Masukulu a Mwingilo wa Lesa—Ke Kiyukilo Kimwesha’mba Yehoba Witutemwa

YEHOBA ye “Mufunjishi” wetu. (Isa. 30:20) Butemwe bwanji bumulengela kwitufunjisha ne kwitubula mwa kubila bintu. Kyakumwenako, na mambo a butemwe, Yehoba wabujile Yesu “bintu byonse aye byo oba.” (Yoa. 5:20) Butemwe bo etutemwa atweba bakamonyi banji, bumulengela kwitupa “lujimi wa bafunda,” byo twibikako kumunemeka ne kukwasha bakwetu.—Isa. 50:4.

Pa kulondela butemwe buji ne Yehoba, Kavoto ka Lufunjisho kaji mu Jibumba Jitangijila kanengezha masukulu jikumi a mwingilo wa Lesa a kufunjisha bonse bakeba kufunda kabiji baji na bwikalo bwakonsha kwibaswisha kutanwako. Nanchi mumona ano masukulu kwikala kiyukilo kimwesha’mba Yehoba witutemwa nyi?

Akimonai biji ano masukulu a katataka ne kwiumvwina byaamba bantu batanwako kala. Kepo mwiipuzhe anweba bene’mba, ‘Nakonsha kumwenamo byepi mu ano mafunjisho a Lesa?’

MWENAINGAMO MU MASUKULU A MWINGILO WA LESA

Byo aji “Lesa wa butemwe,” Yehoba wanengezha mafunjisho a kwitulengela kwikala bwikalo bwawama, kwitukwasha kuyuka bya kushinda makatazho ne kwitulengela kwikala na lusekelo mu mwingilo wetu wa kusapwila. (2 Ko. 13:11) Byonka byajinga baana ba bwanga ba mu myaka kitota kitanshi, ne atweba bonse twafikilamo kukwasha bakwetu, ne “kwibafunjisha kulamanga bintu byonse” byo betukambizhe.—Mat. 28:20.

Nangwa kya kuba kechi twakonsha kutanwa ku ano masukulu onse ne, twakonsha kumwenamo inge twatanwapo ku umo nangwa kukilapo. Kabiji twakonsha kwingijisha mafunde afuma mu Baibolo o twakonsha kufunda ku ano masukulu. Kabiji twakonsha ne kuwamishako mbaji imo ya mwingilo wa kusapwila kupichila mu kwingila na bakalume ba Yehoba bapita mu ano masukulu.

IIpuzhai amba, ‘Nanchi bwikalo bwami bwakonsha kunswisha kutanwako ku sukulu umo pa ano masukulu nyi?’

Bapopweshi ba Yehoba bakebesha bingi kutanwa ku ano masukulu. Onkao mambo, lekai mafunjisho o mubena kutambwila emulengelenga kufwenya kwipi ne Lesa ne kwimukwasha kwingila bulongo mingilo yenu, kikatakata mwingilo wa kusapwila mambo awama, awo ubena kukebewa kumwingila bukiji bukiji.

[Kitenguluzha/Kipikichala pa peja 13-17]

BIJI MASUKULU A MWINGILO WA LESA

Sukulu wa Mwingilo wa Lesa

Nkebelo: Ke ya kufunjisha basapwishi kusapwila ne kufunjisha bulongo mambo awama.

Moba Anga?: Wa kikupu.

Mpunzha: Pa Nzubo ya Bufumu.

Bikebewa: Bonse batanwa ku kupwila kimye kyonse, baswa mafunjisho a mu Baibolo kabiji bekela monka mwayila mafunde a bwina Kilishitu Bya Kunembesha: Kalama utangijila Sukulu wa Mwingilo wa Lesa ye unemba baana ba sukulu.

Sharon, mwanamukazhi uji na kikola kya kalepu (amyotrophic lateral sclerosis), waambile’mba: “Sukulu wa Mwingilo wa Lesa wamfunjisha kuyuka bya kupesa pesa ne kwamba byambo byaumvwanyika bulongo. Kabiji nafunda kuta muchima pa bintu bya ku mupashi bikeba bantu, kechi byo nkeba amiwa mwine ne.”

Arnie, kalama wenda kabiji waingila pa myaka yavula waambile’mba: “Najinga na kikukuma kabiji kyankatazhanga bingi kutala bantu bo mbena kwisamba nabo. Pano uno sukulu wankwasha kwiketekela amiwa mwine. Na mambo a bukwasho bwa Yehoba kupichila mu uno sukulu, nafunda kuyuka bya kupema bulongo ne kuta muchima ku byo ñamba. Nsanta bingi pa kwikala na jishuko ja kutota Lesa mu kipwilo ne mu mwingilo wami wa kusapwila.”

Sukulu wa ba pa Betele

Nkebelo: Uno sukulu bamunengezhezha kukwasha baiya katataka pa Betele kuba’mba bengilenga bulongo.

Bañondo Banga?: Bañondo bana, kabiji ubiwa pa maminiti 45 kila mulungu.

Mpunzha: Pa Betele.

Bikebewa: Bafwainwa kwikala ba mu kisemi kya Betele nangwa boba bepana kwingilako pa Betele bo baswisha kwingilako mwaka umo nangwa kukilapo.

Bya Kunembesha: Ba mu kisemi kya Betele baiya katataka bo bo basala kutanwa ku uno sukulu.

Demetrius, mulongo watainwe ku uno sukulu mu ma 1980, waambile’mba: “Uno sukulu wankwasha kuwamishako mfunjilo yami ne kundengela kukebesha kwikala pa Betele. Bafunjishi, sukulu mwine ne lujimuno lwawama byandengejile kushiinwa amba Yehoba wantemwa kabiji ukeba kunkwasha kuba amba ñingilenga bulongo mwingilo wami wa pa Betele.”

Kaitlyn, mwanamukazhi watainwe ku uno sukulu waambile’mba: “Awe sukulu wankwashishe kuta muchima ku kintu kyakilamo kunema, ko kuba’mba bulunda bwami na Lesa. Sukulu wa ba pa Betele wandengela kufunda byavula pe Yehoba, nzubo yanji ne jibumba janji.”

Sukulu wa Mwingilo wa Bufumu

Nkebelo: Ke ya kufunjisha bakalama benda ne bakulumpe mu kipwilo kuyuka bya kulama bipwilo ne kwingila mingilo ya mu jibumba ja Yehoba. Kabiji bimye bimo bankwasho nabo batanwako. (Byu. 20:28) Bafunda pa bintu bibena kubiwa mu bipwilo, miteeto ijimo ne bintu bibena kukebewa. Uno sukulu wikalako kimye kyonse inge papita myaka icheche kabiji bamunengezha ku Jibumba Jitangijila.

Moba Anga?: Mu ino myaka, bakalama benda bekala na uno sukulu pa moba abiji, nangwa moba abiji ne kichika, kabiji bakulumpe mu bipwilo juba jimo ne kichika, ne bankwasho juba jimo. Mpunzha: Javula wikela pa Nzubo ya Bufumu nangwa mu Nzubo ya Kubuñenamo. Bikebewa: Bafwainwa kwikala bakalama benda, bakulumpe mu kipwilo nangwa bankwasho.

Bya Kunembesha: Bakulumpe mu kipwilo ne bankwasho bebeta kwi kalama wa mwanzo kuba’mba batanweko. Ofweshi wa musampi ye wita bakalama benda.

“Nangwa kya kuba uno sukulu wikala na bya kufunda byavula mu mobatu acheche, ukosesha bakulumpe mu kipwilo kabiji wibalengela kwikala na lusekelo ne ‘kwikala byafwainwa banabalume’ mu mwingilo wa Yehoba. Bakulumpe mu kipwilo baingila pa myaka yavula nangwa myaka icheche, bafunda bya kulama bulongo mikooko ne kukwatankana mu ‘mulanguluko umo.’”—Quinn (uji panshipo)

“Uno sukulu witukwasha kumvwisha bulongo mwatala bintu byakunza lwitabilo lwetu, kwitujimunako ku bizumba, ne kwitubula bya kuba pa kulama mikooko. Yehoba uji bingi na lusa pa kwitukwasha mu jino jishinda.”—Michael

Sukulu wa Mwingilo wa Bupainiya

Nkebelo: Ke ya kukwasha bapainiya ‘kupwisha bulongo mwingilo wabo.’—2 Timo. 4:5.

Milungu Inga?: Milungu ibiji.

Mpunzha: Itongolwa na ofweshi wa musampi; javula wikela pa Nzubo ya Bufumu.

Bikebewa: Bafwainwa kwikala bapainiya ba kimye kyonse baingila mwaka umo nangwa kukilapo.a

Bya Kunembesha: Kalama wa mwanzo ye usala bapainiya bafikilamo ne kwibabula amba bakatanweko.

Lily (uji ku kilujo) waambile’mba: “Uno sukulu wankwasha kuyuka bya kushinda makatazho o ntana mu mwingilo ne mu bwikalo bwami. Jishinda jo mfunjilamo, kufunjisha ne kwingijisha Baibolo jawaminako. Nenengezha kukwasha bakwetu, kwingijila pamo na bakulumpe mu kipwilo ne kukwatankena pamo na kipwilo.”

Brenda, watainwe jibiji ku uno sukulu waambile’mba: “Wankwasha kutesha muchima ku mpopwelo yami, kukosesha jiwi jami ja mu muchima ne kuta muchima ku kukwasha bakwetu. Kyamwekeshatu patoka kuba’mba Yehoba wa lusa.”

[Tubyambo twa mushi]

Sukulu wa Bakulumpe mu Kipwilo

Nkebelo: Ke ya kukwasha bakulumpe mu kipwilo kwingila bulongo mingilo yabo mu kipwilo ne kwibakwasha kuba bulongo bintu bikeba Yehoba.

Moba Anga?: Moba atanu.

Mpunzha: Itongolwa na ofweshi wa musampi; javula uno sukulu wikela pa Nzubo ya Bufumu nangwa Nzubo ya Kubuñenamo.

Bikebewa: Bafwainwa kwikala bakulumpe mu kipwilo.

Bya Kunembesha: Ofweshi wa musampi ye wita bakulumpe mu bipwilo kuya na kutanwako.

Akimonai byaamba bamo batainwe ku sukulu wa nambala 92 mu United States:

“Mu uno sukulu namwenamo bingi, mambo wankwasha kwipesa pesa amiwa mwine ne kumona byo nakonsha kulama bulongo jitanga ja Yehoba.”

“Nenengezha kutundaika bonse kupichila mu kwingijisha bishinka biji mu Binembelo.”

“Nkatwajijila kwingijisha bintu byo nafunda mu uno sukulu mu bwikalo bwami bonse.”

Sukulu wa Bakalama Benda ne Bakazhi Babo

Nkebelo: Ke ya kukwasha bakalama ba mwanzo ne ba nkambi kuyuka bya kwingila bulongo na bipwilo kimye kyo “bengila na ngovu mu kwamba ne mu kufunjisha.”—1 Timo. 5:17; 1 Pe. 5:2, 3.

Bañondo Banga?: Bañondo babiji.

Mpunzha: Ofweshi wa musampi ye usala mpunzha.

Bikebewa: Mulongo wafwainwa kwikala kalama wa mwanzo nangwa wa nkambi.

Bya Kunembesha: Ofweshi wa musampi ye wita bakalama benda ne bakazhi babo kuba’mba batanweko.

“Lusanchilo lwetu lwa kusanchila Yesu byo atangijila jibumba ja Lesa lwabayijileko. Twamwene amba twafwainwa kutundaika balongo bo twingijila ne kukosesha balongo mu bipwilo kwikala bakwatankana. Uno sukulu witukwashishe kuyuka’mba nangwa kya kuba pa bimye bimo kalama wenda upana lujimuno ne kololako balongo, mwingilo wanji mukatampe ke wa kukwasha balongo kumona’mba Yehoba wibatemwa bingi.”—Joel, watainwe ku sukulu mutanshi mu 1999.

Sukulu wa Baibolo wa Balongo Bakatanda

Nkebelo: Ke ya kukwasha bakulumpe mu kipwilo ne bankwasho bakatanda kwingila mingilo ikwabo ikatampe mu jibumba ja Yehoba. Bavula inge bapwisha uno sukulu bebatuma kuya na kwingijila kubena kukebewa ba mwingilo mu kyalo kyabo. Bakwabo bakonsha kwibatuma kuya na kwingijila mu kyalo kikwabo inge kya kuba bepana. Kabiji bakwabo nabo bakonsha kwikala bapainiya beikajila pa kimye kicheche kuba’mba bakasapwilenga mu mapunzha muji basapwishi bacheche nangwa mwabula basapwishi.

Bañondo Banga?: Bañondo babiji.

Mpunzha: Ofweshi wa musampi ye utongola mpunzha; javula uno sukulu wikela mu Nzubo ya Bufumu nangwa mu Nzubo ya Kubuñenamo.

Bikebewa: Balongo bakatanda baji na myaka pakachi ka 23 ne 62 kabiji baji na butuntulu bwa mubiji bwawama kabiji bakeba kwingijila ku mpunzha kubena kukebewa basapwishi ba Bufumu. (Mako 10:29, 30) Bafwainwa kwikala bapainiya ba kimye kyonse baingila bupainiya pa myaka ibiji kabiji bakulumpe mu kipwilo nangwa bankwasho baingila pa myaka ibiji yalondankana.

Bya Kunembesha: Kwikala kusambakana kwa bakeba kutanwa ku uno sukulu pa kubuñana kwa mwanzo kuba’mba bayukilepo bikwabo.

Rick watainwe ku sukulu wa nambala 23 mu United States waambile’mba: “Kutanwa ku uno sukulu kwalengejile mupashi wa Yehoba kwalula milanguluko yami. Kino kyandengejile kuyuka’mba, inge Yehoba wakupa mwingilo, upana bukwasho pa kuba’mba umwingile. Kabiji nafunjile ne kuba’mba inge nata muchima pa kuba kyaswa muchima wa Lesa ne kuchinuzhuka kwita muchima amiwa mwine, Lesa ukankosesha.”

Andreas, wingijila mu Germany waambile’mba: “Namwene kuba’mba jibumba ja Lesa jingila mu jishinda ja kukumya. Sukulu wankwashishe kwinengezhezha jimo ku mingilo ya kulutwe. Kabiji byakumwenako bya mu Baibolo byamfunjishe kino kishinka kyanema kya kuba’mba: Kwingijila Yehoba ne balongo kuleta bingi lusekelo.”

Sukulu wa Baibolo wa Bena Kilishitu Baji mu Masongola

Nkebelo: Ke ya kufunjisha baji mu masongola pa kuba’mba Yehoba ne jibumba janji jibengijishenga pakatampe. Bavula inge bapwisha uno sukulu bakebatumanga kuya na kwingijila kubena kukebewa basapwishi ba Bufumu mu kyalo kyabo. Bakwabo bakonsha ne kwibatuma kuya na kwingijila mu kyalo kikwabo umvwe bepana. Kabiji bakwabo nabo bakekala bapainiya beikajila pa kimye kicheche kuba’mba bakasapwilenga mu mapunzha muji basapwishi bacheche nangwa momwa mwabula basapwishi.

Bañondo Banga?: Bañondo babiji.

Mpunzha: Uno sukulu ubena kubiwa mu United States, kabiji kutendeka mu September 2012, ukobiwanga mu misampi imo kuzhokoloka ntanda yonse, javula ukekelanga mu Nzubo ya Bufumu nangwa mu Nzubo ya Kubuñenamo.

Bikebewa: Aba baji mu masongola baji na myaka pakachi ka 25 ne 50 kabiji baji na butuntulu bwa mubiji bwawama ne bwikalo bwakonsha kwibaswisha kuya na kwingijila kubena kukebewa basapwishi ba Bufumu kabiji bepana abo bene kuba’mba: “Amiwa bano! Ntumai amiwa.” (Isa. 6:8) Bafwainwa kwikala mu masongola pa myaka ibiji kabiji baingila mwingilo wa kimye kyonse pa myaka ibiji yalondankana. Mwanamulume wafwainwa kwikala mukulumpe mu kipwilo nangwa nkwasho waingila pa myaka ibiji yalondankana.

Bya Kunembesha: Kusambakana kwa boba bakeba kunembesha kukekalangako pa kushonkena kwa nkambi kuba’mba aba bakeba kutanwako bayukilepo byavula. Inge kechi kukekala kuno kusambakana pa kushonkena kwa nkambi kwa mu kyalo kyenu ne, kabiji mukeba kunembesha, mwakonsha kunembela ku ofweshi wa musampi pa kuba’mba bakemubule bya kuba.

“Uno sukulu wa bañondo babiji, ke sukulu upimpula bwikalo kabiji jishuko jawama bingi ku boba baji mu masongola bakeba kwingilako pakatampe mu mwingilo wa Yehoba. Twafuukwilepo kwikala bwikalo bwapela bwakonsha kwitukwasha kwingijisha kimye kyetu bulongo.”—Eric ne Corina, (baji panshipo), batainwe ku sukulu mutanshi mu 2011.

Sukulu wa Baibolo wa Gileada wa Watchtower

Nkebelo: Ke ya kufunjisha baana ba sukulu kwingijila mu bipwilo, mu mapunzha mwavula bantu, kwikala bakalama benda nangwa kwikala ba mu kisemi kya Betele. Kintu kikatampe kyo bakebafujishishanga ke kukosesha ne kutundaika bantu ba Lesa mu maofweshi a misampi ne mu bipwilo.

Bañondo Banga?: Bañondo batanu.

Mpunzha: Pa Watchtower Educational Center, ko kuba’mba ofweshi uji mu muzhi wa Patterson ku New York mu kyalo kya U.S.A., pekela masuku avula.

Bikebewa: Aba baji mu masongola baji mu mwingilo wiikajila wa kimye kyonse, ko kuba’mba bamishonale babula kutanwapo ku sukulu wa Gileada, bapainiya beikajila, bakalama benda nangwa baji mu kisemi kya Betele. Bafwainwa kwikala mu uno mwingilo bonse pamo pa myaka isatu yalondankana. Kabiji bafwainwa kuyuka kwamba, kutanga ne kunemba Kizungu bulongo.

Bya Kunembesha: Kavoto ka Musampi ko keta boba baji mu masongola kuba’mba batanweko.

Lade ne mukazhanji Monique bafumine ku United States, luno babena kwingijila mu Africa. Lade waambile’mba: “Sukulu wa Gileada witukwasha kwinengezha kuya mwaya ntanda yonse na kwingila na balongo betu.”

Monique wanungilepo’mba: “Kimye kyo ñingijisha bintu byo nafunda mu Mambo a Lesa, po po ntana lusekelo lukatampe mu mwingilo wami. Natana kuba’mba lusekelo ke kiyukilo kikwabo kimwesha amba Yehoba witutemwa.”

Sukulu wa Baji mu Kavoto ka Musampi ne Bakazhi Babo

Nkebelo: Ke ya kukwasha boba baji mu Tuvoto twa Misampi kutangijila bulongo mingilo ya pa Betele, kuta muchima ku bintu bikebewa mu bipwilo ne kutala pa bintu byubiwa mu myanzo ne mu makambi. Kabiji bafunda ne bintu byalamata mwingilo wa kutuntulula, kupulinta ne wa kusampanya mabuku.

Bañondo Banga?: Bañondo babiji.

Mpunzha: Pa Watchtower Educational Center, ko kuba’mba ofweshi uji mu muzhi wa Patterson ku New York mu kyalo kya U.S.A., pekela masukulu avula.

Bikebewa: Mulongo wafwainwa kwikala wa mu Kavoto ka Musampi nangwa wa mu Kavoto ka mu Kyalo mwabula musampi nangwa ye batongola, pano bino, ukyangye kutendeka kwingila uno mwingilo.

Bya Kunembesha: Jibumba Jitangijila jo jita balongo ne bakazhi babo kuba’mba batanweko.

Lowell ne mukazhanji Cara, batainwe ku sukulu wa nambala 25, luno bengijila ku Nigeria. Lowell waambile’mba: “Bamvulwilemo kuba’mba nangwa kya kuba napayankana kya mutundu ka, nangwa ñanyi mwingilo ye bampa, kintu kitokesha Yehoba ku muchima ke kwikala na bulunda bwawama ne aye. Kabiji sukulu witufunjishe ne ene mambo o kyanemena kumwesha butemwe Yehoba bo atemwa bakalume banji kupichila mu byo tuba na bakwetu.”

Mukazhanji aye Cara wanungilepo’mba: “Byambo bimo byo mvuluka ke bya kuba’mba, inge nakankalwa kulumbulula bintu mu jishinda japela kumvwa, nafwainwa kufunda byobyo bintu saka nkyangye kuya na kufunjisha bakwetu.”