Bya Kuvululako bya pa Kivuluko

Kivuluko kya uno mwaka kikekalako pa Kina, March 24. Bakulumpe mu kipwilo bafwainwa kulondela bino bintu:

◼ Pa kusala kimye kya kupwila, monai’mba kechi mwapishamo bimpashañano juba saka jikyangye kuzhika ne.

◼ Bonse kuvwangako ne ñambi, bafwainwa kubujilwa jimo kimye ne mpunzha kukekela kivuluko.

◼ Shinkwa ne waini byafwainwa kunengezhewelwa jimo.—Monai Kyamba kya Usopa kya March 1, 2003 mape. 10-11.

◼ Michiba, matambula, tebulu wanengela bulongo, ne nsalu ya kwanshikapo byafwainwa kuletelwa jimo ku mpunzha kukekela kivuluko.

◼ Nzubo ya Bufumu nangwa kishimikwa kikwabo kyo mukapwilamo kyafwainwa kuwamishiwa bulongo saka kukiji kimye.

◼ Mwafwainwa kusajila jimo baasha ne ba kupishamo bimpashañano ne kwibabujila jimo mingilo yabo ne bya kwiingila, kabiji ne pa mvwajilo yawama ne mwekelo.

◼ Mwafwainwa kutwajila bimpashañano mushingwa yense wabela ne wakankalwa kutanwako na mambo a kukepelwa kwa bulume bwa kwenda.

◼ Umvwe bipwilo kukila pa kimo bibena kwingijisha Nzubo ya Bufumu imo, abyo bipwilo byafwainwa kukwatankana bulongo pa kuba’mba kubule kwikala kwishindaika pa kibelo, mwakupita, ne pa kwimikila myotoka.