi. Kabiji bansongwalume bavula pamo nobe kime bepana abo bene mu mwingilo wa Yehoba. (Sala. 110:3) Bano balongo bepelula kine ke mapesho bingi ku bipwilo bya bantu ba Lesa! Mwingilo wa ku mupashi wa kukonkanya pamo byo akitwajijila, kukikebewa banabalume bafikapo bakwabo kwipana abo bene mu kwingijila balongo babo.
2 Sukulu ya Lufunjisho lwa Mwingilo ke lunengezho lwawama bingi lujiko lwa kufunjisha bakatanda bakulumpe mu kipwilo ne bankwasho kwingila mingilo yavula. Baana ba sukulu kukilaila pa 22,000 mu byalo nobe 140 bafunjishiwa kala mu makalasi 999 aubiwa kutendeka patatwijile uno sukulu mu 1987. Ku bano balongo, sukulu yamweshatu patoka kwikala ‘kibelo kikatampe kya kwingijilamo mingilo.’—1 Ko. 16:9.
3 Nkebelo ya ino Sukulu: Nkebelo ya ino Sukulu ya Lufunjisho lwa Mwingilo ke ya kufunjisha banabalume bafikapo mu kwingila mingilo kuji konse kwakonsha kwikala kukajilwa mu jino jibumba jetu. Sukulu ibakwasha kuyuka bya kutangijila mu mwingilo wa kusapwila, mwingilo wa bukafunga, ne kufunjisha mu kipwilo. Umvwe bapwisha sukulu, baana ba sukulu bamo bebatuma kwikala bapainiya beikajila nangwa bakulumpe benda monka mu byalo byabo nangwa mu byalo bingi. Bakwabo nabo bebatuma kuya na kwingijila ku bipwilo byabo ko bafumine nangwa ku mapunzha kuji kukajilwa kukatampe mu nyaunda ya musampi.
4 Mu milungu itanu na isatu ya kufunda uno sukulu, baana ba sukulu bachikamenamo bingi mu kufunda Baibolo. Bafunda bintu byavula bingi bya mu Baibolo ne mingilo ikwabo ya bukafunga ne mashinda mwakupwishisha makatazho obiwa mu bwikalo bwa bena Kilishitu. Kabiji bafunda ne pa Binembelo byo bifunjisha pa mambo a buntangi, bya kuchiba mambo, ne bintu bikwabo bya mu jibumba jetu. Bebafunjisha lufunjisho lwawama bingi lwa kwamba pa mvula bantu ne kwibakwasha pa muntu pa muntu kuyilako palutwe ku mupashi.
5 Bikebewa: Byonka byo kyayukanyikilwa jimo, kuji bintu byavula bingi bikebewa pa kutanwa ku ino sukulu. Aba bakeba kutanwa ku sukulu bafwainwa kwikala bakulumpe mu kipwilo nangwa bankwasho baingila myaka ibiji yalondankana. Bonse bafwainwa kwikala bakatanda bafikizha myaka ya kusemwa pakachi ka 23 ne 50. Aba babena kukeba kutanwa ku sukulu bafwainwa kuyuka kutanga, kunemba, ne kwamba bulongo mulaka ufunjiwamo sukulu, kabiji kechi bafwainwa kwikala babelabela kya kuba kebakebewe kwibanengezhezhanga muchi nangwa kajo kabo ka bunke ne. Kikatakata, bakebewa ke boba bengila bupainiya bwa kimye kyonse.
6 Aba betemenwa kwingila bafwainwa kwipana ne kukonsha kwingijila kuji konse ko bebatuma. Kino kikebewa kwikala na muchima wajingapo na Isaya wipaine aye mwine na kizaku kwingila mwingilo wiikajila, awo waambile’mba: “Amiwa bano! Ntumai amiwa.” (Isa. 6:8) Kabiji wikepeshe bingi mu bwikalo bwanji bonse. Aba bakeba kutanwa ku Sukulu ya Lufunjisho lwa Mwingilo bafwainwa kutundaikwa na butemwe bwa kutemwa balongo babo ne kukebesha kwibengijila, mu kifulo kya kukeba kutumbalelamo. Panyuma ya kufunda uno sukulu wawama byonkabye, aba bapwisha baketekelwa kwingijisha byo bafunda mu kukwasha bakwabo.—Luka 12:48.
7 Mfweto: Mu milungu itanu na isatu yo bachikamenamo na kufunda, baana ba sukulu bafunjishiwa bya “kwikomesha na byambo bya lwitabilo, ne na lufunjisho lwalumbuluka.” (1 Timo. 4:6) Kino kibalengela kwikala bafikapo kukwashañana ne kutundaika bakwabo mu bipwilo ne mu bijiiji mo bebatuma. Mu mapunzha avula mwatumwa boba bapita mu Sukulu ya Lufunjisho lwa Mwingilo, mwingilo wa mu bujimi wayilako bingi palutwe; mwingilo wa bupainiya utundaikwa bingi, kikatakata ku bakyanyike; kabiji bavula bakatataka beya na kupwañena pamo na bantu ba Lesa batewako bingi muchima.
8 Nanchi mwi katanda mukulumpe mu kipwilo nangwa nkwasho uji pakachi ka myaka 23 ne 50 nyi? Nga mambo ka a kubula kulangulukapo kwipuzha kuba’mba mukatanweko ku Sukulu ya Lufunjisho lwa Mwingilo? Nanchi mwi mulongo wakyanyike ubena kulanguluka kwibikila bikonkwanyi mu mwingilo wa Yehoba nyi? Nga mambo ka a kubula kupezhako bwikalo bwenu ne kukepeshako bintu bilabikañana kuba’mba mutwele mu ‘kibelo kikatampe kya kwingijilamo mingilo’? Kyakonsha kwimuletela bingi lusekelo. Ee kine, Sukulu ya Lufunjisho lwa Mwingilo yakwashañana bingi kechi ku bonkabatu bapitamo kala ne, bino ne ku bipwilo bya bantu ba Lesa mwaya ntanda yonse.
[Kitenguluzha pa peja
Byo Bamwenejilemo mu Kufunda
“Lufunjisho kine lwankwasha bingi kuwamishako mwingilo ne bulume bwami bwa kulama jitanga na maana a kwingijisha Binembelo.”
“Sukulu yampa luketekelo lwabaya bingi mu kwingila mingilo yami yavula mu kipwilo.”
“Yapimpula pepi na bwikalo bwami bonse, kubikako ne byo ndanguluka pa bukalama bwa Lesa ne jibumba janji.”
“Lufunjisho lo nafunjile lwankwashishe bingi kuyuka’mba nafwainwa kwipana kuya na kwingijila kuji kukajilwa.”