Abya Mubena Kwibikako Kufunda kwi Yehoba Nyi?

1. Yehoba umvwa byepi pa mambo a kufunda?

¹ Yehoba, aye ‘Mufunjishi Wetu’ mukatampe ukeba amba twikale bafunda. (Isa. 30:20) Watendekele kufunjisha panyuma ya kulenga Mwananji mubeji. (Yoa. 8:28) Panyuma ya bunsatuki bwa kwa Adama, Yehoba kechi walekele kufunjisha ne, bino wanengezhezhe bintu bya kufunjisha bantu bambulwakulumbuluka.—Isa. 48:17, 18; 2 Timo. 3:14, 15.

2. Ñanyi mukwekele wa kufunjisha ujiko lelo jino?

² Lelo jino, Yehoba ubena kutangijila mukwekele mukatampe wa kufunjisha bantu. Byonka byaawijile jimo ngauzhi Isaya, mamilyonyi a bantu kuzhokoloka ntanda yonse babena kukungulukila ku “mutumba” wa kifwanyikizho wa “nzubo ya Yehoba.” (Isa. 2:2) Mambo ka o twafwainwa kukungulukila ku mutumba wa nzubo ya Yehoba? Ke na mambo a kukeba kufunda mashinda a Lesa, ko kuba’mba kwitufunjisha kwi Yehoba. (Isa. 2:3) Mu mwaka wa mwingilo wa 2010, Bakamonyi ba kwa Yehoba baingijile maola kukila pa 1.6 bilyonyi mu mwingilo wa kusapwila ne kufunjisha bantu bukine bwa mu Baibolo. Kunungapo, pa mulungu pa mulungu mafunjisho a ku mupashi abena kufunjishiwa mu bipwilo kukila pa 105,000 kuzhokoloka ntanda yonse kabiji mabuku a kufundamo a bwina Kilishitu abena kunembwa na kalume wa kishinka kabiji wa maana mu milaka kukila pa 500.

3. Anweba bunke bwenu, mwamwenamo byepi mu lufunjisho lwanengezha Yehoba?

³ Mwenaimo Pakatampe: Twamwenamo bingi mu lufunjisho lwa Lesa. Twafunda kuba’mba Lesa uji na jizhina kabiji wituta bingi muchima. (Sala. 83:18; 1 Pe. 5:6, 7) Twayuka mikumbu imo ya mepuzho amo anema bingi mu bwikalo, nabiji a kuba’mba: Mambo ka bantu o bayanjila ne kufwa? Nakonsha kutana byepi lusekelo lwa kine? Nanchi nkebelo ya bumi yo yepi? Yehoba witupa ne mafunde a kulondela etulengela ‘kwenda mu jishinda jawama.’—Yosh. 1:8.

4. Ñanyi masukulu amo anengezha Yehoba a kukwashishamo bakalume banji kabiji mambo ka o twafwainwa kwibikako kufunda kwi Aye?

⁴ Kunungapo, Yehoba wanengezha masukulu avula a kukwashishamo bakalume banji kwingilako pakatampe mu mwingilo. Pa mapa 4-6 paji masukulu apusana pusana akonsha kutanwako bamo. Nangwa kya kuba bwikalo bwetu kechi bwakonsha kwituswisha kutanwa ku ano masukulu ne, abya tubena kutako muchima ku oa o tutanwako kimye kyonse nyi? Nanchi tubena kutundaika bakyanyike, bo batundaika javula ku bafunjishi babo ne bakwabotu kukeba kufunda kufika palepa, kwibikila bikonkwanyi bya ku mupashi ne kufunjishiwa kwi Lesa, ko kuba’mba kufunda sukulu wakila masukulu onse a pano pa ntanda nyi? Kwibikako kufunda kwi Yehoba kuketulengela kwikala na lusekelo pa kino kimye ne kukekala na bumi bwa myaka kulutwe.—Sala. 119:105; Yoa. 17:3.

Sukulu wa Kufunda Kutanga ne Kunemba

• Nkebelo: Ke ya kufunjisha bantu kutanga ne kunemba pa kuba’mba batangenga ne kufunda Baibolo kabiji ne kufunjisha bakwabo bukine.

• Moba Anga?: Kwesakanatu na bine bintu byo biji.

• Mpunzha: Pa Nzubo yenu ya Bufumu.

• Bakonsha Kutanwako: Basapwishi bonse ne boba bamwesha lusekelo.

• Bya Kunembesha: Bakulumpe mu Kipwilo banengezha sukulu wa kufunda kutanga ne kunemba kwesakana na bibena kukebewa pa kyokyo kipwilo ne kutundaika bonse bakonsha kutanwako.

Sukulu wa Mwingilo wa Lesa

• Nkebelo: Ke ya kufunjisha basapwishi kusapwila ne kufunjisha bulongo mambo awama.

• Moba Anga?: Wa kikupu.

• Mpunzha: Pa Nzubo yenu ya Bufumu.

• Bakonsha Kunembesha: Basapwishi bonse. Kubikapo ne boba bapwila kimye kyonse, baswa mafunjisho a mu Baibolo kabiji bekela monka mwayila mafunde a bwina Kilishitu.

• Bya Kunembesha: Isambai na kalama utangijila Sukulu wa Mwingilo wa Lesa.

Sukulu wa Kufunda Mulaka Ungi

• Nkebelo: Ke kufunjisha basapwishi bya kusapwila mambo awama mu milaka ikwabo.

• Bañondo Banga?: Bañondo bana nangwa batanu. Javula kufunda kwikalako pa Kibelushi lukelo pa ola umo nangwa maola abiji.

• Mpunzha: Javula kufunda kwikela pa Nzubo ya Bufumu iji pa bwipi.

• Bakonsha Kunembesha: Basapwishi babula kaneneno bakeba kusapwila mu mulaka ungi.

• Bya Kunembesha: Unengezhiwa na ofweshi wa musampi umvwe kekikebewe.

Mwingilo wa Kushimika Mazubo a Bufumu

• Nkebelo: Ke ya kushimika ne kuwamisha Mazubo a Bufumu. Uno kechi sukulu ne, bino mu luno lunengezho bamwingilo bebafunjisha mingilo yapusana pusana pa kuba’mba bakwashengako mu bya buntungi.

• Moba Anga?: Kwesakanatu na bibena kukeba yewo wamwingilo.

• Mpunzha: Ku mpunzha iji yonse kubena kwingijila jibumba ja Bantungi ba Mazubo a Bufumu. Bamingilo bamo bakonsha kwibeta kuya na kukwasha mu mwingilo wa kukwasha bantu baponenwa na bya malwa mu mapunzha a kwalepa.

• Bikebewa: Balongo ne banyenga bafwainwa kwikala babatizhiwa bo baitabizha ku jibumba ja bakulumpe. Bakonsha kwikala bafunda bya kwingila yoyo mingilo nangwa ne.

• Bya Kunembesha: Bafwainwa kunemba bibena kukebewa pa pepala wa Kuswishishapo Basapwishi Bakeba Kutwela mu Mwingilo wa Kushimika Mazubo a Bufumu (Kingdom Hall Volunteer Worker Questionnaire) ye bebapa ku bakulumpe mu kipwilo kya konkako.

Sukulu wa Mwingilo wa Bupainiya

• Nkebelo: Ke ya kukwasha bapainiya ‘kupwisha bulongo mwingilo wabo.’—2 Timo. 4:5.

• Milungu Inga?: Milungu ibiji.

• Mpunzha: Itongolwa na ofweshi wa musampi; javula sukulu wikela pa Nzubo ya Bufumu iji kwipi.

• Bikebewa: Bafwainwa kwikala bapainiya ba kimye kyonse baingila bupainiya mwaka umo.

• Bya Kunembesha: Kalama wa mwanzo ye usala bapainiya bafikilamo ne kwibabula amba bakatanweko.

Sukulu wa ba pa Betele

• Nkebelo: Uno sukulu bamunengezhezha kukwasha baiya katataka pa Betele kuba’mba bengilenga bulongo.

• Bañondo Banga?: Bañondo bana, pano bino ubiwa pa ola umo kila mulungu.

• Mpunzha: Pa Betele.

• Bikebewa: Bafwainwa kwikala ba mu kisemi kya Betele ba kimye kyonse nangwa boba bepana kwingilako pa Betele mu kimye kicheche (mwaka umo nangwa kukilapo).

• Bya Kunembesha: Ba mu kisemi kya Betele bafikilamo bo bo banemba kutanwako ku uno sukulu.

Sukulu wa Mwingilo wa Bufumu

• Nkebelo: Ke ya kufunjisha bakulumpe mu kipwilo ne bankwasho kulama bipwilo ne kwingila mingilo ya mu jibumba ja Yehoba. (Byu. 20:28) Uno sukulu wikalako kimye kyonse inge papita myaka icheche kabiji bamunengezha ku Jibumba Jitangijila.

• Moba Anga?: Mu ino myaka bakulumpe mu bipwilo bekala na uno sukulu pa juba jimo ne kichika, kabiji ne bankwasho juba jimo.

• Mpunzha: Javula wikela pa Nzubo ya Bufumu nangwa mu Nzubo ya Kubuñenamo iji kwipi.

• Bikebewa: Bafwainwa kwikala bakulumpe mu bipwilo nangwa bankwasho.

• Bya Kunembesha: Bakulumpe mu bipwilo ne bankwasho bafikilamo bebeta kwi kalama wa mwanzo kuba’mba batanweko.

Sukulu wa Bakulumpe mu Kipwiloa

• Nkebelo: Ke ya kukwasha bakulumpe mu bipwilo kwingila mingilo yabo mu kipwilo.

• Moba Anga?: Moba atanu.

• Mpunzha: Itongolwa na ofweshi wa musampi; javula uno sukulu wikela pa Nzubo ya Bufumu nangwa Nzubo ya Kubuñenamo iji kwipi.

• Bikebewa: Bafwainwa kwikala bakulumpe mu bipwilo.

• Bya Kunembesha: Ofweshi wa musampi wita bakulumpe mu bipwilo bafikilamo kuya na kutanwako.

Sukulu wa Bakalama Benda ne Bakazhi Babob

• Nkebelo: Ke ya kukwasha bakalama ba mwanzo ne ba nkambi kuyuka bya kwingila bulongo na bipwilo ne ‘kwingila na ngovu mu kwamba ne mu kufunjisha’ ne kulama bulongo jitanga jo bebapa.—1 Timo. 5:17; 1 Pe. 5:2, 3.

• Bañondo Banga?: Bañondo babiji.

• Mpunzha: Ofweshi wa musampi ye utongola mpunzha.

• Bikebewa: Bafwainwa kwikala bakalama ba mwanzo nangwa ba nkambi.

• Bya Kunembesha: Ofweshi wa musampi ye wita bakalama benda ne bakazhi babo bafikilamo kuya na kutanwako.

Sukulu wa Baibolo wa Balongo Bakatandac

• Nkebelo: Ke ya kukwasha bakulumpe mu bipwilo ne bankwasho bakatanda kwingila mingilo ikwabo ikatampe. Bavula inge bapwisha uno sukulu bebatuma kuya na kwingijila kubena kukebewa ba mwingilo mu kyalo kya kwabo. Bachechetu bo batuma kuya na kwingijila mu kyalo kikwabo inge kya kuba bepana.

• Bañondo Banga?: Bañondo babiji.

• Mpunzha: Ofweshi wa musampi ye utongola mpunzha; javula uno sukulu wikela mu Nzubo ya Kubuñenamo nangwa Nzubo ya Bufumu iji kwipi.

• Bikebewa: Bafwainwa kwikala bakatanda baji na myaka pakachi ka 23 ne 62 kabiji baji na butuntulu bwa mubiji bwawama bakeba kukwasha balongo ne kuya na kwingijila ku mpunzha kubena kukebewa basapwishi ba Bufumu. (Mako 10:29, 30) Bafwainwa kwikala bakulumpe mu kipwilo nangwa bankwasho baingila pa myaka ibiji yalondankana.

• Bya Kunembesha: Inge uno sukulu moaji mu nyaunda itangijilwa na musampi wenu, kwikala kusambakana kwa bakeba kutanwa ku uno sukulu pa kubuñana kwa mwanzo. Mabulañano akwabo ekalako kimye kya kuno kusambakana.

Sukulu wa Baibolo wa Bena Kilishitu Baji mu Masongolad

• Nkebelo: Ke ya kufunjisha baji mu masongola pa kuba’mba Yehoba ne jibumba janji jibengijishenga pakatampe. Bavula inge bapwisha uno sukulu bakebatumanga kuya na kwingijila kuji kukajilwa mu kyalo mo bekala. Bamo bakonsha kwibatuma kuya na kwingijila mu kyalo kingi inge bepana.

• Bañondo: Bañondo babiji.

• Mpunzha: Uno sukulu watendekela pa Watchtower Educational Center, ko kuba’mba ofweshi uji mu muzhi wa Patterson mu kyalo kya U.S.A pekela masuku avula. Palutwe kacheche, ofweshi wa musampi ukanengezha uno sukulu kwikalako mu mapunzha apusana pusana, kikatakata pa Nzubo ya Kubuñenamo nangwa pa Nzubo ya Bufumu.

• Bikebewa: Aba baji mu masongola baji na myaka pakachi ka 25 ne 50 kabiji baji na butuntulu bwa mubiji bwawama babena kukeba kuya na kwingijila kuji kukajilwa kabiji bepana abo bene kuba’mba: “Amiwa bano! Ntumai amiwa.” (Isa. 6:8) Kunungapo, bafwainwa kwikala mu masongola pa myaka ibiji kabiji baingila mwingilo wa kimye kyonse pa myaka ibiji yalondankana.

• Bya Kunembesha: Umvwe uno sukulu waikalako mu kyalo kitangijilwa na ofweshi wenu wa musampi, kusambakana kwa boba bakeba kunembesha kukekalangako pa kubuñana kwa juba jimo. Mabulañano akwabo akekalako pa kuno kusambakana.

Sukulu wa Baibolo wa Gileada wa Watchtower

• Nkebelo: Ke ya kufunjisha bapainiya ne bakwabo baji mu mwingilo wa kimye kyonse bya kwingila mwingilo wa bumishonale.

• Bañondo Banga: Bañondo batanu.

• Mpunzha: Pa Watchtower Educational Center, ko kuba’mba ofweshi uji mu muzhi wa Patterson mu kyalo kya U.S.A pekela masuku avula.

• Bikebewa: Aba baji mu masongola baikala mu bukine pa myaka isatu kabiji baji na myaka pakachi ka 21 ne 38. Bafwainwa kwikala na ino myaka kimye kyo babena kunembesha. Kabiji bafwainwa kuyuka mulaka wa kizungu. Bafwainwa kwikala mu masongola pa myaka ibiji kabiji baji mu mwingilo wa kimye kyonse ye baingilako kala myaka ibiji yalondankana. Bafwainwa kwikala na butuntulu bwa mubiji bwawama. Bapainiya bengijila mu byalo bingi (kubikako ne babena kwingila nobe bamishonale); bakalama benda; bamwingilo ba pa Betele; kabiji ne boba bapwishishe Sukulu wa Lufunjisho lwa Mwingilo, Sukulu wa Baibolo wa Balongo Bakatanda ne Sukulu wa Baibolo wa Bena Kilishitu Baji mu Masongola, bakonsha kunembesha umvwe bafikizha bikebewa.

• Bya Kunembesha: Mu misampi yo basala, kusambakana kwa bakeba kutanwa ku uno sukulu kwikalako pa kushonkena kwa nkambi. Mabulañano akwabo apanwa pa kuno kusambakana. Umvwe mu kyalo kyenu, kuno kusambakana kechi kwikalako pa kushonkena kwa nkambi ne, mwakonsha kunembela ofweshi wa musampi uji mu kyalo kyenu kuba’mba muyukileko byavula.

Sukulu wa Baji mu Kavoto ka Musampi ne Bakazhi Babo

• Nkebelo: Ke ya kukwasha boba baji mu tuvoto twa Misampi kutangijila bulongo mingilo ya pa Betele, kuta muchima ku bintu bikebewa mu bipwilo, kutala pa bintu byubiwa mu myanzo ne mu makambi aji mu byalo mo bengijila, kubikapo ne kutala pa mwingilo wa kutuntulula, wa kupulinta ne wa kusampanya mabuku kabiji ne kumona bibena kwingila madipatimenti akwabotu.—Luka 12:48b.

• Bañondo Banga: Bañondo babiji.

• Mpunzha: Pa Watchtower Educational Center, ko kuba’mba ofweshi uji mu muzhi wa Patterson mu kyalo kya U.S.A pekela masuku avula.

• Bikebewa: Wafwainwa kwikala wa mu Kavoto ka Musampi nangwa wa mu Kavoto ka mu kyalo mwabula musampi nangwa ye bakatongola kwikala mu tuno tuvoto.

• Bya Kunembesha: Jibumba Jitangijila jo jita balongo bafikilamo pamo na bakazhi babo kuba’mba batanweko.

[Tubyambo twa mushi]