Lubaji 5—Kufunjishanga Mafunjisho a Baibolo Anunguluka
Kuyuka pa Kupelela Kufunjisha
1 Byo afunjishanga, Yesu walangulukilangako baana banji ba bwanga papelelanga bulume bwabo, wibambilanga ‘monka mo bayukile kumvwina.’ (Mako 4:33; Yoa. 16:12) Byonkabyo, ne bafunjishi ba Mambo a Lesa bafwainwa kuyuka pa kupelela kufunjisha kimye kyo babena kufunjisha lufunjisho lwa Baibolo. Kuyuka pafwainwa kupezha lufunjisho kwaimena pa bulume ne bwikalo bwa mufunjishi ne ye afunjisha.
2 Koseshai Lwitabilo Lwabo: Bamo bafunda Baibolo bakonsha kukebewa kufunda lufunjisho lumo mu bipungu bibiji nangwa bisatu pa kuba’mba bakwatakanye bulongo lufunjisho lwakonsha kukwatakanya bakwabo kwakubula lukatazho mu kipungu kimotu. Kyanema bingi kukwasha ye tufunjisha Baibolo kumvwisha byo abena kufunda mu kifulo kya kumufunjisha byavula mu ka kimye kacheche. Yense ufunda Baibolo ukebewa kitendekesho kyakosa kya lwitabilo lo aitabila katataka mu Mambo a Lesa.—Mana. 4:7; Loma 12:2.
3 Mulungu ne mulungu byo mufunjishanga lufunjisho lwa Baibolo, ikalaingako na kimye kyafwainwa kukwashishangamo ye mufunjisha kumvwisha ne kuswa byo abena kufunda kufuma mu Mambo a Lesa. Kechi mwafwainwa kupitamotu lubilo lubilo kya kuba ye mufunjisha wakankalwa ne kumwenamo mu bukine bubena kufunjiwa ne. Ikalaiko na kimye kyawaina kya kutesha muchima pa bishinka bikatampe ne binembelo bine paimena mafunjisho.—2 Timo. 3:16, 17.
4 Kuletamo Misambo Ingi mu Lufunjisho Ne: Byonka byo tubula kukeba kupitamotu lubilo lubilo mu lufunjisho, twafwainwa ne kuchinuzhuka kuletamo misambo ingi. Umvwe ye mufunjisha watemwa kwambatu pa bintu byanji mwine, mwakonsha kunengezha kwisamba nanji bino bintu panyuma ya lufunjisho.—Sapwi. 3:1.
5 Kabiji bukine bo twayuka bwakonsha kwitulengela satulolobwelatu kimye kya lufunjisho. (Sala. 145:6, 7) Kishinka kyabula mu lufunjisho nangwa bya kumwenamo byakonsha kuwamisha lufunjisho, pano bino, kechi twafwainwa kwibivuzha nangwa sa tubatu ambee kya kuba byalengela ne ubena kufunda Baibolo wakankalwa kwikala na maana alumbuluka a mafunjisho atanshi a mu Baibolo ne.
6 Kupichila mu kwisamba byambo byaesakana pa lufunjisho luji lonse, tukwasha bafunda Baibolo ‘kwenda mu kyeya kya Yehoba.’—Isa. 2:5.